ധനുഷും അക്കിനേനി നാഗാർജുനയും പ്രധാന വേഷങ്ങളിൽ അഭിനയിച്ച ‘കുബേര’ ബോക്സ് ഓഫീസിൽ വൻ വിജയമാണ് നേടിയത്. ജൂൺ 20 ന് പ്രദർശനത്തിനെത്തിയ ചിത്രം റിലീസ് ചെയ്തതിനുശേഷം കളക്ഷന്റെ കാര്യത്തിൽ കുതിച്ചുയരുകയാണ്. ചിത്രത്തിന്റെ നിർമ്മാണ സംഘം വെളിപ്പെടുത്തിയ ഏറ്റവും പുതിയ വിവരങ്ങൾ അനുസരിച്ച്, ‘കുബേര’ ഇതുവരെ ലോകമെമ്പാടുമായി 100 കോടിയിലധികം രൂപ നേടിയതായി കണക്കാക്കപ്പെടുന്നു. ഈ അവസരത്തിൽ, തങ്ങളുടെ ചിത്രത്തെ വളരെയധികം പിന്തുണച്ചതിന് പ്രേക്ഷകരോട് ചിത്രീകരണ യൂണിറ്റ് നന്ദി പറഞ്ഞു.
ഈ ചിത്രത്തിൽ ധനുഷ് ‘ദേവ’ എന്ന കഥാപാത്രത്തെയും നാഗാർജുന ‘ദീപക്’ എന്ന കഥാപാത്രത്തെയും അവതരിപ്പിച്ചു. ഒരു യാചകനായി ധനുഷിന്റെ അത്ഭുതകരമായ പ്രകടനത്തെ എല്ലായിടത്തും പ്രശംസിക്കുന്നുണ്ട്. ലോകത്തിലെ ഏറ്റവും ധനികരിൽ ഒരാളും തെരുവിൽ താമസിക്കുന്ന ഒരു ദരിദ്രനും തമ്മിലുള്ള സംഘർഷമാണ് ചിത്രത്തിന്റെ പ്രധാന ഇതിവൃത്തം. രശ്മിക മന്ദാന അഭിനയിക്കുന്ന ചിത്രം മൂന്ന് മണിക്കൂറിലധികം ദൈർഘ്യമുള്ളതാണ്.
ഒരു നടനെന്ന നിലയിൽ ധനുഷ് സമീപകാലത്ത്നി രവധി വിജയങ്ങൾ നേടിയിട്ടുണ്ട്. കോവിഡ് പാൻഡെമിക്കിന് ശേഷം ധനുഷിന്റെ നാല് സിനിമകൾ 100 കോടി ക്ലബ്ബിൽ പ്രവേശിച്ചു . ‘തിരു’, ‘സാർ’, ‘റയാൻ’ എന്നീ ചിത്രങ്ങളുടെ നിരയിലേക്ക് ഇപ്പോൾ ‘കുബേര’യും എത്തിയിരിക്കുന്നു. ധനുഷ് തന്നെ സംവിധാനം ചെയ്ത് 100 കോടി ബജറ്റിൽ നിർമ്മിച്ച ‘റയാൻ’ 150 കോടി രൂപ വരെ കളക്ഷൻ നേടിയിട്ടുണ്ടെന്നാണ് ട്രേഡ് വൃത്തങ്ങൾ കണക്കാക്കുന്നത്.
