| അഭിമുഖം : ഗീതി സംഗീത/ ശ്യാം സോർബ
മലയാള സിനിമയിൽ ശ്രദ്ധേയമായ വേഷങ്ങളിലൂടെ പ്രേക്ഷക പ്രശംസ നേടിയ അഭിനേത്രിയാണ് ഗീതി സംഗീത. നാടകത്തെയും സിനിമയെയും ഒരുപോലെ സ്നേഹിക്കുന്ന, വളരെ തന്മയത്വത്തോടെ കഥാപാത്രങ്ങളെ കൈകാര്യം ചെയ്യുന്ന ഗീതി സംഗീതയുമായി ഒരു അഭിമുഖം
?: മലയാള സിനിമയിലേക്ക് ഗീതി സംഗീത എന്ന അഭിനേത്രിയുടെ വരവ് എങ്ങനെ ആയിരുന്നു?
ഗീതി സംഗീത: ഒരു കാലത്ത് അഭിനയം എന്റെ മോഹവും സ്വപ്നവും ഒക്കെ ആയിരുന്നു. പക്ഷേ ഒരിക്കലും മലയാള സിനിമയിൽ ഒരു നടി എന്നുള്ള രീതിയിൽ ഞാൻ വരുമെന്നോ അല്ലെങ്കിൽ ഒരു നടി എന്നുള്ള രീതിയിൽ എനിക്ക് വരാൻ പറ്റുമെന്നോ ഒന്നും ഞാൻ വിചാരിച്ചിരുന്നില്ല. കാരണം സിനിമ എന്നെ സംബന്ധിച്ചിടത്തോളം വേറെ ഏതോ ഒരു ലോകം, അല്ലെങ്കിൽ നമുക്ക് എത്തിപ്പെടാൻ പറ്റാത്ത ഒരു സ്ഥലം എന്നൊക്കെയുള്ള ധാരണയായിരുന്നു. പിന്നീട് എനിക്ക് ഇഷ്ടമുള്ള കാര്യങ്ങൾ ചെയ്യാൻ തീരുമാനിച്ചതിന്റെ ഭാഗമായിട്ട് ഞാൻ എന്റെ ജോലി റിസൈൻ ചെയ്തിട്ട് ഞാൻ കുറച്ച് യാത്രകൾ ചെയ്യാം നാടകം ചെയ്യാം എന്നൊക്കെയുള്ള തീരുമാനങ്ങളിലേക്ക് എത്തുന്നത്.
എനിക്ക് അഭിനയം ഇഷ്ടമാണ് അതുകൊണ്ട് തന്നെ നാടകം ചെയ്യാം എന്ന് വിചാരിച്ചിട്ടാണ് ഞാൻ ആരംഭിക്കുന്നത്. നാടകത്തിലേക്ക് എത്തി കഴിഞ്ഞതിനു ശേഷമാണ് സിനിമയിലേക്ക് വരാൻ ഓഡിഷൻ എന്ന് പറഞ്ഞ ഒരു വഴിയുണ്ട് എന്ന് മനസ്സിലാക്കുന്നതും ഞാൻ ഓഡിഷനു പങ്കെടുക്കാൻ തുടങ്ങുന്നതും. എന്റെ ആദ്യ ഒഡിഷനിൽ നിന്ന് തന്നെയാണ് ആദ്യ സിനിമയിലേക്ക് എത്തുന്നത്, അതായിരുന്നു ക്യൂബൻ കോളനി. അപ്പൊ ഞാൻ കൊടുത്തിട്ടുള്ള ഒഡിഷനുകളിൽ എല്ലാം എനിക്ക് പറ്റുന്ന ഒരു കഥാപാത്രം ഉണ്ടെങ്കിൽ ഞാൻ അതിനകത്തേക്ക് കാസ്റ്റ് ചെയ്യപ്പെട്ടു എന്നുള്ളത് എനിക്ക് നൽകിയ ഒരു ധൈര്യം ചെറുതായിരുന്നില്ല.
