സംസ്ഥാനത്തെ സർക്കാർ കോളേജുകളിലെ ദീർഘകാല അധ്യാപക നിയമന പ്രതിസന്ധിക്ക് പരിഹാരം കാണുന്ന നിർണ്ണായക തീരുമാനങ്ങളാണ് സർക്കാർ കൈക്കൊണ്ടിരിക്കുന്നത്. അടുത്തിടെ 90 അസിസ്റ്റന്റ് പ്രൊഫസർ തസ്തികകൾ പിഎസ്‌സിക്ക് റിപ്പോർട്ട് ചെയ്യാൻ തീരുമാനിച്ചതിന് പിന്നാലെ, ആർട്‌സ് ആൻഡ് സയൻസ് കോളേജുകളിലായി 48 പുതിയ അധ്യാപക തസ്തികകൾ കൂടി സൃഷ്ടിക്കാൻ മന്ത്രിസഭായോഗം അനുമതി നൽകി. ഇതോടെ ആകെ 138 കോളേജ് അധ്യാപക തസ്തികകളിൽ ഉടൻ നിയമനം നടക്കുമെന്ന് വ്യക്തമായി.
പുതിയ കോഴ്‌സുകൾ ആരംഭിച്ച കോളേജുകൾക്ക് മുൻഗണന നൽകിയാണ് 48 അധ്യാപക തസ്തികകൾ അനുവദിച്ചത്. ആഴ്ചയിൽ കുറഞ്ഞത് 16 മണിക്കൂർ ജോലിഭാരമുള്ള വിഷയങ്ങളിലാണ് നിയമനങ്ങൾ നടക്കുക. പിഎസ്‌സി റാങ്ക് പട്ടികകളുടെ കാലാവധി അവസാനിക്കാനിരിക്കെ നിയമനങ്ങളിൽ ഉണ്ടായ താമസം ഉദ്യോഗാർത്ഥികൾക്കിടയിൽ വലിയ ആശങ്കയുണ്ടാക്കിയിരുന്നു. ഈ പശ്ചാത്തലത്തിൽ മാധ്യമ റിപ്പോർട്ടുകളെത്തുടർന്ന് മുഖ്യമന്ത്രി നേരിട്ട് ഇടപെട്ട് നടപടികൾ വേഗത്തിലാക്കുകയായിരുന്നു.
അധിക തസ്തികകൾ പുനർവിന്യസിച്ച ശേഷമാണ് 90 ഒഴിവുകൾ പിഎസ്‌സിക്ക് വിടാൻ ചൊവ്വാഴ്ച തീരുമാനമായത്. ഇതിന് തുടർന്നുള്ള ബുധനാഴ്ച ചേർന്ന മന്ത്രിസഭായോഗത്തിൽ പുതിയ തസ്തികകൾക്കും അംഗീകാരം ലഭിച്ചതോടെ, ഉന്നത വിദ്യാഭ്യാസ രംഗത്തെ ഒഴിവുകൾ നികത്തുന്നതിൽ ശ്രദ്ധേയമായ മുന്നേറ്റമാണ് ഉണ്ടായിരിക്കുന്നത്. സർക്കാർ കോളേജുകളിലെ അധ്യയന നിലവാരം ഉയർത്തുന്നതിനും റാങ്ക് ലിസ്റ്റിൽ ഉൾപ്പെട്ട ഉദ്യോഗാർത്ഥികൾക്ക് തൊഴിൽ ഉറപ്പാക്കുന്നതിനും ഈ തീരുമാനം നിർണായകമാകുമെന്ന് വിലയിരുത്തപ്പെടുന്നു.
