സിറിയയിലെ പുരാതന ശവകുടീരത്തിൽ നിന്നാണ് ലോകത്തിലെ ഏറ്റവും പഴക്കമുള്ള അക്ഷരമാല പുരാവസ്തു ഗവേഷകർ കണ്ടെത്തിയത്. വിരലുകളോളം നീളമുള്ള കളിമൺ ഫലകങ്ങളിലാണ് ഈ അക്ഷരമാല കൊത്തിയിട്ടിരിക്കുന്നത്. ജോൺ ഹോപ്കിൻസ് യൂണിവേഴ്സിറ്റിയിലെ ഗവേഷകർ കാർബൺ-14 ഡേറ്റിംഗ് ടെക്നിക്കുകൾ ഉപയോഗിച്ച് കളിമൺ ഫലകങ്ങൾ 2400 ബിസിഇ കാലത്തേയ്ക്കുള്ളവയാണെന്ന് നിർണയിച്ചു. ഇതുവരെ കണ്ടെത്തിയിട്ടുള്ള എല്ലാ അക്ഷരമാലാ ലിപികളേക്കാളും 500 വർഷം പഴക്കമുള്ളവയാണിവെന്ന് പഠന റിപ്പോർട്ടുകൾ പറയുന്നു.
നന്നായി സംരക്ഷിക്കപ്പെട്ട വെങ്കലയുഗത്തിൽപെട്ട 6 ശവകുടീരങ്ങൾ ഉൾപ്പെടുന്ന ഒരു ശ്മാശാനത്തിനുള്ളിലാണ് ഈ നിർണായക കണ്ടെത്തൽ നടന്നത്. ശവകുടീരങ്ങളിലെ മൃതദേഹങ്ങൾക്കൊപ്പം സ്വർണം, വെള്ളി ആഭരണങ്ങൾ, പാത്രങ്ങൾ, കുന്തമുനകൾ, മൺപാത്രങ്ങൾ എന്നിവയും കണ്ടെത്തി. മൺപാത്രത്തിന് സമീപമായാണ് നാല് ചെറിയ കളിമൺ ഫലകങ്ങൾ കണ്ടെത്തിയത്.
2004-ലാണ് ഈ ഫലകങ്ങളുടെ കണ്ടെത്തൽ നടന്നതെന്ന് 2021-ലെ ഒരു അക്കാദമിക് പ്രബന്ധത്തിൽ രേഖപ്പെടുത്തിയിട്ടുള്ളതിനാൽ ഇത് പുതിയ കണ്ടത്തലല്ല. എന്നാൽ, ഗതകാലത്തേക്ക് വെളിച്ചം വീശുന്ന ഈ കണ്ടെത്തൽ കുറച്ച് ദിവസങ്ങൾക്ക് മുമ്പ് അമേരിക്കൻ സൊസൈറ്റി ഓഫ് ഓവർസീസ് റിസർചിന്റെ വാർഷിക മീറ്റിംഗിൽ അവതരിപ്പിച്ചതോടെയാണ് വീണ്ടും ശ്രദ്ധേയമായത്.
മൂവായിരം വർഷത്തിലേറെ പഴക്കമുള്ള ഈ അക്ഷരമാല ഇനിയും പഠന വിധേയമാണ്. ഇതുവരെ ഈ എഴുത്തിന്റെ അർത്ഥം വിവർത്തനം ചെയ്യാൻ ഗവേഷകർക്ക് കഴിഞ്ഞിട്ടില്ല. അക്ഷരമാല നിലവിൽ വരുന്നതിന് മുമ്പ് ആശയവിനിമയത്തിന് മനുഷ്യർ ചിത്രലിപികളെയും ചിഹ്നങ്ങളെയും ആശ്രയിച്ചിരുന്നു. മെസൊപ്പൊട്ടേമിയയിലെ സുമേറിയക്കാർ ക്യൂണിഫോം കൊത്തലുകൾ ഉപയോഗിച്ചപ്പോൾ, പുരാതന ഈജിപ്തുകാർ ഹൈറോഗ്ലിഫിക്‌സ് വികസിപ്പിച്ചെടുത്തു. ഇപ്പോൾ കണ്ടെത്തിയ കളിമൺ ഫലകത്തിലെ എഴുത്തുകൾ ഭാഷാ ചരിത്രത്തെ കുറിച്ചുള്ള പഠനത്തിൽ നിർണായകമായ വഴിത്തിരിവാകും.
