ഇന്ത്യയിലെ കോൺടാക്റ്റ്‌ലെസ് ഡിജിറ്റൽ പേമെന്റ് രംഗത്ത് വൻ മാറ്റങ്ങൾക്ക് തുടക്കമിട്ടുകൊണ്ട് ആപ്പിൾ പേ സേവനം ഔദ്യോഗികമായി രാജ്യത്ത് അവതരിപ്പിച്ചു. ഐഫോൺ, ഐപാഡ്, ആപ്പിൾ വാച്ച് ഉപയോക്താക്കൾക്ക് ഇനിമുതൽ ആപ്പിൾ പേ വഴി എളുപ്പത്തിൽ ഇടപാടുകൾ നടത്താൻ സാധിക്കും. നിലവിൽ ആക്സിസ് ബാങ്കിന്റെ വിസ, മാസ്റ്റർകാർഡ് ക്രെഡിറ്റ് കാർഡുകൾ മാത്രമാണ് ഈ സേവനത്തിനായി ഉപയോഗിക്കാൻ കഴിയുന്നത്. വൈകാതെ തന്നെ ഇന്ത്യയിലെ മാക് (Mac) ഉപകരണങ്ങളിലും ആപ്പിൾ പേ സൗകര്യം ലഭ്യമാക്കുമെന്ന് കമ്പനി വ്യക്തമാക്കിയിട്ടുണ്ട്.
ആപ്പിൾ പേ ഉപയോഗിച്ച് നടത്തുന്ന ക്രെഡിറ്റ് കാർഡ് ഇടപാടുകൾക്ക് പിൻ നമ്പറോ ഒടിപിയോ (OTP) നൽകേണ്ടതില്ല എന്നത് ഇതിന്റെ പ്രധാന സവിശേഷതയാണ്. എൻഎഫ്സി (NFC) സാങ്കേതികവിദ്യ വഴി പിഓഎസ് (POS) മെഷീനുകൾക്ക് സമീപം ഐഫോൺ വച്ച് വളരെ എളുപ്പത്തിൽ കോൺടാക്റ്റ്‌ലെസ് പേമെന്റുകൾ പൂർത്തിയാക്കാനാകും. ഉപയോക്താക്കൾക്ക് തങ്ങളുടെ യോഗ്യമായ ക്രെഡിറ്റ് കാർഡുകൾ ആക്സിസ് ബാങ്കിന്റെ ആപ്പ് വഴിയോ ഐഫോണിലെ ആപ്പിൾ വാലറ്റ് (Apple Wallet) വഴിയോ ആപ്പിൾ പേയിലേക്ക് ചേർക്കാവുന്നതാണ്. കൂടാതെ, കാർഡുകൾക്ക് ലഭിക്കുന്ന പതിവ് ആനുകൂല്യങ്ങളും റിവാർഡുകളും ആപ്പിൾ പേ വഴി നടത്തുന്ന ഇടപാടുകൾക്കും തുടർന്നും ലഭ്യമാകും.
ഉപയോക്താക്കളുടെ സാമ്പത്തിക ഡാറ്റയുടെ സുരക്ഷയ്ക്കായി മികച്ച ക്രമീകരണങ്ങളാണ് ആപ്പിൾ ഒരുക്കിയിരിക്കുന്നത്. ഉപയോക്താക്കളുടെ കാർഡ് നമ്പറുകൾ ഉപകരണത്തിലോ ആപ്പിളിന്റെ സെർവറുകളിലോ സൂക്ഷിക്കില്ലെന്ന് കമ്പനി വ്യക്തമാക്കിയിട്ടുണ്ട്. ഇതിന് പകരം, ഓരോ ഉപകരണത്തിനും പ്രത്യേകമായി നൽകുന്ന യൂണീക്ക് ഡിവൈസ് അക്കൗണ്ട് നമ്പറും (Device Account Number) എൻക്രിപ്ഷനും ഉപയോഗിച്ചാണ് പേമെന്റ് വിവരങ്ങൾ സുരക്ഷിതമായി കൈകാര്യം ചെയ്യുന്നത്. അതോടൊപ്പം വ്യക്തിഗത തിരിച്ചറിയൽ വിവരങ്ങൾ ആപ്പിൾ ശേഖരിക്കില്ലെന്നും, ഫോൺ നഷ്ടപ്പെട്ടാൽ പോലും പേമെന്റ് സൗകര്യം ദൂരത്തുനിന്ന് നിയന്ത്രിക്കാനും സുരക്ഷ ഉറപ്പാക്കാനും സാധിക്കുമെന്നും കമ്പനി ഉറപ്പുനൽകുന്നു.
ഇന്ത്യയിലെ പ്രമുഖ റീട്ടെയിലർമാരും വിവിധ സേവനദാതാക്കളും ആപ്പിൾ പേ വഴിയുള്ള പേമെന്റുകൾ സ്വീകരിച്ചു തുടങ്ങിയിട്ടുണ്ട്. ആപ്പിൾ സ്റ്റോറുകൾക്ക് പുറമേ ബ്ലിങ്കിറ്റ്, ചായോസ്, കോമെറ്റ്, ക്രോമ, ഇന്റർഫ്ലോറ, ഇക്സിഗോ, ലെ 15 പാറ്റിസറി, റിലയൻസ് ബ്രാൻഡുകൾ, ടാറ്റ 1 എംജി, സൊമാറ്റോ തുടങ്ങിയ പ്രമുഖ പ്ലാറ്റ്‌ഫോമുകളിലും കടകളിലും ഈ സേവനം ലഭ്യമാണ്. ഇത് ഉപയോക്താക്കൾക്ക് നിത്യജീവിതത്തിലെ വിവിധ ആവശ്യങ്ങൾക്ക് എളുപ്പത്തിൽ പേമെന്റ് നടത്താൻ അവസരമൊരുക്കുന്നു.
