അടുക്കളയിൽ തിരക്കിട്ട് പാചകം ചെയ്തുകൊണ്ടിരിക്കുകയാണെന്ന് സങ്കൽപ്പിക്കുക. സ്റ്റൗവിലിരിക്കുന്ന ചൂടുള്ള ദോശക്കല്ലിൽ അറിയാതെ നിങ്ങളുടെ കൈ തട്ടുന്നു. എന്താണ് സംഭവിച്ചതെന്ന് തലച്ചോറ് തിരിച്ചറിയുന്നതിനും മുൻപേ തന്നെ നിങ്ങൾ കൈ പിന്നോട്ടുവലിച്ചിട്ടുണ്ടാകും. ചിന്തകൾക്ക് കാത്തുനിൽക്കാതെ ശരീരം സ്വയം നടത്തുന്ന ഈ പ്രതികരണത്തെയാണ് നമ്മൾ ‘റിഫ്ലെക്സുകൾ’ എന്ന് വിളിക്കുന്നത്.
കാലങ്ങളായി മനുഷ്യർക്കും മറ്റ് ജീവികൾക്കും മാത്രം സ്വന്തമായിരുന്ന ഈ അത്ഭുതകരമായ കഴിവ് ഇപ്പോൾ റോബോട്ടുകൾക്കും കൈവന്നിരിക്കുകയാണ്. സ്പർശനവും വേദനയും തിരിച്ചറിയാൻ ശേഷിയുള്ള നൂതനമായ കൃത്രിമ ചർമ്മം (E-Skin) വികസിപ്പിച്ചെടുത്തതോടെ റോബോട്ടുകളുടെ ലോകം മറ്റൊരു വിപ്ലവത്തിന് സാക്ഷ്യം വഹിക്കുകയാണ്.
മനുഷ്യനാഡീവ്യവസ്ഥയിൽ നിന്നുള്ള പ്രചോദനം നമ്മുടെ തൊലിപ്പുറത്ത് ഒരു പൊള്ളലോ പരിക്കോ ഉണ്ടാകുമ്പോൾ ആ വേദനയുടെ സിഗ്നലുകൾ സെൻസറുകൾ വഴി നേരെ നട്ടെല്ലിലേക്കാണ് എത്തുന്നത്. തലച്ചോറിൽ എത്തി വിശകലനം ചെയ്ത് ഉത്തരവ് വരുന്നത് വരെ കാത്തുനിൽക്കാത്തതുകൊണ്ടാണ് അതിവേഗത്തിൽ പ്രതികരിക്കാൻ നമുക്ക് സാധിക്കുന്നത്. മനുഷ്യശരീരത്തിലെ ഈ സങ്കീർണ്ണമായ നാഡീവ്യവസ്ഥയിൽ നിന്ന് പ്രചോദനം ഉൾക്കൊണ്ടാണ് ഗവേഷകർ പുതിയ തരം റോബോട്ടിക് ചർമ്മത്തിന് രൂപം നൽകിയിരിക്കുന്നത്.
നിലവിൽ റോബോട്ടുകളിൽ ഉപയോഗിക്കുന്ന മിക്ക ഇലക്ട്രോണിക് ചർമ്മങ്ങൾക്കും കേവലം മർദ്ദം (Pressure) തിരിച്ചറിയുന്നത് പോലുള്ള ലളിതമായ ജോലികൾ മാത്രമേ ചെയ്യാൻ കഴിയൂ എന്ന് ഹോങ്കോങ്ങിലെ സിറ്റി സർവ്വകലാശാലയിലെ ഗവേഷകർ ചൂണ്ടിക്കാണിക്കുന്നു. എന്നാൽ, പുതുതായി വികസിപ്പിച്ച ‘ന്യൂറോമോർഫിക് റോബോട്ടിക് ഇ-സ്കിൻ’ (Neuromorphic Robotic E-Skin) മനുഷ്യന്റെ സ്പർശനശേഷിയെയും വേദനയറിയാനുള്ള കഴിവിനെയും അസാമാന്യമായി അനുകരിക്കുന്നു.
ഈ കൃത്രിമ ചർമ്മം എങ്ങനെയാണ് പ്രവർത്തിക്കുന്നതെന്നത് കൗതുകകരമാണ്. സ്പർശനത്തിലൂടെ ലഭിക്കുന്ന വിവരങ്ങൾ ആദ്യം ഒരു സോഫ്റ്റ്വെയറിലേക്കാണ് അയക്കപ്പെടുന്നത്. അവിടെ വെച്ച് ഈ സിഗ്നലുകൾ ഘട്ടം ഘട്ടമായി വിശകലനം ചെയ്യപ്പെടുന്നു. തുടർന്ന്, ഈ സിഗ്നലുകളെ മനുഷ്യനാഡികളിലെ പൾസുകൾക്ക് സമാനമായ ന്യൂറൽ പൾസുകളാക്കി (Neural-like pulses) മാറ്റുന്നു.
റോബോട്ടിന്റെ ചർമ്മത്തിൽ എവിടെയെങ്കിലും വേദനയോ പരിക്കോ അനുഭവപ്പെട്ടാൽ, ഈ സംവിധാനം ഉടൻതന്നെ അതിന്റെ സംരക്ഷണ റിഫ്ലെക്സുകളെ (Protective reflexes) സജീവമാക്കുന്നു. ഇത് റോബോട്ടിനെ അപകടങ്ങളിൽ നിന്ന് സ്വയം പിന്മാറാനോ പരിക്കേൽക്കാതെ നോക്കാനോ സഹായിക്കുന്നു. ഇത്തരം സംവിധാനങ്ങൾ ഉള്ളതുകൊണ്ട് തന്നെ, കേടുപാടുകൾ സംഭവിക്കുന്ന ഭാഗങ്ങൾ വളരെ വേഗത്തിൽ കണ്ടെത്താനും അവ മാറ്റിസ്ഥാപിക്കാനും സാധിക്കുമെന്ന് ഗവേഷകർ അവകാശപ്പെടുന്നു.
റോബോട്ടുകൾ വെറും യന്ത്രങ്ങൾ എന്ന നിലയിൽ നിന്ന് മാറി, ചുറ്റുപാടുകളോട് വൈകാരികമായും ഭൗതികമായും പ്രതികരിക്കുന്ന ഒന്നായി മാറുന്നതിന്റെ സൂചനയാണിത്. പണ്ട് റോബോട്ടുകൾക്ക് സ്പർശനം തിരിച്ചറിയാൻ കഴിയാത്തതിനാൽ അവയ്ക്ക് നൽകുന്ന നിർദ്ദേശങ്ങൾക്കപ്പുറം പ്രവർത്തിക്കാൻ പ്രയാസമായിരുന്നു. എന്നാൽ വേദനയും മുറിവും തിരിച്ചറിയുന്ന ഇ-സ്കിൻ വരുന്നതോടെ, മനുഷ്യരുമായി കൂടുതൽ സുരക്ഷിതമായി ഇടപഴകാൻ റോബോട്ടുകൾക്ക് സാധിക്കും. ഉദാഹരണത്തിന്, ഒരു ശസ്ത്രക്രിയയിലോ അല്ലെങ്കിൽ വീട്ടിലെ ജോലികളിലോ ഏർപ്പെടുമ്പോൾ തങ്ങൾക്കും മറ്റുള്ളവർക്കും അപകടം സംഭവിക്കാതെ ശ്രദ്ധിക്കാൻ ഈ ‘റിഫ്ലെക്സ്’ അവയെ സഹായിക്കും.