ചിലപ്പോൾ കാരക്ടർ ഭയങ്കര ചെറുതായിരിക്കാം പക്ഷെ ഞാൻ പെര്ഫോം ചെയ്തിട്ട് കിട്ടുന്ന കഥാപാത്രം ആണത് എനിക്ക് എന്നെ റെക്കമൻഡ് ചെയ്യാൻ ഒരാളുമില്ലാത്ത ഒരു സ്ഥലത്ത് ഞാൻ പെർഫോം ചെയ്തിട്ട് എനിക്ക് കിട്ടിയ കഥാപാത്രങ്ങളെല്ലാം തന്നെ എനിക്ക് ഒരു ധൈര്യം തന്നിട്ടുണ്ട്. ഇത് എനിക്കും കൂടെ ഉള്ള സ്ഥലമാണ് എന്നുള്ള ധൈര്യം തന്നിട്ടുണ്ട്. സത്യത്തിൽ ഓഡീഷൻ വഴിയാണ് ഞാൻ തുടക്കത്തിൽ സിനിമയിലേക്ക് എത്തിയത്, പിന്നീടാണ് തുറമുഖം പോലത്തെ നാടകങ്ങളൊക്കെ ചെയ്തതിനു ശേഷം ആണ് അത് സിനിമയിലേക്ക് ഡയറക്ട് കോൾ കാൾ വരുന്നത്.
എന്റെ ഫസ്റ്റ് പടം, അതിന്റെ പോസ്റ്റർ കണ്ടിട്ടാണ് ലിജോ ജോസ് പല്ലിശേരി എന്നെ ചുരുളിയിലേക്ക് വിളിക്കുന്നത്. പിന്നെ പിന്നെ ഇങ്ങനെ നമ്മൾ ചെയ്ത വർക്ക്കൾ നമുക്ക് വേണ്ടി സംസാരിക്കുന്നു എന്ന് പറയുന്ന ഒരു അവസ്ഥയിലേക്ക് ഞാൻ എത്തുകയുണ്ടായി.
?: സിനിമയിൽ ടൈപ്പ് കാസ്റ്റിംഗ് ഒരു പ്രശ്നമായി തോന്നിയിട്ടുണ്ടോ? ഒരു കഥാപാത്രം ശ്രദ്ധിക്കപ്പെട്ടാൽ പിന്നീട് അതേ രീതിയിൽ തന്നെയുള്ള കഥാപാത്രങ്ങളിലേക്ക് ആളുകളെ മാറ്റിവെക്കുന്നതായി തോന്നാറുണ്ടോ?
ഗീതി സംഗീത: സിനിമയിൽ ടൈപ്പ് കാസ്റ്റിംഗ് ഉണ്ടോ എന്ന ചോദിച്ചാൽ ഉണ്ട് എന്ന തന്നെ പറയേണ്ടി വരും. ചില കഥാപാത്രങ്ങൾ ചെയ്യുന്നതിലൂടെ, പിന്നീട് നിരന്തരം ചില ആളുകൾ അത്തരം കഥാപാത്രങ്ങളിലേക്ക് മാത്രം ക്ഷണിക്കപ്പെടുന്നത് നമ്മൾ കാണാറുണ്ടല്ലോ, ചില പോലീസ് വേഷങ്ങൾ ചെയ്യുന്ന ആളുകളൊക്കെ നിരന്തരം അതിലേക്ക് തന്നെ കാസ്റ്റിംഗ് ചെയ്യപ്പെടുന്നത് കാണാറുണ്ടല്ലോ. അതൊരിക്കലും ആരുഡയെങ്കിലും കുറ്റം ആണോ എന്ന ചോദിച്ചാൽ അല്ല, പക്ഷെ ഒരു അഭിനേതാവിനെ വെച്ച് നോക്കുമ്പോൾ അത് ആ ആൾക്ക് ബുദ്ധിമുട്ട് ഉണ്ടാക്കുന്ന കാര്യമാണ്.
