ടെക്‌സസിലെ ബോക്കാ ചിക്ക ബീച്ച് പ്രദേശത്ത് സ്പേസ് എക്‌സ് ജീവനക്കാർക്കായി പ്രത്യേക മുനിസിപ്പാലിറ്റി സ്ഥാപിക്കാൻ ഇലോൺ മസ്‌ക് തയ്യാറെടുക്കുന്നു. നേരത്തെ ഈ പദ്ധതി സംബന്ധിച്ച് റിപ്പോർട്ടുകൾ പുറത്തുവന്നിരുന്നുവെങ്കിലും, ഇതിന് പുതിയ പ്രോത്സാഹനം നൽകിയിരിക്കുന്നത് സ്പേസ് എക്‌സ് ജീവനക്കാർ കാമറോൺ കൗണ്ടിയിൽ സമർപ്പിച്ച നിവേദനമാണ്.
റോക്കറ്റ് ലോഞ്ചിങ് സ്റ്റേഷന്റെ സമീപത്ത് പ്രവർത്തനക്ഷമമായ മുനിസിപ്പാലിറ്റി വേണമെന്ന് ആവശ്യപ്പെടുന്ന ഈ നിവേദനം ഇപ്പോൾ ചർച്ചയായി മാറിയിരിക്കുകയാണ്. മസ്‌ക് നയിക്കുന്ന ഈ പദ്ധതി യാഥാർഥ്യമാവുകയാണെങ്കിൽ, ജീവനക്കാർക്കായി കമ്പനി നടത്തുന്ന ചരിത്രനേട്ടമായിരിക്കും ഇതെന്ന് വിലയിരുത്തപ്പെടുന്നു.
പദ്ധതി നടപ്പാക്കാൻ ബന്ധപ്പെട്ട അധികൃതരിൽ നിന്ന് അനുമതി ലഭിച്ചാൽ, സ്പേസ് എക്സിന്‍റെ സെക്യൂരിറ്റി മാനേജർ ആദ്യ മേയറായി സ്ഥാനമേൽക്കുമെന്നാണ് റിപ്പോർട്ടുകൾ സൂചിപ്പിക്കുന്നത്. ടെക്‌സസിലെ തീരപ്രദേശമായ സൗത്ത് ടെക്‌സാസിൽ സ്റ്റാർബേസ് എന്ന മുനിസിപ്പാലിറ്റി ആരംഭിക്കുക മസ്‌ക് നാളുകളായി സ്വപ്നം കണ്ട പദ്ധതിയാണെന്നാണ് അറിയുന്നത്.
ബോക്കാ ചിക്ക ബീച്ചിന് സമീപം നാല് കിലോമീറ്ററോളം പ്രദേശത്ത് സ്റ്റാർബേസ് നിർമ്മിക്കുക എന്ന് പദ്ധതിയിടുന്നു. നിലവിൽ റോക്കറ്റ് ലോഞ്ചിങ് സ്റ്റേഷന്റെ സമീപത്ത് കൂടുതൽ ജീവനക്കാർ കുടിയേറിത്തുടങ്ങിയിരിക്കുകയാണ്, ഇതും സ്റ്റാർബേസ് പദ്ധതി വീണ്ടും ചർച്ചയിൽ ഇടംപിടിക്കാൻ കാരണമായി.
500 ഓളം ആളുകൾ, അതിൽ നൂറിലധികം കുട്ടികളുള്ള ഒരു സമൂഹം ഈ നഗരത്തിൽ ഉണ്ടാകും എന്നാണ് സൂചന. സ്റ്റാർബേസ് നിർമാണത്തിനായുള്ള ചർച്ചകൾക്ക് ഈ സാഹചര്യവും കൂടുതൽ പ്രാധാന്യം നൽകുന്നു.
മസ്‌കിന്‍റെ സാമ്പത്തിക സവിശേഷതകൾ
ബ്ലൂംബെർഗ് ബില്യണയേഴ്‌സ് ഇൻഡക്സ് പ്രകാരം 400 ബില്യൺ ഡോളർ ആസ്തിയുള്ള ആദ്യ വ്യക്തിയായാണ് ഇലോൺ മസ്‌ക് അറിയപ്പെടുന്നത്. മസ്‌ക് നയിക്കുന്ന ഈ ടൗൺഷിപ്പ് പദ്ധതി, സ്വകാര്യ കമ്പനിയുടെ തൊഴിലാളികൾക്കായി നഗരസൂത്രണം നടത്തുന്ന ആദ്യ മുന്നേറ്റങ്ങളിലൊന്നായി ചരിത്രത്തിലിടംപിടിക്കുമെന്ന് വിലയിരുത്തപ്പെടുന്നു.
