ബിഹാർ, അറയിലെ തനിഷ്‌ക് ജ്വല്ലറിയുടെ അകത്ത് കയറി 25 കോടിയോളം രൂപയുടെ ആഭരണങ്ങൾ കൊള്ളയടിച്ച സംഘവും പോലീസും ഏറ്റുമുട്ടി വെടിയുതിർത്തു. ജീവനക്കാരെ തോക്കിൻ മുനയിൽ നിർത്തി കൊള്ളയടിച്ച സാധനങ്ങളുമായി ഷോറൂമിൽ നിന്ന് ഉടൻ രക്ഷപ്പെടുകയായിരുന്നു. ബീഹാർ ഭരിക്കുന്നത് ‘ഗുണ്ടകൾ’ ആണെന്ന് പ്രതിപക്ഷം പറഞ്ഞതോടെ സംഭവം സംസ്ഥാന പോലീസിനെ അമ്പരപ്പിച്ചു.
കൊള്ളക്കാർ കയറിയത്?
അറയിലെ ഗോപാലി ചൗക്കിലുള്ള തനിഷ്‌ക് ജ്വല്ലറി തിങ്കളാഴ്‌ച രാവിലെ 10 മണിയോടെ ആണ് തുറന്നത്. എല്ലാ ദിവസത്തെയും പോലെ ജീവനക്കാർ നിലവറയിൽ നിന്ന് ആഭരണങ്ങൾ പുറത്തെടുത്ത് കടയിൽ പ്രദർശിപ്പിക്കാൻ കൊണ്ടുവച്ചു. ഏകദേശം അരമണിക്കൂറിന് ശേഷം ഒരു കാറിൽ ആറ് പേർ എത്തി. അത് തെരുവിന് എതിർവശത്ത് പാർക്ക് ചെയ്‌ത്‌ കടയുടെ അടുത്തേക്ക് ഉപഭോക്‌താക്കളെ പോലെ വന്നു. ഗാർഡ് അവരെ ഗേറ്റിൽ തടഞ്ഞു.
“നിയമപ്രകാരം നാലിൽ കൂടുതൽ പേരുടെ സംഘങ്ങൾ ഒരുമിച്ച് പ്രവേശിക്കാൻ അനുവാദമില്ല. അതിനാൽ അവരോട് ജോഡികളായി പ്രവേശിക്കാൻ ആവശ്യപ്പെട്ടു. ആറാമത്തെയും അവസാനത്തെയും ആൾ എൻ്റെ തലക്ക് നേരെ തോക്ക് ചൂണ്ടി. എൻ്റെ ആയുധം തട്ടിയെടുത്ത് എന്നെ ആക്രമിച്ചു,” -ഗാർഡുകളിൽ ഒരാളായ മനോജ് കുമാർ വാർത്താ ഏജൻസിയായ ഐഎഎൻഎസിനോട് പറഞ്ഞു.
ജീവനക്കാരെ ആക്രമിച്ചു
കടയിലെ ജീവനക്കാരനായ രോഹിത് കുമാർ മിശ്ര മാധ്യമങ്ങളോട് പറഞ്ഞു, “കുറ്റവാളികൾ ഗാർഡിൻ്റ തോക്കുകൾ തട്ടിയെടുത്ത് കൈകൾ ഉയർത്തിപ്പിടിച്ച് ഒരു മൂലയിൽ ജീവനക്കാരെ വളഞ്ഞു. ഞാൻ കൗണ്ടറിന് പിന്നിൽ ഒളിച്ചു. പക്ഷേ അവർ എന്നെ പുറത്തു കൊണ്ടുവന്ന് മർദ്ദിച്ചു. എൻ്റ ഫോൺ ചോദിച്ചു. ഞാൻ അത് മറച്ചു വെച്ചിരുന്നു. കൊള്ളക്കാരിൽ ഒരാൾ പറഞ്ഞു, ‘അവനെ വെടിവക്കൂ..’, അവൻ സിഐഡിയാകാൻ ശ്രമിക്കുകയാണ്.”
