നെന്മാറ ഇരട്ടകൊലപാതകക്കേസ് പ്രതി ചെന്താമരയെ റിമാൻഡ് ചെയ്തു. 14 ദിവസത്തേക്കാണ് ആലത്തൂർ ജുഡീഷ്യൽ ഒന്നാം ക്ലാസ് മജിസ്ട്രേറ്റ് റിമാൻഡ് ചെയ്‌തത്. തന്നെ എത്രയും വേഗം ശിക്ഷിക്കണമെന്ന് ചെന്താമര കോടതിയിൽ ആവശ്യപ്പെട്ടു.
മുൻ വൈരാഗ്യം വെച്ച് ആസൂത്രണത്തോടെ നടത്തിയ കൊലയെന്നാണ് സംഭവത്തിൽ പൊലീസ് കോടതിയിൽ സമ‍ർപ്പിച്ച റിമാൻ്റ് റിപ്പോർട്ട് പറയുന്നത്. മനസ്‌താപം ഇല്ലാത്ത കുറ്റവാളിയാണ് പ്രതിയെന്നും തൻ്റെ പദ്ധതി കൃത്യമായി നടപ്പാക്കിയതിൻ്റെ സന്തോഷം പ്രതിക്കുണ്ടെന്നും പൊലീസ് റിപ്പോർട്ടിൽ പറയുന്നു.
കൃത്യമായ ആസൂത്രണത്തോടെ ആണ് കൊലപാതകം നടത്തിയത്. ഇതിനായി ദിവസങ്ങൾക്ക് മുമ്പ് കൊടുവാൾ വാങ്ങിയെന്നും, പ്രതി പൊലീസിനെ തെറ്റിദ്ധരിപ്പിക്കാൻ ശ്രമിച്ചു. കൊലപാതകത്തിന് ശേഷം പോത്തുണ്ടി മലയിലേക്കാണ് പ്രതി ഓടിപ്പോയത്. ചെന്താമരയുടെ കുടുംബം അകലാൻ കാരണം സുധാകരനും അമ്മയുമാണെന്ന് വിശ്വസിച്ചു.
പ്രതിയിൽ നിന്ന് അയൽവാസികൾക്ക് തുടർച്ചയായ വധഭീഷണിയുണ്ട്. പ്രതി ജയിലിന് പുറത്തിറങ്ങിയാൽ സാക്ഷികൾക്ക് ഭീഷണിയുണ്ടെന്നും കുടുംബ വൈരാഗ്യം ഉള്ളതിനാൽ കൊല്ലപ്പെട്ട സുധാകരൻ്റെ രണ്ട് പെണ്മക്കൾക്കും ഭീഷണിയുണ്ടെന്നും റിപ്പോർട്ടിൽ പറയുന്നു. ആലത്തൂർ ജുഡീഷ്യൽ ഒന്നാം ക്ലാസ് മജിസ്ട്രേറ്റ് ആണ് 14 ദിവസത്തേക്ക് പ്രതിയെ ജുഡീഷ്യൽ കസ്റ്റഡിയിൽ വിട്ടത്.
താൻ എല്ലാം ചെയ്‌തത് ഒറ്റക്കാണെന്ന് ചെന്താമര പറഞ്ഞു. നൂറുവർഷം തന്നെ ശിക്ഷിക്കൂ… എന്നും മകളുടെയും മരുമകൻ്റെയും മുന്നിൽ തല കാണിക്കാൻ പറ്റില്ലെന്ന് ചെന്താമര കോടതിയിൽ പറഞ്ഞു. പരുക്കുകൾ ഉണ്ടോയെന്ന് ജഡ്‌ജി ചോദിച്ചപ്പോഴാണ് ചെന്താമരയുടെ പരാമർശം. തന്ത്രപരമായ നീക്കത്തിന് ഒടുവിലാണ് നെന്മാറ ഇരട്ടക്കൊലപാതകത്തിലെ പ്രതി ചെന്താമരനെ ചൊവാഴ്‌ച പൊലീസ് പിടികൂടിയത്. രാത്രി നെന്മാറ മാട്ടായിയിൽ കൂട്ടതിരച്ചിൽ നടന്ന സമയത്ത് തന്നെ പ്രതി പോലീസ് കസ്റ്റഡിയിൽ ആവുകയായിരുന്നു.