എന്നെ സംബന്ധിച്ചു നോക്കുമ്പോൾ എനിക്ക് ഇതുവരെ അങ്ങനെ ടൈപ്പ് കാസ്റ്റിംഗിൽ പെടേണ്ട അവസ്ഥ വന്നിട്ടില്ല. ഭാഗ്യവശാൽ ഒരുപാട് വ്യത്യസ്തമായ കഥാപാത്രങ്ങൾ തന്നെ ചെയ്യാനുള്ള ഭാഗ്യം കിട്ടിയിട്ടുണ്ട്. പക്ഷെ നേരത്തെ പറഞ്ഞത് പോലെ ചില അഭിനേതാക്കൾക്ക് ഇത്തരമൊരു കാര്യം അനുഭവിക്കേണ്ടി വരാറുണ്ട് എന്നത് വാസ്തവമാണ്. പിന്നീട് ഏതെങ്കിലും ഒരു സംവിധായകൻ ആ വ്യക്തിയെ ഒന്ന് മാറ്റി പരീക്ഷിക്കണം എന്ന തീരുമാനം എടുക്കുമ്പോളാണ് അവരുടെയും അവസ്ഥ മാറുക, അല്ലെങ്കിൽ കഴിവുകൾ തിരിച്ചറിയുക.
?: സിനിമ മേഖല സുരക്ഷിതമായ ഒരു തൊഴിലിടമാണ് എന്ന അഭിപ്രായമുണ്ടോ?
ഗീതി സംഗീത: “സിനിമാ വ്യവസായം നിസ്സംശയമായും സുരക്ഷിതമായ ഒരു മേഖലയാണ്. അക്കാര്യത്തില് ഒരു സംശയവുമില്ല. വർഷങ്ങളായി സിനിമയിൽ പ്രവർത്തിക്കുന്ന ഒരാളെന്ന നിലയിൽ, ഇത് വളരെ സുരക്ഷിതമായ സ്ഥലമാണെന്ന് എനിക്ക് ആത്മവിശ്വാസത്തോടെ പറയാൻ കഴിയും. സുരക്ഷയെക്കുറിച്ച് പറയുമ്പോൾ, സിനിമാ മേഖല ഏറ്റവും സുരക്ഷിതമായ സ്ഥലങ്ങളിൽ ഒന്നാണ്. എന്നിരുന്നാലും, നമ്മുടെ സുരക്ഷ ആത്യന്തികമായി നമ്മുടെ കൈകളിലാണ്. നാം എവിടെ ജോലി ചെയ്താലും, എങ്ങനെ നില്ക്കുമ്പോഴും, എന്തു ചെയ്താലും എല്ലാം നമ്മുടേതാണ്. ആ തീരുമാനം നിര്ണായകമാണ്.’
?: ജീവിതത്തിൽ ഏറ്റവും കൂടുതൽ ഓർമ്മിക്കാൻ ആഗ്രഹിക്കുന്ന ഒരു സിനിമ അനുഭവം പങ്കുവെക്കാമോ?
ഗീതി സംഗീത: “എന്റെ ജീവിതത്തിലെ ഏറ്റവും അവിസ്മരണീയമായ അനുഭവത്തിലേക്ക് വരുമ്പോൾ, അത് ‘ചുരുളി’ സിനിമയിലെ നിമിഷങ്ങളായിരിക്കുമെന്നതിൽ സംശയമില്ല. ആ സിനിമയിൽ, ഞാൻ ഒരിക്കലും സങ്കൽപ്പിക്കാത്ത അപ്രതീക്ഷിത സാഹചര്യങ്ങളിൽ ഞാൻ എന്ന അഭിനേതാവിനെ കണ്ടെത്തിയ നിമിഷമുണ്ട്. ഞാൻ ഇത് മുമ്പ് പലതവണ പരാമർശിച്ചിട്ടുണ്ട്, ഒരു ദൈവിക ഇടപെടൽ ഒരു അഭിനേതാവിന്റെ ജീവിതത്തിൽ ഒരു പങ്ക് വഹിക്കുന്നുവെന്ന് ഞാൻ കേട്ടിട്ടുണ്ട്. എന്നെ സംബന്ധിച്ചിടത്തോളം, രണ്ട് പ്രധാന സംഭവങ്ങൾ ഉണ്ടായിരുന്നു.