“ഞങ്ങൾ വളരെ ഏറെ ഭയന്നുപോയി, എന്താണ് സംഭവിക്കുന്നതെന്ന് മനസ്സിലായില്ല” കവർച്ചക്കാർ തോക്കിൻ മുനയിൽ നിർത്തിയ ഉടൻ പോലീസിനെ വിളിച്ചതായി മറ്റൊരു ജീവനക്കാരിയായ സിമ്രാൻ പറഞ്ഞു. പോലീസ് വരുന്നുണ്ടെന്ന് ഉറപ്പായെങ്കിലും, കൊള്ളക്കാർ കൊള്ളയടിച്ച സാധനങ്ങളുമായി പോയതിന് ശേഷമാണ് പോലീസ് എത്തിയതെന്ന് ജീവനക്കാർ പറഞ്ഞു. 17 മിനിറ്റിനുള്ളിൽ കവർച്ചക്കാർ അകത്തേക്കും പുറത്തേക്കും പോയി എന്ന് ചില റിപ്പോർട്ടുകൾ പറയുന്നു.
മോഷ്‌ടിക്കപ്പെട്ടത്?
25 കോടി രൂപയുടെ ആഭരണങ്ങളും പണവും കൊള്ളക്കാർ മോഷ്‌ടിച്ചതായി സ്റ്റോർ മാനേജർ കുമാർ മൃത്യുഞ്ജയ് പറഞ്ഞു. “ഇതിൽ സ്വർണ്ണമാലകൾ, വളകൾ, വജ്രങ്ങൾ, എല്ലാം ഉൾപ്പെടുന്നു,” -അദ്ദേഹം പറഞ്ഞു. വിവാഹ സീസണിലെ ഉയർന്ന ആവശ്യം നിറവേറ്റാൻ കടയിൽ ഗണ്യമായ സ്റ്റോക്കുകൾ ഉണ്ടായിരുന്നു.
“ഇത് പകൽ വെളിച്ചത്തിലായിരുന്നു. ഞങ്ങൾ പോലീസിനെ വിളിച്ചു, പക്ഷേ വേഗത്തിലുള്ള പ്രതികരണമൊന്നും ഉണ്ടായില്ല,” -അദ്ദേഹം പറഞ്ഞു. രണ്ട് സുരക്ഷാ ജീവനക്കാർക്ക് പരിക്കേറ്റു. സംഭവ സമയത്ത് 25 ജീവനക്കാർ കടയിൽ ഡ്യൂട്ടിയിലായിരുന്നു.
ഏറ്റുമുട്ടൽ- അറസ്റ്റുകൾ
കവർച്ചക്ക് തൊട്ടുപിന്നാലെ വാഹന പരിശോധനക്ക് ഉത്തരവിട്ടതായും സിസിടിവി ദൃശ്യങ്ങളിൽ നിന്നുള്ള കുറ്റവാളികളുടെ ചിത്രങ്ങൾ ജില്ലയിലുടനീളം പ്രചരിച്ചതായും ഭോജ്‌പുർ പോലീസ് പ്രസ്‌താവനയിൽ പറയുന്നു. തിങ്കളാഴ്‌ച രാത്രി ഒരു പോലീസ് സംഘം വാഹനങ്ങൾ പരിശോധിക്കുമ്പോൾ മൂന്ന് ബൈക്കുകളിലായി സംശയ ആസ്‌പദമായ ആറ് പേരെ കണ്ടു. നിർത്താൻ ആവശ്യപ്പെട്ടപ്പോൾ അവർ വേഗത്തിൽ ഓടി. ഇത് ഒരു ശക്തമായ പിന്തുടരലിന് തുടക്കമിട്ടു. ഒരു പോലീസ് കാർ അവരെ പിന്തുടർന്നു.
കവർച്ചക്കാർ വെടിയുതിർത്തു. പോലീസ് തിരിച്ച് വെടിവച്ചപ്പോൾ രണ്ട് കൊള്ളക്കാരുടെ കാലുകളിൽ വെടിയേറ്റു. അവരെ കസ്റ്റഡിയിലെടുത്ത് ചികിത്സയിലാണ്. “രണ്ട് പിസ്റ്റളുകൾ, പത്ത് വെടിയുണ്ടകൾ, രണ്ട് ബാഗുകളിലായി കൊള്ളയടിച്ച ആഭരണങ്ങൾ, ഒരു പൾസർ മോട്ടോർ സൈക്കിൾ എന്നിവ കണ്ടെടുത്തു.
മറ്റ് പ്രതികളെ അറസ്റ്റ് ചെയ്യാൻ റെയ്‌ഡുകൾ നടത്തുകയാണ്,” -പോലീസ് പറഞ്ഞു. കൊള്ളയടിച്ച പണത്തിൻ്റെ വലിയൊരു ഭാഗം (70 ശതമാനം) കൊള്ളക്കാരിൽ നിന്ന് കണ്ടെടുത്തതായി ചില റിപ്പോർട്ടുകൾ അവകാശപ്പെടുന്നുണ്ട്.
