ജനപ്രിയ ടാക്സി ആപ്പായ ഉബറിൽ പുതിയ സേവനങ്ങൾ വരുന്നു. മുമ്പ് കാറുകൾ, ഓട്ടോകൾ, ബൈക്കുകൾ എന്നിവ മാത്രമേ ബുക്ക് ചെയ്യാൻ കഴിയൂവെങ്കിലും, ഹെലികോപ്റ്റർ ബുക്കിംഗ് സേവനവും ലഭ്യമാക്കുമെന്ന് കമ്പനി അടുത്തിടെ പ്രഖ്യാപിച്ചു. എന്നാൽ , ഈ സേവനം ഇറ്റലിയിൽ മാത്രമേ ലഭ്യമാക്കുന്നുള്ളൂ എന്ന് അവർ പറഞ്ഞു. സമീപകാലത്ത് വിനോദസഞ്ചാരികളുടെ തിരക്ക് വർദ്ധിച്ചതിനാൽ, ഇറ്റലിയിലെ അമാൽഫി തീരത്ത് ഗതാഗതം വളരെയധികം കൂടുകയുണ്ടായി .
ചെറിയ ദൂരം പോലും സഞ്ചരിക്കാൻ വളരെയധികം സമയമെടുക്കുന്നു. ഈ ഗതാഗത പ്രശ്നം പരിഹരിക്കുന്നതിനും വിനോദസഞ്ചാരികൾക്ക് ഒരു പുതിയ അനുഭവം പരിചയപ്പെടുത്തുന്നതിനും ഹെലികോപ്റ്റർ, ബോട്ട് സർവീസുകൾ ലഭ്യമാക്കുമെന്ന് ഉബർ പറഞ്ഞു. ധാരാളം വിനോദസഞ്ചാരികളെ ആകർഷിക്കുന്ന അമാൽഫി തീരത്ത് ഗതാഗത പ്രശ്‌നങ്ങളില്ലാതെ സുഖകരമായി യാത്ര ചെയ്യുന്നതിന് ഈ സേവനങ്ങൾ വളരെ ഉപയോഗപ്രദമാകുമെന്ന് ഉബർ പ്രതീക്ഷിക്കുന്നു.
ജൂലൈ 26 മുതൽ ഓഗസ്റ്റ് 23 വരെ സോറന്റോയ്ക്കും കാപ്രിക്കും ഇടയിൽ ‘ഉബർ കോപ്റ്റർ’ എന്ന പ്രത്യേക ഹെലികോപ്റ്റർ സർവീസുകൾ പ്രവർത്തിക്കും. യാത്രക്കാർ ഉബർ ആപ്പിൽ 48 മണിക്കൂർ മുൻകൂട്ടി ബുക്ക് ചെയ്യേണ്ടിവരും. ശനി, ഞായർ ദിവസങ്ങളിൽ മാത്രമേ ഈ സേവനങ്ങൾ ലഭ്യമാകൂ. സോറന്റോയിൽ നിന്ന് രാവിലെ 9 മണിക്ക് ഹെലികോപ്റ്റർ പുറപ്പെട്ട് വൈകുന്നേരം 5 മണിക്ക് കാപ്രിയിൽ നിന്ന് തിരിച്ചെത്തും. രണ്ട് പൈലറ്റുമാർ സർവീസ് നടത്തുന്ന ഹെലികോപ്റ്ററിൽ ഒരേസമയം ആറ് പേരെ വഹിക്കാൻ കഴിയും.
ഒരാൾക്ക് ഏകദേശം 24,450 രൂപ (250 യൂറോ) യാത്രാ ചെലവ് കണക്കാക്കുന്നു. ഹെലിപാഡിലേക്കും തിരിച്ചുമുള്ള ഗതാഗതവും പാക്കേജിൽ ഉൾപ്പെടും. കൂടാതെ, ജൂലൈ 26 നും ഓഗസ്റ്റ് 24 നും ഇടയിൽ ഇറ്റലിയിൽ ഉബർ ‘ഉബർ ബോട്ട്’ സർവീസ് ആരംഭിക്കും. വിനോദസഞ്ചാരികൾക്ക് സോറന്റോ മറീനയിൽ നിന്ന് ഇറ്റാലിയൻ ഗോസോ 35 ബോട്ടുകളിൽ യാത്ര ചെയ്ത് തീരപ്രദേശത്തിന്റെ ഭംഗി ആസ്വദിക്കാം. 12 പേർക്ക് വരെ സ്വകാര്യ ചാർട്ടറുകളും ലഭ്യമാണ്.
