ഇൻസ്റ്റയിലും ഫേസ്ബുക്കിലും പുത്തൻ ഫീച്ചർ എത്തിക്കുന്ന പരീക്ഷണത്തിലാണ് മെറ്റ. എപ്പിസോഡുകളായി പോസ്റ്റ് ചെയ്യുന്ന റീലുകൾ കണ്ടെത്താൻ ഉപയോക്താക്കൾ മെനക്കെടാറുണ്ട്. ഇതിന് ഒരു പരിഹാരമായാണ് പുതിയ ഫീച്ചർ എത്തിക്കുന്നത്. സീരീസ് എന്ന ഫീച്ചർ ആണ് മെറ്റ എത്തിക്കുന്നത്. അതായാത് റീലുകളെ എപ്പിസോഡുകളുടെ ക്രമത്തിൽ കാണാൻ സഹായിക്കുന്നതാണ് പുത്തൻ ഫീച്ചർ. ഇത് ഉടൻ എല്ലാവർക്കും ലഭിക്കുമെന്നാണ് കമ്പനി വ്യക്തമാക്കുന്നത്.
തിരഞ്ഞെടുത്ത സ്രഷ്‌ടാക്കളുമായി മെറ്റാ സീരീസ് ഫീച്ചർ പരീക്ഷിക്കും. ഷോർട്ട്- ഫോം കണ്ടന്റ് പ്ലാറ്റ്‌ഫോമായ ടിക് ടോക്കിന് 2023 മുതൽ സമാനമായ ഫീച്ചർ അവതരിപ്പിച്ചിട്ടുണ്ട്. ക്രിയേറ്റർമാരുടെ അനുബന്ധ വീഡിയോകൾ ഉപയോക്താക്കൾക്ക് എളുപ്പത്തിൽ കണ്ടെത്താനാണ് മെറ്റ ലക്ഷ്യമിടുന്നത്. ഒരു വിഷയത്തെ ആസ്‌പദമാക്കിയുള്ള ഒന്നിലധികം റീലുകളെ ഒരു ശേഖരമായി ക്രോഡീകരിക്കുന്നതാണ് പുതിയ ഫീച്ചർ.
അതായത്, ഒരാളുടെ പ്രൊഫൈലിലൂടെയും അപ്‌ലോഡുകളിലൂടെയും ബ്രൗസ് ചെയ്യുന്നതിന് പകരം, സീരീസ് വിഭാഗത്തിൽ സമാനമായ വീഡിയോകൾ കണ്ടെത്താൻ കഴിയും. നിങ്ങളുടെ ഫീഡിൽ ഒരു സീരീസിൻ്റെ ഭാഗമായ ഒരു റീൽ കണ്ടെത്തുകയാണെങ്കിൽ, റീലിൽ നിന്ന് തന്നെ മുഴുവൻ സീരീസും കാണാനുള്ള ഓപ്ഷനും നിങ്ങൾക്ക് ലഭിക്കും. മെറ്റയുടെ പ്ലാറ്റ്‌ഫോമുകളിലെ മിനി- ഡ്രാമകളെയും പുതിയ സീരീസ് ഫീച്ചറിൽ ഉൾപ്പെടുത്തിയേക്കാം.
