വ്യായാമത്തിന് സമയം കണ്ടെത്താൻ ബുദ്ധിമുട്ടുന്നവർക്ക് ആശ്വാസകരമായ കണ്ടെത്തലുമായി പുതിയ ഗവേഷണം. ദിവസവും വെറും 5 മിനിറ്റ് നേരിയ ശാരീരിക പ്രവർത്തനങ്ങൾ പോലും ആരോഗ്യനില മെച്ചപ്പെടുത്തുകയും ആയുസ്സ് വർധിപ്പിക്കാനും സഹായിക്കുമെന്ന് പഠനം വ്യക്തമാക്കുന്നു.
പബ്ലിക് ഹെൽത് മേഖലയിലെ പുതിയ പഠനമാണ് ഈ നിഗമനത്തിലേക്ക് എത്തിയത്. യുകെ, യു.എസ്., സ്കാൻഡിനേവിയൻ രാജ്യങ്ങൾ എന്നിവിടങ്ങളിലെ ഏകദേശം 1.5 ദശലക്ഷം മുതിർന്നവരുടെ ആരോഗ്യ ഡാറ്റ വിശകലനം ചെയ്താണ് ഗവേഷകർ കണ്ടെത്തലുകൾ അവതരിപ്പിച്ചത്.
ഉൾഫ് എകെലുണ്ടിന്റെ നേതൃത്വത്തിലാണ് പഠനം നടത്തിയത്. ദിവസേന 5 മിനിറ്റ് വേഗത്തിലുള്ള നടത്തം, സൈക്ലിംഗ്, പടികൾ കയറൽ തുടങ്ങിയ ലഘു വ്യായാമങ്ങൾ പോലും അകാല മരണ സാധ്യത ഗണ്യമായി കുറയ്ക്കുന്നുവെന്ന് ഗവേഷകർ പറയുന്നു.
വിദഗ്ധർ ഈ ചെറിയ ശാരീരിക പ്രവർത്തനങ്ങളെ “വ്യായാമ ലഘുഭക്ഷണം” എന്നാണ് വിശേഷിപ്പിക്കുന്നത്. ദിവസം മുഴുവൻ ചെറിയ ഇടവേളകളിൽ ശരീരം ചലിപ്പിക്കുന്ന രീതിയാണ് ഇതിന്റെ ആശയം. അടുക്കളയിൽ നൃത്തം ചെയ്യൽ, വീട്ടുവൃത്തിയാക്കൽ തുടങ്ങിയവയും ഇതിൽ ഉൾപ്പെടുന്നു.
ഒരു ദിവസം 30 മിനിറ്റ് ഇരിപ്പുസമയം കുറയ്ക്കുന്നത് പോലും മരണ സാധ്യത ഏകദേശം 7 ശതമാനം വരെ കുറയ്ക്കുമെന്ന് പഠനം ചൂണ്ടിക്കാട്ടുന്നു. ഏത് തരത്തിലുള്ള വ്യായാമവും ഒന്നും ചെയ്യാത്തതിനെക്കാൾ ഗുണകരമാണെന്നും ഗവേഷകർ വ്യക്തമാക്കുന്നു.
ലോകാരോഗ്യ സംഘടനയുടെ ആഴ്ചയിൽ 150 മിനിറ്റ് വ്യായാമ നിർദ്ദേശം പാലിക്കാൻ കഴിയാത്തവർക്കും ഈ ചെറിയ ശീലങ്ങൾ ആരോഗ്യവും ആയുസ്സും മെച്ചപ്പെടുത്താൻ സഹായിക്കുമെന്ന് പഠനം പറയുന്നു.
