പൊതുവിദ്യാലയങ്ങളില് കേരള ഇന്ഫ്രാസ്ട്രക്ചര് ആന്റ് ടെക്നോളജി ഫോര് എഡ്യൂക്കേഷന് (കൈറ്റ്) നടപ്പിലാക്കിവരുന്ന ലിറ്റില് കൈറ്റ്സ് ഐ.ടി ക്ലബ്ബിലേക്ക് ഈ വര്ഷത്തെ എട്ടാം ക്ലാസ് വിദ്യാര്ത്ഥികളില് നിന്ന് അംഗങ്ങളെ തെരഞ്ഞെടുക്കുന്നതിന് നടന്ന അഭിരുചി പരീക്ഷയുടെ ഫലം പ്രസിദ്ധപ്പെടുത്തി. പരീക്ഷാഫലം സ്കൂളിൻ്റെ ലിറ്റില് കൈറ്റ്സ് പോര്ട്ടലിലെ ലോഗിനില് ലഭ്യമാണ്.
2092 യൂണിറ്റുകളില് നിന്നായി 1.8 ലക്ഷം വിദ്യാര്ത്ഥികളാണ് പരീക്ഷ എഴുതിയത്. ഇവരില് 2033 യൂണിറ്റുകളില് നിന്നുള്ള 70827 വിദ്യാര്ത്ഥികളെ ആണ് ലിറ്റില് കൈറ്റ്സ് അംഗങ്ങളായി തെരഞ്ഞെടുത്തിട്ടുള്ളത്. ഇതില് 36105 ആണ്കുട്ടികളും 34722 പെണ്കുട്ടികളുമാണ്.
തെരഞ്ഞെടുക്കപ്പെട്ട വിദ്യാര്ത്ഥികള്ക്ക് അനിമേഷന്, പ്രോഗ്രാമിംഗ്, മൊബൈല് ആപ്പ് നിര്മാണം, ഗ്രാഫിക്സ് ഡിസൈനിംഗ്, മലയാളം കമ്പ്യൂട്ടിംഗ്, ഹാര്ഡ്വെയര്, ഇലക്ട്രോണിക്സ്, ഐഒടി, റോബോട്ടിക്സ്, സൈബര് സുരക്ഷ തുടങ്ങിയ മേഖലകളില് വിദഗ്ദ പരിശീലനം നല്കും. ലിറ്റില് കൈറ്റ്സ് പ്രവര്ത്തനങ്ങളില് ‘എ ഗ്രേഡ്’ ലഭിക്കുന്ന കുട്ടികള്ക്ക് എസ്.എസ്.എല്.സി പരീക്ഷയില് ഗ്രേസ് മാര്ക്ക് നല്കി വരുന്നുണ്ട്.
പുതുക്കിയ പാഠപുസ്തകങ്ങളില് ഉള്പ്പെടുത്തിയിട്ടുള്ള റോബോട്ടിക്സുമായി ബന്ധപ്പെട്ട പ്രവര്ത്തനങ്ങളില് ലിറ്റില് കൈറ്റ്സ് അംഗങ്ങളല്ലാത്ത മറ്റു വിദ്യാര്ത്ഥികള്ക്കും ലിറ്റില് കൈറ്റ്സ് അംഗങ്ങളുടെ നേതൃത്വത്തില് പരിശീലനം നല്കും. ഇതിനായി 29000 റോബോട്ടിക് കിറ്റുകള് പൊതുവിദ്യാലയങ്ങള്ക്ക് വിതരണം ചെയ്തു കഴിഞ്ഞു.
വാർത്തകൾക്ക് ഗ്രൂപ്പിൽ ചേരാം:
