കേരളത്തിൽ ഒരേ സമയം തിരുവനന്തപുരം, തൃശൂര്, കോഴിക്കോട് ജില്ലകളില് നടത്തിയ പരിശോധനകളില് 2 ലക്ഷത്തിലധികം രൂപ വിലയുള്ള വ്യാജമരുന്നുകള് പിടിച്ചെടുത്തതായി റിപ്പോർട്ട്. ഡ്രഗ്സ് ഇന്റലിജന്സ് വിഭാഗത്തിന്റെ നേതൃത്വത്തില് ആണ് പരിശോധന നടന്നത്.
അതേസമയം വ്യാജ മരുന്നുകള് വില്ക്കുന്നവര്ക്കെതിരെ കര്ശന നടപടി സ്വീകരിക്കാന് ആരോഗ്യ വകുപ്പ് മന്ത്രി വീണാ ജോര്ജ് നിര്ദേശം നല്കിയിരുന്നു. ഇതിന്റെയടിസ്ഥാനത്തില് ഡ്രഗ്സ് കണ്ട്രോളറുടെ ഏകോപനത്തില് നടത്തി വന്നിരുന്ന പരിശോധനയിലാണ് ആസ്തമ രോഗികള് വ്യാപകമായി ഉപയോഗിച്ച് വരുന്ന, Cipla Ltd എന്ന കമ്പനിയുടെ SEROFLO Rotacaps 250 Inhaler-ന്റെ വ്യാജ മരുന്നുകള് കണ്ടെത്തിയത്.
അന്വേഷണം മറ്റ് സംസ്ഥാനങ്ങളിലേക്കും വ്യാപിപ്പിക്കും എന്നാണ് ലഭിക്കുന്ന വിവരം. പരിശോധനയില്, മതിയായ രേഖകള് ഇല്ലാതെ നിയമ വിരുദ്ധമായി മരുന്നുകള് സൂക്ഷിക്കുന്നത് കണ്ടെത്തുന്ന പക്ഷം പ്രസ്തുത സ്ഥാപനങ്ങളുടെ ഡ്രഗ് ലൈസന്സുകള് റദ്ദാക്കുന്നതാണെന്നും സംസ്ഥാന ഡ്രഗ്സ് കണ്ട്രോളര് അറിയിച്ചു.
