ലോകമെമ്പാടുമുള്ള വിവിധ ഡെസ്റ്റിനേഷനുകളിലേക്ക് വമ്പന്‍ ഓഫറുകളുമായി എയര്‍ അറേബ്യ. ‘സൂപ്പര്‍ സീറ്റ് സെയില്‍’ എന്ന പേരില്‍ പ്രഖ്യാപിച്ച പുതിയ എര്‍ലി ബേര്‍ഡ് പ്രമോഷനില്‍, 500,000 സീറ്റുകള്‍ക്ക് പ്രത്യേക നിരക്കില്‍ ടിക്കറ്റുകള്‍ ലഭ്യമാകും. ടിക്കറ്റുകളുടെ തുടക്ക നിരക്ക് 129 ദിര്‍ഹം (സമാനമായ 2,942.8 ഇന്ത്യന്‍ രൂപ) മുതലാണ്.
2024 സെപ്റ്റംബര്‍ 30 മുതല്‍ 2024 ഒക്ടോബര്‍ 20 വരെയുള്ള കാലയളവില്‍ ടിക്കറ്റുകള്‍ ബുക്ക് ചെയ്യുന്നവര്‍ക്ക് ഈ ഓഫര്‍ ലഭ്യമാകും. 2025 മാര്‍ച്ച് 1 മുതല്‍ 2025 ഒക്ടോബര്‍ 25 വരെ ഈ ടിക്കറ്റുകള്‍ ഉപയോഗിച്ച് യാത്ര ചെയ്യാനാകും. ഷാര്‍ജ, അബുദാബി, റാസല്‍ഖൈമ എന്നിവിടങ്ങളില്‍ നിന്നുള്ള വിവിധ രാജ്യങ്ങളിലേക്കുള്ള സര്‍വീസുകളിലാണ് ഈ ഓഫര്‍. ഇന്ത്യയിലെ മുംബൈ, ദില്ലി, അഹമ്മദാബാദ്, ചെന്നൈ, കൊച്ചി, തിരുവനന്തപുരം, കോഴിക്കോട് തുടങ്ങി പ്രധാന നഗരങ്ങളിലേക്കുള്ള വിമാനങ്ങള്‍ക്കും ടിക്കറ്റ് നിരക്കില്‍ വന്‍ ഇളവുണ്ട്.
വിമാനത്താവള കണക്ഷനുകള്‍ യുഎഇയിലെ ഷാര്‍ജ, അബുദാബി, റാസല്‍ഖൈമ എന്നിവിടങ്ങളില്‍ നിന്നുള്ള നോണ്‍- സ്റ്റോപ്പ് സര്‍വീസുകള്‍ക്ക് പുറമേ, മൊറോക്കോ, ഈജിപ്ത് തുടങ്ങിയ രാജ്യങ്ങളിലെ പ്രധാന ഹബ്ബുകള്‍ വഴി 200ല്‍ അധികം റൂട്ടുകളിലേക്കാണ് എയര്‍ അറേബ്യയുടെ സേവനം.
അധിക ഡെസ്റ്റിനേഷനുകളില്‍ മിലാന്‍, വാഴ്‌സ, ക്രാക്കോവ്, ഏഥൻസ്, മോസ്‌കോ, ബാകു, റ്റ്ബിലിസി, അൾമാട്ടി എന്നിവിടങ്ങളും പ്രമോഷനില്‍ ഉള്‍പ്പെടുത്തിയിട്ടുണ്ട്. ടിക്കറ്റുകള്‍ എയര്‍ അറേബ്യയുടെ ഔദ്യോഗിക വെബ്സൈറ്റായ airarabia.com വഴി ബുക്ക് ചെയ്യാം.
