ഏതൊരു വാഹന പ്രേമികളുടെയും കുട്ടിക്കാല സ്വപ്നങ്ങളിലൊന്നാണ് ജീപ്പ്. യാത്രാ സൗകര്യങ്ങൾ വളരെ കുറഞ്ഞ ഹൈറേഞ്ച് ഗ്രാമങ്ങളിലെ ഏതൊരാവശ്യത്തിനും ഓടിയെത്തിയിരുന്ന മഹീന്ദ്രയുടെ കരുത്തൻ. കല്യാണ യാത്രയിൽ ഇവന്റെ പിന്നിൽ തൂങ്ങി നിന്ന് പോകാൻ ആഗ്രഹിക്കാത്ത ഒരാളുമുണ്ടാവില്ല. വാഹന നിർമ്മാണ ഭീമന്മാർ ഒരുപാടുനാൾ കിണഞ്ഞുപരിശ്രമിച്ചിട്ടും മഹീന്ദ്ര ജീപ്പിനോട് കിടപിടിക്കുന്ന ഒന്ന് അവതരിപ്പിക്കാൻ പോലും കഴിഞ്ഞിരുന്നില്ല. കാലം പലതുകഴിഞ്ഞെങ്കിലും പലതരം ഓഫ്റോഡ് വാഹനങ്ങൾ അവതരിച്ചെങ്കിലും ജീപ്പ് അതൊരു വികാരം തന്നെയാണ്.
മഹീന്ദ്ര വീണ്ടും പലവിധ നിർമ്മാണങ്ങൾ കൊണ്ടും വാഹന പ്രേമികളുടെ മനം കവർന്നു. ജീപ്പ്, കമാൻഡർ, സ്കോർപിയോ, ബൊലേറോ. XUV, ഥാർ, ഇങ്ങനെ നീളുന്നു പെരുമ. ഈ നിരയിലേക്കാണ് മഹീന്ദ്ര ഥാർ 5 ഡോർ അവതരിപ്പിക്കാനൊരുങ്ങുന്നത്. ഥാർ 3 ഡോർ ഇന്ത്യയിലാകെ ഉണ്ടാക്കിയ തരംഗം ആവർത്തിക്കാനാണ് മഹീന്ദ്ര ഇതിലൂടെ ലക്ഷ്യമിടുന്നത്. ഏറെ പ്രതീക്ഷയോടെ കാത്തിരിക്കുന്ന ഈ എസ്യുവിയുടെ ലോഞ്ച് ടൈംലൈൻ നിർമ്മാതാവ് ഒടുവിൽ പ്രഖ്യാപിച്ചു. മാരുതി ജിംനിയുടെ എതിരാളിയായ ഈ മോഡൽ 2024 ജൂണിൽ രാജ്യത്ത് അവതരിപ്പിക്കുമെന്നാണ് കമ്പനി പറയുന്നത്.
അഞ്ച് വാതിലുകളുള്ള ഥാറിന് തന്റെ ത്രീ-ഡോർ സഹോദരങ്ങളെ അപേക്ഷിച്ച് വലിയ വീൽബേസ് ഉണ്ടായിരിക്കും, അതിൻ്റെ ഫലമായി ക്യാബിനിനുള്ളിൽ കൂടുതൽ ഇടം ലഭിക്കും. ഇതിനുപുറമെ, പുതിയ ഫ്രണ്ട് റേഡിയേറ്റർ ഗ്രിൽ, DRL-കളുള്ള എൽഇഡി ഹെഡ്ലാമ്പുകൾ, വലിയ 18 ഇഞ്ച് അലോയ് വീലുകൾ, മൂന്നാം നിരയിൽ രണ്ട് സീറ്റുകൾ എന്നിവയും ലഭിക്കും.
ഈ വരാനിരിക്കുന്ന എസ്യുവിക്ക് വയർലെസ് മൊബൈൽ കണക്റ്റിവിറ്റി, സിംഗിൾ-പേൻ സൺറൂഫ്, ഡ്യുവൽ-സോൺ ക്ലൈമറ്റ് കൺട്രോൾ, ഡിജിറ്റൽ ഇൻസ്ട്രുമെന്റ് ക്ലസ്റ്റർ, 360-ഡിഗ്രി ക്യാമറ എന്നിവയുള്ള വലിയ ഇൻഫോടെയ്ൻമെൻറ് സ്ക്രീൻ എന്നിവ ലഭിക്കുമെന്ന് പുതിയ സ്പൈ ഷോട്ടുകൾ സ്ഥിരീകരിക്കുന്നു. പിൻഭാഗത്തുള്ള ആംറെസ്റ്റ്, മുൻവശത്തെ പാർക്കിംഗ് സെൻസറുകൾ, ഇലക്ട്രിക് ഫ്യൂവൽ ലിഡ് ഓപ്പണർ എന്നിവയും ഇവന്റെ പ്രൗഢി കൂട്ടുമെന്നുറപ്പാണ്.
മഹീന്ദ്ര ഥാർ അഞ്ച് ഡോർ പെട്രോൾ, ഡീസൽ പവർട്രെയിൻ ഓപ്ഷനുകളിൽ ലഭ്യമാകുമെന്നാണ് പ്രതീക്ഷിക്കുന്നത്. ഇതിൽ യഥാക്രമം 200bhp/380Nm, 172bhp/400Nm ടോർക്ക് ഉത്പാദിപ്പിക്കുന്ന 2.0-ലിറ്റർ ടർബോ-പെട്രോൾ, 2.2-ലിറ്റർ ഡീസൽ എഞ്ചിൻ എന്നിവ ഉൾപ്പെടുന്നു. ആറ് സ്പീഡ് മാനുവൽ ഗിയർബോക്സും ആറ് സ്പീഡ് ടോർക്ക് കൺവെർട്ടർ യൂണിറ്റും ട്രാൻസ്മിഷൻ ചുമതലകൾ കൈകാര്യം ചെയ്യാൻ സാധ്യതയുണ്ട്. 15 മുതൽ 16 ലക്ഷം വരെയാണ് ഇന്ത്യയിൽ പ്രതീക്ഷിക്കുന്ന വില.
