രാജ്യത്തെ കാര്‍ഷിക മേളകളില്‍ താരമായി ഹരിയാനയില്‍ നിന്നെത്തിച്ച 1500 കിലോ ഭാരമുള്ള ഭീമന്‍ പോത്ത് ‘അന്‍മോല്‍’. മേളയിലെമ്പാടും നിരവധിപ്പേര്‍ തേടിയെത്തിയ അന്‍മോലിന് 23 കോടി രൂപയാണ് വിലയിട്ടിരിക്കുന്നത്. ടൈംസ് ഓഫ് ഇന്ത്യയാണ് വാര്‍ത്ത റിപ്പോര്‍ട്ട് ചെയ്യുന്നത്.
രണ്ട് റോള്‍സ് റോയ്‌സ് കാറുകളുടേയും പത്ത് ബെന്‍സ് കാറുകളുടെ വില നല്‍കാമെന്ന് വാഗ്ദാനം നല്‍കിയിട്ടും സഹോദരനെ പോലെ കരുതുന്ന അന്‍മോലിനെ വില്‍ക്കാന്‍ തയ്യാറല്ലെന്നാണ് അന്‍മോലിന്റെ ഉടമ ഗില്‍ വിശദമാക്കുന്നത്.
പരിപാലനം വന്‍ ചെലവാണ് വരുത്തുന്നതെങ്കിലും അന്‍മോലിനെ വില്‍ക്കാന്‍ ഉടമയായ ഗില്‍ തയ്യാറല്ല. ആഴ്ചയില്‍ രണ്ട് തവണയാണ് അന്‍മോലിന്റെ ബീജം ശേഖരിക്കുന്നത്. അന്‍മോലിന്റെ ബീജം മാത്രം വിറ്റ് 5 ലക്ഷം രൂപയാണ് മാസം വരുമാനം ലഭിക്കുന്നതെന്നാണ് ഗില്‍ വിശദമാക്കുന്നത്.
ദിവസേന 1500 രൂപയിലേറെയാണ് അന്‍മോലിന്റെ ഭക്ഷണത്തിനായി ചെലവിടുന്നത്. ഡ്രൈ ഫ്രൂട്ട്‌സും കലോറി നിറഞ്ഞ ഭക്ഷണവുമാണ് അന്‍മോലിന്റെ പ്രത്യേക ഡയറ്റ്. 250 ഗ്രാം ബദാം, 4 കിലോ മാതള നാരങ്ങ, 30 വാഴപ്പഴം, 5 കിലോ പാല്‍, 20 മുട്ട എന്നിവയ്ക്ക് പുറമേ ഓയില്‍ കേക്ക്, നെയ്യ്, സോയാ ബീന്‍, ചോളം എന്നിവയും അടങ്ങുന്നതാണ് അന്‍മോലിന്റെ ഡയറ്റ്.
ലുക്കിലെ ആകര്‍ഷണത്തിന് പുറമേ അന്‍മോലിന്റെ ബീജം തേടി മേളയിലെത്തുന്ന ക്ഷീര കര്‍ഷകരും ഏറെയാണ്. എട്ട് വയസാണ് അന്‍മോലിന്റെ പ്രായം. ഹരിയാനയിലെ സിര്‍സയാണ് അന്‍മോലിന്റെ സ്വദേശം.നേരത്തെ മീററ്റില്‍ നടന്ന ഓള്‍ ഇന്ത്യ ഫാര്‍മേഴ്‌സ് സമ്മേളനത്തിലും അന്‍മോല്‍ തരംഗമായിരുന്നു.
