വീഡിയോ കോൾ ചെയ്യുമ്പോൾ വെളിച്ചക്കുറവ് കാരണം മുഖം വ്യക്തമായി കാണാനാകാത്ത പ്രശ്‌നം പരിഹരിക്കാനൊരുങ്ങി വാട്ട്സ്ആപ്പ്. ‘ലോ ലൈറ്റ് മോഡ്’ എന്ന പുതിയ ഫീച്ചറാണ് ഇത് സംബന്ധിച്ച് വാട്ട്സ്ആപ്പ് അവതരിപ്പിച്ചത്. കുറഞ്ഞ വെളിച്ചമുള്ള സാഹചര്യങ്ങളിലും വീഡിയോ കോൾ ചെയ്യാൻ ഈ മോഡ് സഹായിക്കും.
വാട്ട്സ്ആപ്പിൽ വീഡിയോ കോൾ ചെയ്യുമ്പോൾ സ്‌ക്രീൻ്റെ മുകളിലായി വലതുവശത്ത് കാണുന്ന ബൾബ് ഐക്കൺ അമർത്തി ഈ ഫീച്ചർ ആക്ടിവേറ്റ് ചെയ്യാം. വെളിച്ചം കൂടുതൽ ഉള്ള സമയങ്ങളിൽ ഈ മോഡ് ഓഫ് ചെയ്യാനുള്ള സൗകര്യവും ലഭ്യമാണ്. ആൻഡ്രോയിഡ്, ഐഒഎസ് പ്ലാറ്റ്ഫോമുകളിൽ ലഭ്യമാക്കുന്ന ഈ ഫീച്ചർ ഉപയോഗിച്ച്, മോശം ലൈറ്റിംഗിലും ഉപയോക്താക്കളുടെ മുഖം വ്യക്തമായി ദൃശ്യമായിരിക്കും.
ആപ്പിളിൻ്റെ ഐഒഎസ്, ആൻഡ്രോയിഡ് പതിപ്പുകളിലാണ് ലോ- ലൈറ്റ് മോഡ് ലഭ്യമാകുന്നത്. വീഡിയോ കോളിൽ തന്നെ മികച്ച എക്‌സ്‌പീരിയൻസ് നൽകാനുള്ള ഫീച്ചറുകൾ, ആപ്പ് നേരത്തെ അവതരിപ്പിച്ചിട്ടുണ്ട്. ടച്ച് അപ്പ് ഫീച്ചർ, ഫിൽട്ടറുകൾ ചേർക്കാനുള്ള ഓപ്‌ഷൻ, ബാക്ക്ഗ്രൗണ്ട് മാറ്റാനുള്ള ഫീച്ചർ തുടങ്ങിയവയാണ് ഇവ. വീഡിയോ കോളിനിടെ പശ്ചാത്തലം (ബാക്ക്ഗ്രൗണ്ട്) മാറ്റാനും ഫിൽട്ടറുകൾ ചേർക്കാനും പുതിയ ഫീച്ചറിലൂടെ കഴിയും.
അടുത്തിടെയാണ് തെറ്റായ വിവരങ്ങളുടെ പ്രചരണം തടയുന്നതിനുള്ള സംവിധാനവുമായി വാട്ട്സ്ആപ്പ് രംഗത്തെത്തിയത്. ഉപഭോക്താക്കളെ അപകടകരമായ ലിങ്കുകളിൽ നിന്ന് രക്ഷിക്കുന്നതിനായുള്ള പുതിയ ഫീച്ചറും കമ്പനി പരീക്ഷിച്ചു. വാട്ട്സാപ്പ് സന്ദേശങ്ങളിൽ വരുന്ന ലിങ്കുകളും ആ സന്ദേശത്തിൽ പറഞ്ഞിരിക്കുന്ന കാര്യങ്ങളും ശരിയാണോ എന്ന് തിരിച്ചറിയാൻ സഹായിക്കുന്നതാണ് പുതിയ ഫീച്ചർ. വ്യാപകമായി പ്രചരിച്ചു കൊണ്ടിരിക്കുന്ന സന്ദേശങ്ങളാണ് ഈ രീതിയിൽ പരിശോധിക്കുക. ആൻഡ്രോയിഡ് ബീറ്റ 2.24.20.28 വേർഷനിലാണ് ഈ ഫീച്ചർ പരീക്ഷിക്കുന്നതെന്ന് വാബീറ്റാ ഇൻഫോ റിപ്പോർട്ട് ചെയ്യുന്നു.
