ശുദ്ധ വെജിറ്റേറിയൻ ഭക്ഷണത്തിന് മുൻഗണന നൽകുന്ന ഉപഭോക്താക്കൾക്കായി “പ്യുവർ വെജ് മോഡ്” സേവനം ആരംഭിക്കുന്നതായി സൊമാറ്റോ സ്ഥാപകനും സിഇഒയുമായ ദീപീന്ദർ ഗോയൽ പ്രഖ്യാപിച്ചു. പുതിയ സേവനം ആരംഭിക്കുന്നതിനുള്ള കാരണം വെജിറ്റേറിയൻ ഉപഭോക്താക്കളിൽ നിന്നുള്ള ഫീഡ്ബാക്ക് ആണെന്ന് അദ്ദേഹം കൂട്ടിച്ചേർത്തു.
കൂടാതെ 100 ശതമാനം വെജിറ്റേറിയൻ ഡയറ്റ് പിന്തുടരുന്ന ഉപഭോക്താക്കൾക്കായി ഓൺലൈൻ ഫുഡ് ഡെലിവറി പ്ലാറ്റ്ഫോം ഇന്ത്യയിൽ “പ്യുവർ വെജ് ഫ്ലീറ്റ്” അവതരിപ്പിക്കുന്നുണ്ടെന്നും അറിയിച്ചു. ആഗോളതലത്തിൽ ഏറ്റവും കൂടുതൽ സസ്യഭുക്കുകൾ ഉള്ളത് ഇന്ത്യയിലാണെന്നും അവരുടെ ഫീഡ്ബാക്കിൻ്റെ അടിസ്ഥാനത്തിലാണ് ഈ പുതിയ ഫീച്ചറുകൾ ആരംഭിച്ചതെന്നും എക്സിലെ പോസ്റ്റുകളുടെ ഒരു പരമ്പരയിൽ ഗോയൽ പറഞ്ഞു.
“ലോകത്തിൽ ഏറ്റവും കൂടുതൽ സസ്യഭുക്കുകൾ ഉള്ളത് ഇന്ത്യയിലാണ്, അവരിൽ നിന്ന് ഞങ്ങൾക്ക് ലഭിച്ച ഏറ്റവും പ്രധാനപ്പെട്ട ഒരു ഫീഡ്ബാക്ക് അവരുടെ ഭക്ഷണം പാകം ചെയ്യുന്നതെങ്ങനെയെന്നും അവരുടെ ഭക്ഷണം എങ്ങനെ കൈകാര്യം ചെയ്യുന്നു എന്നതിനെക്കുറിച്ചും അവർ വളരെ പ്രത്യേകം ശ്രദ്ധിക്കുന്നു എന്നതാണ്. അവരുടെ ഭക്ഷണ മുൻഗണനകൾ പരിഹരിക്കുന്നതിന്, 100 ശതമാനം വെജിറ്റേറിയൻ ഭക്ഷണ മുൻഗണനയുള്ള ഉപഭോക്താക്കൾക്കായി ഞങ്ങൾ ഇന്ന് “പ്യുവർ വെജ് മോഡ്” സഹിതം സൊമാറ്റോയിൽ “പ്യുവർ വെജ് ഫ്ലീറ്റ്” അവതരിപ്പിക്കുകയാണ്,” സൊമാറ്റോ സിഇഒ പറഞ്ഞു.
“പ്യുവർ വെജ് മോഡിൽ” സസ്യാഹാരം മാത്രം നൽകുന്ന റെസ്റ്റോറൻ്റുകൾ ഉൾപ്പെടുന്നുവെന്ന് ഗോയൽ പങ്കുവെച്ചു, സസ്യേതര ഇനങ്ങൾ വാഗ്ദാനം ചെയ്യുന്ന സ്ഥാപനങ്ങളൊഴികെ. സോമാറ്റോയുടെ പ്യുവർ വെജ് ഫ്ലീറ്റ് സ്റ്റാൻഡേർഡ് റെഡ് ബോക്സുകൾക്ക് പകരം പച്ച ഡെലിവറി ബോക്സുകൾ ഉപയോഗിക്കുമെന്ന് അദ്ദേഹം പറഞ്ഞു.
പച്ച ഡെലിവറി ബോക്സുമായി അവർ നോൺ വെജിറ്റേറിയൻ റെസ്റ്റോറൻ്റുകളിൽ പ്രവേശിക്കില്ല. ഈ മോഡ് ഏതെങ്കിലും മതപരമോ രാഷ്ട്രീയമോ ആയ മുൻഗണനകൾ നിറവേറ്റുകയോ ഒഴിവാക്കുകയോ ചെയ്യുന്നില്ലെന്ന് അദ്ദേഹം വ്യക്തമാക്കി. എന്നിരുന്നാലും, ഈ നീക്കത്തിന് ഓൺലൈനിൽ ഒരു വിഭാഗം ഉപയോക്താക്കൾ സൊമാറ്റോ സിഇഒയെ പരിഹസിച്ചു.
