ഇന്ത്യയിലെ ഏറ്റവും അകലെയുള്ള ഗ്രാമങ്ങളിലും കുന്നിൻ പ്രദേശങ്ങളിലും ദ്വീപുകളിലും വരെ അതിവേഗ ഇന്റർനെറ്റ് എത്തിക്കാനുള്ള പുതിയ പദ്ധതിയുമായി റിലയൻസ് ജിയോ. രാജ്യത്തിനായി സ്വന്തമായൊരു ഉപഗ്രഹ ശൃംഖല (Satellite Constellation) വികസിപ്പിക്കുന്ന സാധ്യത കമ്പനി പരിശോധിക്കുകയാണെന്ന് ജിയോ ചെയർമാൻ ആകാശ് അംബാനി വ്യക്തമാക്കി.
ലോകമെമ്പാടും സാറ്റലൈറ്റ് അധിഷ്ഠിത ഇന്റർനെറ്റ് സേവനങ്ങൾ വേഗത്തിൽ വളരുന്ന സാഹചര്യത്തിലാണ് ജിയോയുടെ നീക്കം. ഭൂമിയോട് വളരെ അടുത്ത് ഭ്രമണം ചെയ്യുന്ന ലോ എർത്ത് ഓർബിറ്റ് (LEO) ഉപഗ്രഹങ്ങളുടെ ശൃംഖല രൂപീകരിക്കാനാണ് കമ്പനിയുടെ ആലോചന. നൂറുകണക്കിന് ഉപഗ്രഹങ്ങൾ ഉൾപ്പെടുന്ന ഈ സംവിധാനം നിലവിലെ പരമ്പരാഗത ഉപഗ്രഹ സേവനങ്ങളെക്കാൾ വേഗതയേറിയതും കുറഞ്ഞ ലാറ്റൻസിയുള്ളതുമായ ഇന്റർനെറ്റ് നൽകാൻ സഹായിക്കും.
പദ്ധതി യാഥാർഥ്യമായാൽ, എലോൺ മസ്കിന്റെ സ്റ്റാർലിങ്ക് പോലുള്ള ആഗോള സാറ്റലൈറ്റ് ഇന്റർനെറ്റ് സേവനങ്ങളുമായി മത്സരിക്കുന്ന കമ്പനികളുടെ നിരയിലാകും ജിയോയും ഇടം നേടുക. ഇതിനോടകം തന്നെ സാറ്റലൈറ്റ് കമ്മ്യൂണിക്കേഷൻ രംഗത്തെ സാന്നിധ്യം ശക്തിപ്പെടുത്തുന്ന ജിയോ, രാജ്യത്ത് ഗ്രൗണ്ട് സ്റ്റേഷനുകൾ സ്ഥാപിക്കുന്നതിലും ശ്രദ്ധ കേന്ദ്രീകരിക്കുന്നുണ്ട്. ഉപയോക്താക്കളെയും ഉപഗ്രഹങ്ങളെയും തമ്മിൽ ബന്ധിപ്പിക്കുന്ന പ്രധാന കണ്ണിയായിരിക്കും ഈ കേന്ദ്രങ്ങൾ.
ഗ്രാമപ്രദേശങ്ങൾ, വനമേഖലകൾ, മലനിരകൾ, ദ്വീപുകൾ തുടങ്ങിയ ഫൈബർ കേബിൾ എത്തിക്കാൻ പ്രയാസമുള്ള ഇടങ്ങളിൽ ഈ സാങ്കേതികവിദ്യ വലിയ മാറ്റമുണ്ടാക്കുമെന്നാണ് വിലയിരുത്തൽ. അതേസമയം, ദേശീയ സുരക്ഷ, ദുരന്തനിവാരണ പ്രവർത്തനങ്ങൾ, അടിയന്തര ആശയവിനിമയ സംവിധാനങ്ങൾ, പ്രതിരോധ ആവശ്യങ്ങൾ എന്നിവയ്ക്കും സ്വന്തം ഉപഗ്രഹ ശൃംഖല നിർണായക പിന്തുണ നൽകുമെന്ന് വിദഗ്ധർ ചൂണ്ടിക്കാട്ടുന്നു.
സ്വകാര്യ കമ്പനികളുടെ പങ്കാളിത്തം വർധിച്ച് ഇന്ത്യൻ ബഹിരാകാശ മേഖല പുതിയ വളർച്ചയുടെ പാതയിലൂടെയാണ് കടന്നുപോകുന്നത്. ഈ സാഹചര്യത്തിൽ ജിയോയുടെ ഉപഗ്രഹ ഇന്റർനെറ്റ് പദ്ധതി രാജ്യത്തിന്റെ ഡിജിറ്റൽ ഭാവിക്ക് പുതിയ ദിശ നൽകുമെന്ന പ്രതീക്ഷ ശക്തമാണ്. എന്നാൽ പദ്ധതി എപ്പോൾ യാഥാർഥ്യമാകുമെന്ന കാര്യത്തിൽ കമ്പനി ഇതുവരെ സമയപരിധി പ്രഖ്യാപിച്ചിട്ടില്ല.
