വാട്‌സ്ആപ്പ് ബിസിനസ് പ്ലാറ്റ്‌ഫോമുകൾക്ക് ഇന്ന് (ഒക്ടോബർ 1) മുതൽ ഫീസ് നിലവിൽ വന്നു. ഇതുവരെ സൗജന്യമായി ലഭിച്ചിരുന്ന ചില വാണിജ്യ സന്ദേശങ്ങൾക്കാണ് ഇനി മുതൽ കമ്പനികൾ പണം നൽകേണ്ടി വരിക. മെറ്റയുടെ പുതിയ പ്രഖ്യാപനപ്രകാരം ഇന്ത്യയിൽ യൂട്ടിലിറ്റി, സർവീസ് മെസേജുകൾക്ക് ഓരോന്നിനും 11.5 പൈസ നിരക്കിലാണ് ഫീസ് ഈടാക്കുന്നത്.
വിവിധ വാണിജ്യ സേവനങ്ങളുമായി ബന്ധപ്പെട്ട ആശയവിനിമയങ്ങൾ ഇതോടെ പൂർണ്ണമായും സൗജന്യമല്ലാതായി മാറിയിരിക്കുകയാണ്. ഉപഭോക്തൃ സേവനങ്ങൾ, ഓർഡർ അപ്‌ഡേറ്റുകൾ, ഡെലിവറി വിവരങ്ങൾ, ബുക്കിങുകൾ, പേയ്മെന്റ് സംബന്ധമായ സന്ദേശങ്ങൾ തുടങ്ങിയ ആവശ്യങ്ങൾക്കായി വാട്‌സ്ആപ്പ് API / പ്ലാറ്റ്‌ഫോം ഉപയോഗിക്കുന്ന സ്ഥാപനങ്ങളെയാണ് ഈ മാറ്റം പ്രധാനമായും ബാധിക്കുക.
പ്രധാന വിവരങ്ങൾ
- സൗജന്യ പരിധി: വാണിജ്യ സ്വഭാവത്തിലുള്ള വാട്‌സ്ആപ്പ് ബിസിനസ് പ്ലാറ്റ്‌ഫോമുകൾക്ക് പ്രതിമാസം 1000 സൗജന്യ സർവീസ് മെസേജുകൾ ലഭിക്കും. ഇതിനു ശേഷമുള്ള അധിക സന്ദേശങ്ങൾക്കാണ് ഫീസ് ബാധകമാകുന്നത്.
- ചെറുകിടക്കാർക്ക് ബാധകമല്ല: സാധാരണ വാട്‌സ്ആപ്പ് ബിസിനസ് ആപ്പ് (WhatsApp Business App) ഉപയോഗിക്കുന്ന ചെറുകിട വ്യാപാരികൾക്കും വ്യക്തിഗത ബിസിനസുകൾക്കും ഈ ചാർജുകൾ നൽകേണ്ടി വരില്ല.
- നിരക്ക് വിവരങ്ങൾ: ആയിരം യൂട്ടിലിറ്റി/സർവീസ് മെസേജുകൾക്ക് 115 രൂപയും 10,000 മെസേജുകൾക്ക് 1150 രൂപയുമാണ് നിരക്ക് (ജിഎസ്ടി തുക ഇതിൽ ഉൾപ്പെടുന്നില്ല).
- 24 മണിക്കൂർ നിയമം: ബിസിനസ് പ്ലാറ്റ്‌ഫോം വഴി ഉപഭോക്താക്കൾക്ക് 24 മണിക്കൂറിനുള്ളിൽ അയക്കുന്ന യൂട്ടിലിറ്റി മെസേജുകൾക്കും (ഉദാഹരണത്തിന്: ഓൺലൈൻ ഓർഡർ നമ്പർ, ഡെലിവറി നോട്ടിഫിക്കേഷനുകൾ) ഈ നിരക്ക് ബാധകമാണ്.
എന്തെല്ലാം സൗജന്യമായിരുന്നു?
നിലവിലെ സംവിധാനപ്രകാരം, ഒരു ഉപഭോക്താവ് ബിസിനസ് വാട്‌സ്ആപ്പ് പ്ലാറ്റ്‌ഫോമിലൂടെ സന്ദേശങ്ങൾ അയച്ചാൽ യാതൊരു ചാർജും ഈടാക്കാതെ തന്നെ കമ്പനികൾക്ക് മറുപടി നൽകാൻ സാധിച്ചിരുന്നു. ഓർഡർ അപ്‌ഡേറ്റുകളും ഡെലിവറി വിവരങ്ങളും ഉൾപ്പെടെയുള്ളവ ഇതിൽ ഉൾപ്പെട്ടിരുന്നു. എന്നാൽ പുതിയ മാറ്റത്തോടെ ഈ സൗജന്യ സേവനങ്ങൾക്കാണ് നിയന്ത്രണ വന്നിരിക്കുന്നത്.
ഒരു സന്ദേശത്തിന് തുക വളരെ കുറവാണെന്ന് തോന്നാമെങ്കിലും, പ്രതിമാസം ലക്ഷക്കണക്കിന് ഉപഭോക്തൃ ഇടപെടലുകൾ നടത്തുന്ന ഇ-കൊമേഴ്സ് കമ്പനികൾ, ബാങ്കുകൾ, ട്രാവൽ സ്ഥാപനങ്ങൾ എന്നിവരെ സംബന്ധിച്ച് ഇത് വലിയൊരു സാമ്പത്തിക ബാധ്യതയായി മാറിയേക്കാം.
