ബോളിവുഡിൽ 2004ൽ റിലീസ് ആയ ഹിറ്റ് റൊമാന്റിക്ക് ഇറോട്ടിക്ക് ത്രില്ലർ സിനിമയായിരുന്നു ‘മർഡർ’. അനുരാഗ് ബസു സംവിധാനം ചെയ്ത ചിത്രത്തിൽ ഇമ്രാൻ ഹഷ്മി, മല്ലിക ഷെരാവത്, അമീഷ പട്ടേൽ എന്നിവരാണ് മുഖ്യ കഥാപാത്രങ്ങളെ അവതരിപ്പിച്ചത്. സിനമയിലെ ഗാനങ്ങളും ഹിറ്റ് ആയിരുന്നു. ചിത്രത്തിലെ സെക്സും ചൂടൻ രംഗങ്ങളടക്കം അന്ന് ചർച്ചയായിരുന്നു.
മർഡറിൻ്റെ വൻ വിജയത്തിന് ശേഷം അഭിമുഖീകരിക്കേണ്ടി വന്ന വെല്ലുവിളികളെ കുറിച്ച് മനസു തുറന്നിരിക്കുകയാണ് ചിത്രത്തിലെ പ്രധാന കഥാപാത്രമായ സിമ്രാൻ സെംഗാളിനെ അവതരിപ്പിച്ച മല്ലിക ഷെരാവത്. രൺവീർ അലഹബാദിയയുമായുള്ള ഒരു പോഡ്കാസ്റ്റിനിടെയാണ് താരം മനസ് തുറന്നത്. “ചിത്രത്തിൻ്റെ വൻവിജയം തനിക്ക് വലിയൊരു സ്റ്റാർഡം നൽകിയെന്നത് മാത്രമല്ല സാമ്പത്തികപരമായ സ്വാതന്ത്ര്യവും നൽകി,” -മല്ലിക പറയുന്നു.
“ചിത്രത്തിൻ്റെ വൻ വിജയം വലിയതോതിലുള്ള പ്രശസ്തിയാണ് തനിക്ക് ഉണ്ടാക്കി തന്നെത്, അതിനോടൊപ്പം തന്നെ പലതരത്തിലുള്ള വെല്ലുവിളികളും ഉയർന്നു വന്നു,” -താരം പറയുന്നു. പ്രത്യേകിച്ചും സമകാലികരായ ബോളിവുഡ് താരങ്ങളിൽ നിന്നും. 2004ലെ സാഹചര്യം മർഡർ പോലൊരു സിനിമയെയോ തന്നെ പോലെ ഒരു നടിയെയോ ഉൾക്കൊള്ളാൻ സാധിക്കുന്നതായിരുന്നില്ലെന്നും മല്ലിക വ്യക്തമാക്കി.
“അവാർഡുകൾ നേടുക എന്നത് എൻ്റെ ലക്ഷ്യമായിരുന്നില്ല. സ്വന്തം താത്പര്യങ്ങൾക്ക് അനുസരിച്ച് ജീവിക്കാൻ കഴിയുക എന്നുള്ളതും തെറ്റായാലും ശരിയായാലും തീരുമാനങ്ങൾ എടുക്കാൻ കഴിയുക എന്നുള്ളതുമാണ് പ്രധാനപ്പെട്ട കാര്യം. പ്രശസ്തി എന്നു പറയുന്നത് സിനിമയുടെ ഉപോത്പന്നം മാത്രമാണ്,” -മല്ലിക പറയുന്നു.
മർഡർ സിനിമയ്ക്ക് ശേഷം ആളുകൾക്ക് തന്നോടുള്ള സമീപനം മാറിയതായും എല്ലാവരാലും താൻ തിരിച്ചറിയപ്പെടാൻ തുടങ്ങിയെന്നും മല്ലിക പറഞ്ഞു. അന്നുണ്ടായിരുന്ന പ്രശസ്തിയും വളരെ വലുതായിരുന്നു. 2000ൻ്റെ തുടക്കത്തിൽ അത്തരം ഒരു അവസരം ലഭിക്കാൻ എറെ ആഗ്രഹിച്ചിരുന്നതാണ്. എന്നാൽ ഇപ്പോൾ വരുന്ന പുതിയ നടീനടൻമാരുടെ സാഹചര്യം വ്യത്യസ്ഥമാണെന്നും മല്ലിക പറഞ്ഞു.