ആദ്യത്തേത് ഈ രംഗത്തിനിടയിലായിരുന്നു, രണ്ടാമത്തേത് തുറമുഖം എന്ന നാടകം അവതരിപ്പിക്കുന്നതിനിടെയായിരുന്നു. ഒരു അമ്മ ആൾക്കൂട്ടത്തിൽ മകനെ തിരയുന്ന ഒരു പ്രത്യേക രംഗത്തിൽ, എനിക്ക് വല്ലാത്തൊരു മൂടൽ, ഒരു നിമിഷം അനുഭവപ്പെട്ടു. അത് ഒരു മൂടൽമഞ്ഞ് പോലെ തോന്നി, വ്യക്തമായി കാണാൻ പ്രയാസമായിരുന്നു. യഥാർത്ഥത്തിൽ എനിക്ക് ഇത് ഒരു വല്ലാത്ത അനുഭവമായിരുന്നു.
ആ കഥാപാത്രം ആ നിമിഷം അനുഭവിക്കുന്ന അവസ്ഥ യഥാർത്ഥത്തിൽ അനുഭവിച്ചു എന്ന് തന്നെ പറയാം. ആ നാടകം അവതരിപ്പിക്കുമ്പോൾ എനിക്ക് വീണ്ടും അതേ അനുഭവം ഉണ്ടാകുമോ എന്ന് എനിക്ക് ഇപ്പോഴും അറിയില്ല. എന്നാൽ ഒരു അഭിനേതാവെന്ന നിലയിൽ എന്നെ സംബന്ധിച്ചിടത്തോളം ഇത് ആശ്ചര്യത്തിന്റെ നിമിഷമായിരുന്നു.”
?: സിനിമ, രാഷ്ട്രീയം – രണ്ടും രണ്ടായി കാണേണ്ടത് ഉണ്ടോ? സിനിമകൾ തിരഞ്ഞെടുക്കുമ്പോൾ അതിലെ രാഷ്ട്രീയം ശ്രദ്ധിക്കാറുണ്ടോ?
ഗീതി സംഗീത: ‘സിനിമകൾ തിരഞ്ഞെടുക്കുമ്പോൾ അതിന്റെ രാഷ്ട്രീയം ഞാൻ പരിഗണിക്കാറില്ല. ഓരോ സിനിമയ്ക്കും അതിന്റേതായ രാഷ്ട്രീയ നിലപാടുകളുണ്ട്, അത് അതിന്റെ എഴുത്തുകാരനും സംവിധായകനും ആ സിനിമയിലൂടെ പറയാൻ ശ്രമിക്കുന്ന ചിലതുണ്ട്. ആ സന്ദർഭത്തിൽ കഥാപാത്രമാകുക എന്നതാണ് എന്റെ ജോലി. ഒരു അഭിനേതാവ് എന്ന നിലയിൽ അതിനൊപ്പം നിൽക്കാൻ ആണ് ശ്രമിക്കാറുള്ളത്.
എന്റെ വ്യക്തിപരമായ രാഷ്ട്രീയ കാഴ്ചപ്പാടുകൾ കണക്കിലെടുക്കാതെ, സ്രഷ്ടാക്കൾ വിഭാവനം ചെയ്ത കഥാപാത്രത്തെ ചിത്രീകരിക്കുക എന്നത് എന്റെ ഉത്തരവാദിത്തമായി ഞാൻ കാണുന്നു. എന്നെ ഏൽപ്പിച്ച റോളുകൾ ഏറ്റവും മനോഹരമായ രീതിയിൽ, ഈ റോളുകൾ എന്നെ ഏൽപ്പിക്കുന്നവരുടെ പ്രതീക്ഷകളെക്കാൾ വളരെ മനോഹരമായി നിർവഹിക്കുക എന്നതാണ് എന്റെ പ്രാർത്ഥനയും ആഗ്രഹവും. ചിലതരം കഥാപാത്രങ്ങളെ മാത്രം അവതരിപ്പിക്കുമോ എന്ന് ഞാൻ ഒരിക്കലും ചിന്തിച്ചിട്ടില്ല. തീർച്ചയായും ഇല്ല.”
