വടക്കൻ പേർഷ്യൻ ഗൾഫിൽ യുഎസിന്റെ എണ്ണക്കപ്പലിന് നേരെ തങ്ങൾ ആക്രമണം നടത്തിയെന്ന് ഇറാന്റെ സായുധസേനയായ ഐആർജിസി (IRGC) അവകാശപ്പെട്ടു. 2026 മാർച്ച് 5 വ്യാഴാഴ്ച രാവിലെ നടന്ന ഈ ആക്രമണത്തിന് പിന്നാലെ കപ്പലിന് തീപ്പിടിച്ചതായും ഐആർജിസി വ്യക്തമാക്കിയിട്ടുണ്ട്. തങ്ങളുടെ വ്യോമസേനയാണ് യുഎസ് കപ്പലിനെ ലക്ഷ്യം വെച്ചതെന്നാണ് ഇറാന്റെ അവകാശവാദം.
കഴിഞ്ഞ ദിവസം ശ്രീലങ്കൻ പുറംകടലിൽ വെച്ച് ഇറാന്റെ ‘ഇറിസ് ദേന’ എന്ന യുദ്ധക്കപ്പൽ യുഎസ് അന്തർവാഹിനി ഉപയോഗിച്ച് മുക്കിയതിനുള്ള തിരിച്ചടിയായാണ് ഈ നീക്കത്തെ ഇറാൻ വിശേഷിപ്പിക്കുന്നത്. ആ ആക്രമണത്തിൽ 87 ഇറാനിയൻ നാവികർ കൊല്ലപ്പെട്ടിരുന്നു. ഇറാന്റെ യുദ്ധക്കപ്പൽ മുക്കിയതിന് അമേരിക്ക അത്യധികം ഖേദിക്കേണ്ടിവരുമെന്ന് ഇറാന്റെ വിദേശകാര്യമന്ത്രി ഇതിനോടകം മുന്നറിയിപ്പ് നൽകിയിട്ടുണ്ട്.
അമേരിക്കയുടെയും ഇസ്രയേലിന്റെയും യൂറോപ്യൻ രാജ്യങ്ങളുടെയും പതാകയുള്ള സൈനിക-വാണിജ്യ കപ്പലുകളെ ഇനി ഈ മേഖലയിലൂടെ കടന്നുപോകാൻ അനുവദിക്കില്ലെന്ന കടുത്ത നിലപാടിലാണ് ഐആർജിസി. ഹോർമുസ് കടലിടുക്ക് ഉൾപ്പെടെയുള്ള പാതകളിലൂടെയുള്ള ഗതാഗതം നിയന്ത്രിക്കാൻ യുദ്ധസമയത്ത് അന്താരാഷ്ട്ര നിയമമനുസരിച്ച് തങ്ങൾക്ക് അധികാരമുണ്ടെന്ന് അവർ വാദിക്കുന്നു. നിലവിൽ ഇത്തരം കപ്പലുകളെ ഇറാൻ നിരീക്ഷിച്ചു വരികയാണെന്നും അവരെ ഇനിയും ആക്രമിക്കുമെന്നും ഐആർജിസി തസ്നിം ന്യൂസ് ഏജൻസിയോട് വ്യക്തമാക്കി.
സംഘർഷം മുറുകിയതോടെ ഇറാൻ ഹോർമുസ് കടലിടുക്ക് അടച്ചത് അയൽരാജ്യങ്ങളെയും ബാധിച്ചിട്ടുണ്ട്. ഇതിന്റെ ഫലമായി പാകിസ്താനിൽ ഇന്ധന പ്രതിസന്ധി രൂക്ഷമാകുകയും പലയിടങ്ങളിലും വർക്ക് ഫ്രം ഹോം സംവിധാനം ഏർപ്പെടുത്തുകയും ചെയ്തതായി റിപ്പോർട്ടുകളുണ്ട്. പശ്ചിമേഷ്യയിൽ യുദ്ധസാഹചര്യം നിലനിൽക്കുന്ന സാഹചര്യത്തിൽ ഈ ആക്രമണം മേഖലയിലെ സമാധാനശ്രമങ്ങൾക്ക് വലിയ തിരിച്ചടിയാണ്.
