നാഗാലാൻഡിലെ മോൺ ജില്ലയിൽ സ്ഥിതി ചെയ്യുന്ന ലോണ്ഗ്‌വ ഗ്രാമം. ഇന്ത്യയും മ്യാൻമറും തമ്മിലുള്ള അതിർത്തി പങ്കിടുന്ന ഒരു അപൂർവ സ്ഥലമാണ്. ഈ ഗ്രാമം അതിൻ്റെ സവിശേഷതകളാൽ ഏറെ ശ്രദ്ധേയമാണ്. കൊന്യാക് ഗോത്ര വിഭാഗത്തിൽപെട്ടവരാണ് ഇവിടത്തെ പ്രധാന നിവാസികൾ, അദ്വിതീയമായതാണ് ഇവരുടെ താമസവീട്‌. വീടുകളുടെ പകുതി ഇന്ത്യയിലും, പകുതി മ്യാൻമറിലുമാണ് സ്ഥിതി ചെയ്യുന്നത്. അതായത്, ഒരു വീട്ടിലെ ഒരുഭാഗം ഇന്ത്യയിൽ, മറ്റൊരുഭാഗം മ്യാൻമറിൽ ആണ്!
ഇന്ത്യ- മ്യാൻമർ അന്താരാഷ്ട്ര അതിർത്തി ലോണ്ഗ്‌വ ഗ്രാമത്തിലൂടെ കടന്നുപോകുന്നുവെങ്കിലും ഗ്രാമവാസികൾക്ക് പാസ്പോർട്ട് ഇല്ലാതെ തന്നെ രാജ്യങ്ങൾക്കിടയിൽ സഞ്ചരിക്കാൻ കഴിയുന്നുവെന്നത് ശ്രദ്ധേയമാണ്. കൃഷിയെയാണ് ഇവിടത്തെ ജനങ്ങൾ പ്രധാനമായും ആശ്രയിക്കുന്നത്. മനോഹരമായ കുന്നുകൾ, പച്ചപ്പുനിറഞ്ഞ വനങ്ങൾ, മൂടൽമഞ്ഞിൽ മൂടിയ മേഘങ്ങൾ എന്നിവ ലോണ്ഗ്‌വയെ വിരുന്നെത്തുന്നവർക്ക് ആകർഷകമാക്കുന്നു.
കൊന്യാക് ഗോത്രവിഭാഗം നാഗാലാൻഡിലെ ഏറ്റവും വലിയ ഗോത്ര വിഭാഗങ്ങളിലൊന്നാണ്. ഇവരുടെ മുഖത്തെ ടാറ്റൂകളും, ചെവിയിലിടുന്ന വലിയ കമ്മലുകളും ഈ ഗോത്രത്തിൻ്റെ പൈതൃകവും സംസ്കാരവും പ്രതിപാദിക്കുന്നു. ഈ ഗ്രാമത്തിൽ രണ്ട് രാജ്യങ്ങളിലുമുള്ള സ്വാധീനമുള്ള ആംഗ് എന്ന ഗോത്ര തലവൻ ഭരണം നടത്തുന്നു.
ഗോത്ര പാരമ്പര്യങ്ങൾ ഇന്നും ഇവിടെ സൂക്ഷിച്ചുകൊണ്ടിരിക്കുന്നു. കൈകൊണ്ട് നെയ്‌ത ഷാളുകൾ മരംകൊത്തുപണികൾ തുടങ്ങിയവയിൽ വിദഗ്ധരായ കരകൗശല വിദഗ്ധരും ലോണ്ഗ്‌വയിൽ താമസിക്കുന്നു.
നാഗാലാൻഡിലെ മോൺ ജില്ലയിൽ നിന്ന് ഏകദേശം മൂന്ന് മണിക്കൂറിനുള്ളിൽ ഈ ഗ്രാമത്തിലെത്താം. 161 കിലോമീറ്റർ അകലെയുള്ള അസ്സമിലെ ജോർഹത്ത് വിമാനത്താവളമാണ് ലോണ്ഗ്‌വയ്ക്കടുത്തുള്ള ഏറ്റവും അടുത്ത വിമാനത്താവളം.
