ഉക്രൈൻ ആക്രമണത്തിനിടെ പാക് പ്രധാനമന്ത്രി ഇമ്രാന്‍ ഖാന്റെ റഷ്യന്‍ സന്ദര്‍ശനത്തിന് അമേരിക്കയുടെ ശക്തമായ മറുപടി. കള്ളപ്പണം വെളുപ്പിക്കാന്‍ ശ്രമിച്ച കാരണത്താൽ നാഷണല്‍ ബാങ്ക് ഒഫ് പാകിസ്ഥാന് (എന്‍ബിപി) യുഎസ് 55 മില്യണ്‍ ഡോളറാണ് പിഴ ചുമത്തിയത്.
നിലവിലെ സാഹചര്യത്തിൽ പാക് സമ്പദ്വ്യവസ്ഥയ്ക്ക് താങ്ങാനാവാത്ത നടപടിയാണ് അമേരിക്കയുടെ ഭാഗത്ത് നിന്നുമുണ്ടായിരിക്കുന്നത്. കള്ളപ്പണം വെളുപ്പിക്കലിലെ നിയമങ്ങള്‍ പാലിക്കാതിരുന്നതിനാലാണ് ന്യൂയോര്‍ക്കില്‍ പ്രവര്‍ത്തിക്കുന്ന നാഷണല്‍ ബാങ്ക് ഒഫ് പാകിസ്ഥാന് യുഎസ് 55 മില്യണ്‍ യുഎസ് ഡോളര്‍ പിഴ ചുമത്തിയത്.
പാകിസ്ഥാൻ സെന്‍ട്രല്‍ ബാങ്കായ സ്റ്റേറ്റ് ബാങ്ക് ഒഫ് പാകിസ്ഥാന്റെ അനുബന്ധ സ്ഥാപനമാണ് എന്‍ബിപി. ബാങ്കിന്റെ ന്യൂയോര്‍ക്കിൽ പ്രവർത്തിക്കുന്ന ശാഖയില്‍ ഗുരുതരമായ ക്രമക്കേടുകള്‍ കണ്ടെത്തിയിട്ടുണ്ട്. സാമ്പത്തിക നിയന്ത്രണ മുന്നറിയിപ്പുകള്‍ അവഗണിച്ചുവെന്നും, കള്ളപ്പണം വെളുപ്പിക്കല്‍ വിരുദ്ധ നിയന്ത്രണങ്ങള്‍ നിലനിര്‍ത്തുന്നതില്‍ പരാജയപ്പെട്ടുവെന്നും അമേരിക്ക ആരോപിക്കുന്നു.
തുടർച്ചയായി നൽകിയ പല മുന്നറിയിപ്പുകളും അധികൃതര്‍ അവഗണിച്ചു. എന്തായാലും നാഷണല്‍ ബാങ്ക് ഓഫ് പാകിസ്ഥാന് പിഴ ചുമത്തിയ അമേരിക്കയുടെ നടപടി പാകിസ്ഥാന് എഫ്എടിഎഫിന്റെ (ഫിനാന്‍ഷ്യല്‍ ആക്ഷന്‍ ടാസ്‌ക് ഫോഴ്‌സ്) അടുത്ത യോഗത്തില്‍ തിരിച്ചടിയാകും. ഭീകരവാദ പ്രവര്‍ത്തനങ്ങള്‍ക്ക് സാമ്പത്തിക സഹായം നല്‍കുന്നതിനാല്‍ ഇപ്പോള്‍ പാകിസ്ഥാന് എഫ്എടിഎഫിന്റെ ഗ്രേ ലിസ്റ്റിലാണുള്ളത്. ഇത് ബ്ലാക്ക് ലിസ്റ്റിലാകാനുള്ള സാധ്യത വര്‍ധിപ്പിക്കുന്നതാണ് എന്‍ ബി പിക്കെതിരെയുള്ള നടപടി.
