കുട്ടികളിലെ അലർജി ലക്ഷണങ്ങൾക്കും കഫക്കെട്ടിനും നൽകി വരുന്ന Almont-Kid Syrup-ൽ മാരകമായ എഥിലീൻ ഗ്ലൈക്കോൾ (EG) കലർന്നതായി കണ്ടെത്തി. തെലങ്കാന ഡ്രഗ്സ് കൺട്രോൾ അഡ്മിനിസ്ട്രേഷൻ (DCA) ഈ മരുന്നിന്റെ ഉപയോഗം ഉടനടി നിർത്താൻ കർശന നിർദ്ദേശം നൽകി. സെൻട്രൽ ഡ്രഗ്സ് സ്റ്റാൻഡേർഡ്സ് കൺട്രോൾ ഓർഗനൈസേഷൻ (CDSCO) നടത്തിയ സാമ്പിൾ പരിശോധനയിൽ വിഷാംശം സ്ഥിരീകരിച്ചതിനെത്തുടർന്നാണ് ഈ നടപടി.
കുട്ടികളിൽ മൂക്കൊലിപ്പ്, തുമ്മൽ, ചൊറിച്ചിൽ, വീക്കം തുടങ്ങിയ അലർജി പ്രശ്നങ്ങൾക്കായി വ്യാപകമായി ഉപയോഗിക്കുന്ന മരുന്നാണിത്. മരുന്നിന്റെ ഉപയോഗം ഉടനടി നിർത്തണമെന്നും, കൈവശമുള്ള സ്റ്റോക്കിനെക്കുറിച്ചുള്ള വിവരങ്ങൾ റീട്ടെയിലർമാർ, വിതരണക്കാർ, ആശുപത്രികൾ എന്നിവർ അധികൃതരെ അറിയിക്കണമെന്നും റിപ്പോർട്ടുകൾ വ്യക്തമാക്കുന്നു. പൊതുജനങ്ങളുടെ കൈവശം ഈ മരുന്ന് ഉണ്ടെങ്കിൽ അക്കാര്യം ഉദ്യോഗസ്ഥരെ അറിയിക്കാനും നിർദ്ദേശമുണ്ട്.
സാധാരണയായി ആന്റിഫ്രീസ് ലായനികളിലും ഡീ-ഐസിങ്ങ് ലായനികളിലും ഉപയോഗിക്കുന്ന നിറവും ഗന്ധവുമില്ലാത്ത ഒരു ദ്രാവകമാണിത്. ഇത് ശരീരത്തിൽ പ്രവേശിക്കുന്നത് അതീവ ഗുരുതരമായ ആരോഗ്യപ്രശ്നങ്ങൾക്ക് കാരണമാകുന്നു. വിഷബാധയേറ്റാൽ ആദ്യ 12 മണിക്കൂറിനുള്ളിൽ തലകറക്കം, വ്യക്തമല്ലാത്ത സംസാരം, ഓക്കാനം, ഛർദ്ദി എന്നിവ അനുഭവപ്പെടാം.
വിഷബാധയേറ്റ് സമയം കടന്നുപോകുംതോറും അതിന്റെ തീവ്രത വർദ്ധിക്കുന്നു. 12-36 മണിക്കൂറിൽ വിഷാംശം ഗ്ലൈക്കോളിക് ആസിഡായി മാറുകയും ഹൃദയമിടിപ്പ് വർദ്ധിപ്പിക്കാനും ഹൃദയസ്തംഭനത്തിനും കാരണമാകുന്നു. 36-72 മണിക്കൂറിൽ ശരീരത്തിൽ ഓക്സലേറ്റ് ക്രിസ്റ്റലുകൾ രൂപപ്പെടുകയും അത് വൃക്കകളെ സാരമായി ബാധിക്കുകയും ചെയ്യുന്നു. തലച്ചോറ്, നാഡീവ്യൂഹം, ശ്വാസകോശം എന്നീ അവയവങ്ങൾക്ക് സ്ഥിരമായ തകരാറുകൾ സംഭവിക്കാൻ ഈ വിഷാംശം കാരണമാകും.
എല്ലാ സിറപ്പുകളിലും എഥിലീൻ ഗ്ലൈക്കോൾ, ഡൈഎഥിലീൻ ഗ്ലൈക്കോൾ എന്നിവയുടെ സാന്നിധ്യം കണ്ടെത്താൻ പരിശോധനകൾ ശക്തമാക്കാൻ അധികൃതർ തീരുമാനിച്ചിട്ടുണ്ട്.