കർണാടക സ്റ്റേറ്റ് ക്രിക്കറ്റ് അസോസിയേഷൻ ( കെഎസ്സിഎ) തിരഞ്ഞെടുപ്പിൽ പ്രസിഡന്റ് സ്ഥാനത്തേക്ക് മുൻ ഇന്ത്യൻ ക്രിക്കറ്റ് താരം വെങ്കിടേഷ് പ്രസാദ് സ്ഥാനാർത്ഥിത്വം പ്രഖ്യാപിച്ചു. ചൊവ്വാഴ്ച ബെംഗളൂരുവിൽ നടന്ന പ്രഖ്യാപന പരിപാടിയിൽ പങ്കെടുത്ത പ്രമുഖരായ അനിൽ കുംബ്ലെ , ജവഗൽ ശ്രീനാഥ് എന്നിവർ പ്രസാദിന് പിന്തുണ നൽകി .
“കർണാടക ക്രിക്കറ്റ് പുനർനിർമ്മിക്കണമെന്ന് ഞങ്ങൾ വിശ്വസിക്കുന്നതിനാലാണ് ഞങ്ങൾ ഒന്നിച്ചത്. കർണാടകയിലെ എല്ലാ ക്രിക്കറ്റ് കളിക്കാരും ഈ ശ്രമത്തിൽ ഞങ്ങളുടെ പിന്നിലുണ്ട്. എം. ചിന്നസ്വാമി സ്റ്റേഡിയത്തിന്റെ അഭിമാനം പുനഃസ്ഥാപിക്കുക, സംസ്ഥാനത്തുടനീളം അടിസ്ഥാന സൗകര്യങ്ങൾ നിർമ്മിക്കുക, യുവ കളിക്കാർക്കുള്ള പാത ശക്തിപ്പെടുത്തുക എന്നിവയാണ് ഞങ്ങളുടെ ലക്ഷ്യം,” പ്രസാദ് പറഞ്ഞു.
പ്രസാദിന്റെ ‘ടീം ഗെയിം ചാർജേഴ്സിന്റെ’ ഭാഗമായി, സുജിത് സോമസുന്ദർ (വൈസ് പ്രസിഡന്റ്), വിനയ് മൃത്യുഞ്ജയ (സെക്രട്ടറി), എ വി ശശിധർ (ജോയിന്റ് സെക്രട്ടറി), ബി എൻ മധുകർ (ട്രഷറർ) എന്നിവരെ മറ്റ് തസ്തികകളിലേക്ക് മത്സരിക്കാൻ നാമനിർദ്ദേശം ചെയ്തു.