?: മലയാള സിനിമയിൽ ഗോഡ്ഫാദർ ഇല്ലാതെ പിടിച്ചു നിൽക്കാൻ ആവില്ല എന്ന പൊതു അഭിപ്രായത്തെ എങ്ങനെ നോക്കി കാണുന്നു?
ഗീതി സംഗീത: ഗോഡ്ഫാദറില്ലാതെ മലയാള സിനിമയിൽ നിലനിൽക്കാൻ കഴിയില്ല എന്ന പറഞ്ഞാൽ ഞാൻ ഇൻഡസ്ട്രിയിൽ നിലനിൽക്കില്ലായിരുന്നു. ഒരു ഗോഡ്ഫാദർ ഇല്ലാതെ ഞാൻ ഇത്രയും കാലമായി സിനിമ മേഖലയിൽ നിൽക്കുന്നുണ്ട്. ഗോഡ്ഫാദര് ഇല്ലാതെയാണ് ഞാന് ഇതിലേക്ക് വന്നത്. ഞാൻ സൂചിപ്പിച്ചതുപോലെ, ഓഡിഷനുകളിലൂടെയാണ് ഞാൻ സിനിമയിലേക്ക് പ്രവേശിച്ചത്. ഗോഡ്ഫാദറില്ലാതെ എഴുപതോളം സിനിമകള് ഞാന് ചെയ്തിട്ടുണ്ട്. ഒരു ഗോഡ്ഫാദർ ഉള്ളത് കാര്യങ്ങൾ എളുപ്പമാക്കുമെങ്കിലും, ഉണ്ടെങ്കിലും ഇല്ലെങ്കിലും, സിനിമയിൽ സ്വയം നിലനിർത്താൻ നിങ്ങൾ കഠിനാധ്വാനം ചെയ്യേണ്ടതുണ്ടെന്ന് ഞാൻ വിശ്വസിക്കുന്നു. അതാണെന്റെ ധാരണ.
?: സിനിമയിൽ ഭാവിയിൽ ചെയ്യണം എന്ന് ആഗ്രഹമുള്ള ഒരു കഥാപാത്രമുണ്ടോ?
ഗീതി സംഗീത: അങ്ങനെ ഭാവിയിൽ അഭിനയിക്കാൻ ഞാൻ ആഗ്രഹിക്കുന്ന ഒരു കഥാപാത്രമില്ല. എല്ലാത്തരം കഥാപാത്രങ്ങളും ചെയ്യണമെന്ന ആഗ്രഹം എനിക്കുണ്ട്. കൂടുതൽ കോമഡി കഥാപാത്രങ്ങൾ ചെയ്യാൻ എനിക്ക് അൽപ്പം ആഗ്രഹമുണ്ട്. അത് സംഭവിക്കുമെന്ന് പ്രതീക്ഷിക്കുന്നു.
?: അവസാനമായി, കലയെ കലയായി കാണാൻ കഴിയാത്ത ആളുകൾ ഉണ്ടല്ലോ, ആ ഒരു പ്രവണതയോട് എങ്ങനെ പ്രതികരിക്കുന്നു?
ഗീതി സംഗീത: കലയെ കലയായി കാണാൻ കാണാൻ കഴിയാത്ത ആളുകൾക്ക്, അവരോട് ഒന്നും പറയുന്നതിൽ അർത്ഥമില്ല. ഇതൊരു കലയായി മാത്രം കാണുക. അതിനപ്പുറം അവരോട് പ്രത്യേകമായി ഒന്നും പറയാനില്ല. ഇത്തരക്കാരോട് ഒന്നും പറഞ്ഞിട്ട് കാര്യമില്ല. അവരോട് ഒന്നും പറയാതിരിക്കുക എന്നതാണ് ഏറ്റവും നല്ലത്.
