ഇംഗ്ലണ്ടിന്റെ പ്രകൃതിസൗന്ദര്യം കാൽനടയായി അനുഭവിക്കാൻ ആഗ്രഹിക്കുന്നവർക്ക് വലിയ അവസരമായി ‘കിംഗ് ചാൾസ് മൂന്നാമൻ ഇംഗ്ലണ്ട് കോസ്റ്റ് പാത്ത്’ യാഥാർത്ഥ്യമായി. ഏകദേശം 2,689 മൈൽ നീളത്തിൽ വ്യാപിച്ചുകിടക്കുന്ന ഈ പാത, രാജ്യത്തിന്റെ മുഴുവൻ തീരപ്രദേശത്തെയും ചുറ്റിപ്പറ്റുന്ന ലോകത്തിലെ ഏറ്റവും ദൈർഘ്യമേറിയ നിയന്ത്രിത നടപ്പാതയായി മാറുന്നു. പദ്ധതി രൂപകൽപ്പന ചെയ്ത നാച്ചുറൽ ഇംഗ്ലണ്ടിന്റെ കണക്കുകൾ പ്രകാരം, ഇത് ലോകത്തിലെ ഏറ്റവും നീളം കൂടിയ തീരദേശ പാതയാണ്.
മണൽപ്പുറങ്ങൾ, ഉയർന്ന പാറക്കെട്ടുകൾ, ചരിത്രപ്രാധാന്യമുള്ള തീരദേശ പട്ടണങ്ങൾ, ഉപ്പുചതുപ്പുകൾ തുടങ്ങി വൈവിധ്യമാർന്ന പ്രകൃതി കാഴ്ചകളുടെ സമന്വയമാണ് ഈ പാത. ഈസ്റ്റ് സസെക്സിലെ പ്രശസ്തമായ സെവൻ സിസ്റ്റേഴ്സ് ചോക്ക് കുന്നുകൾ പ്രധാന ആകർഷണങ്ങളിൽ ഒന്നാണ്. പുതിയതായി പ്രഖ്യാപിച്ച ദേശീയ പ്രകൃതി സംരക്ഷണ കേന്ദ്രത്തിന്റെ ഭാഗമായ ഈ പ്രദേശം പ്രകൃതിസ്നേഹികൾക്ക് അനുപമമായ അനുഭവം സമ്മാനിക്കും.
സൗത്ത് ഡൗൺസ് നാഷണൽ പാർക്ക് അതോറിറ്റി സംഘടിപ്പിച്ച ചടങ്ങിൽ രാജാവ് ചാൾസ് മൂന്നാമൻ തന്നെ പദ്ധതി ഔദ്യോഗികമായി ഉദ്ഘാടനം ചെയ്തു. തുടർന്ന് സെവൻ സിസ്റ്റേഴ്സിലെ പുതുതായി ഒരുക്കിയ പാതയിൽ നാച്ചുറൽ ഇംഗ്ലണ്ട് ചെയർ ടോണി ജൂനിപ്പറും പരിസ്ഥിതി സെക്രട്ടറി എമ്മ റെയ്നോൾഡ്സും കൂടെ അദ്ദേഹം നടന്നു. പ്രകൃതി സംരക്ഷണവും പൈതൃകവും ഒരുമിപ്പിക്കുന്ന ഈ പദ്ധതി ആളുകളുടെ ജീവിത നിലവാരം മെച്ചപ്പെടുത്തുകയും ആരോഗ്യകരമായ വിനോദത്തിന് അവസരം സൃഷ്ടിക്കുകയും ചെയ്യുമെന്ന് അധികൃതർ പ്രതീക്ഷിക്കുന്നു.
2009-ൽ ഗോർഡൻ ബ്രൗൺ സർക്കാരിന്റെ കാലത്ത് നിയമപരമായി ആരംഭിച്ച ഈ പദ്ധതി, വർഷങ്ങളായുള്ള പരിശ്രമങ്ങൾക്ക് ശേഷമാണ് യാഥാർത്ഥ്യമായത്. നിലവിലുണ്ടായിരുന്ന നിരവധി പാതകൾ കൂട്ടിച്ചേർക്കുകയും ആയിരത്തിലധികം മൈൽ ദൂരത്തിൽ പുതിയ വഴികൾ സൃഷ്ടിക്കുകയും ചെയ്താണ് ഇത് രൂപംകൊണ്ടത്. യാത്രക്കാരുടെ സൗകര്യത്തിനായി ബോർഡ്വാക്കുകളും പാലങ്ങളും ഉൾപ്പെടെ വിവിധ അടിസ്ഥാന സൗകര്യങ്ങളും ഒരുക്കിയിട്ടുണ്ട്.
ഇപ്പോൾ ഈ പാതയുടെ ഏകദേശം 80 ശതമാനം ഭാഗം പൊതുജനങ്ങൾക്ക് തുറന്നുകിട്ടിയിട്ടുണ്ട്. ശേഷിക്കുന്ന ഭാഗങ്ങൾ ഉടൻ പൂർത്തിയാകുമെന്നാണ് പ്രതീക്ഷ. കടൽത്തീരത്തോട് ചേർന്ന് തടസ്സമില്ലാതെ ദൂരം നടക്കാനാകുന്ന അനുഭവമാണ് ഇതിന്റെ ഏറ്റവും വലിയ പ്രത്യേകതയെന്ന് അധികൃതർ പറയുന്നു. ശാരീരിക പരിമിതികളുള്ളവർക്കും ഉപയോഗിക്കാവുന്ന രീതിയിൽ സൗകര്യങ്ങൾ ഒരുക്കിയിട്ടുള്ളതിനാൽ, എല്ലാവർക്കും ഒരുപോലെ പ്രാപ്യമാകുന്ന വിനോദസഞ്ചാര കേന്ദ്രമായി ഇത് മാറും.
ഇംഗ്ലണ്ടിന്റെ വടക്കുമുതൽ തെക്കുവരെയുള്ള തീരപ്രദേശങ്ങളെ ബന്ധിപ്പിക്കുന്ന ഈ പാത, ലോകമെമ്പാടുമുള്ള സാഹസിക സഞ്ചാരികളുടെ പ്രധാന ആകർഷണമായി മാറുമെന്ന് വിലയിരുത്തപ്പെടുന്നു.