27-നാണ് നെന്മാറയിൽ ജാമ്യത്തിലിറങ്ങിയ കൊലക്കേസ് പ്രതിയായ ചെന്താമര അയൽവാസികളായ അമ്മയെയും മകനെയും വെട്ടിക്കൊലപ്പെടുത്തിയത്. സുധാകരനും അമ്മ മീനാക്ഷിയുമാണ് കൊല്ലപ്പെട്ടത്. സുധാകരൻ്റെ ഭാര്യ സജിതയെ 2019ൽ വെട്ടിക്കൊലപ്പെടുത്തിയ കേസിൽ ജയിലിലായിരുന്ന ചെന്താമര രണ്ട് മാസം മുമ്പാണ് ജാമ്യത്തിലിറങ്ങിയത്.
പ്രാഥമിക അന്വേഷണത്തിൽ മനസിലായത് പ്രതി നടത്തിയത് ആസൂത്രിത കൊലപാതകമാണെന്ന് പാലക്കാട് എസ്.പി അജിത് കുമാർ ഐപിഎസ് പറഞ്ഞു. നല്ല മുന്നൊരുക്കത്തോട് കൂടിയാണ് എല്ലാം ചെയ്‌തിരിക്കുന്നത്. രാവിലെ 10 മണിക്കായിരുന്നു ചെന്താമര സുധാകരനെയും അമ്മ ലക്ഷ്‌മിയെയും കൊലപ്പെടുത്തിയത്. പ്രതിയ്ക്ക് കുറ്റബോധമില്ലെന്നും ചെയ്‌ത കൃത്യതയിൽ ഇയാൾ സന്തോഷവാനാണെന്നും എസ്.പി പറഞ്ഞു.
കൊലപാതകത്തിനായി ഇയാൾ എവഞ്ചേരിയിൽ നിന്നാണ് കൊടുവാൾ പണിയിപ്പിച്ചെടുത്തത്. കോട്‌വാലിലെ മരപ്പിടി സ്വയം ഉണ്ടാക്കി സൂക്ഷിക്കുകയാണ് പ്രതി ചെയ്‌തത്. ഇതേ സമയം പ്രതി അയൽവാസിയായ സുധാകരനെ നിരീക്ഷിച്ചു വരികയുണ്ടായിരുന്നു. തിങ്കളാഴ്‌ച വീട്ടിൽ നിന്നും പുറത്തിറങ്ങിയ സുധാകരനെ പ്രതി കൊടുവാൾ കാട്ടി ബൈക്ക് തടഞ്ഞു നിർത്തുകയും ഇരുകാലുകളുടെ പിൻഭാഗത്തും കഴുത്തിന് പിന്നിലും വെട്ടി വീഴ്ത്തുകയായിരുന്നു.
ഹെൽമെറ്റ് തെറിച്ചുവീണ സുധാകരൻ്റെ മുഖത്തും വലതുകൈയിലും പ്രതി മാരകമായി വെട്ടുകയായിരുന്നു. സുധാകരൻ്റെ നിലവിളികേട്ട് പുറത്തിറങ്ങിയ അമ്മ ലക്ഷ്‌മിയെയും കൊല്ലണമെന്ന ഉദ്ദേശത്തോട് കൂടി തലയിലും ശരീര ഭാഗങ്ങളിലും പ്രതി വെട്ടിയെന്നും റിമാൻഡ് റിപ്പോർട്ടിൽ വ്യക്തമാക്കുന്നു.
