മലയാള സിനിമ ചരിത്രത്തിൽ ഇന്നുവരെ കാണാത്ത തരത്തിലുള്ള പുതിയ പ്രചാരണ തന്ത്രവുമായി എം എ നിഷാദ് സംവിധാനം ചെയ്യുന്ന ‘ഒരു അന്വേഷണത്തിന്റെ തുടക്കം’ സിനിമ ടീം. സിനിമയുടെ പ്രമോഷനായി 185 അടി വലിപ്പമുള്ള സിനിമ പോസ്റ്റർ ഒരുക്കിയിരിക്കുകയാണ് അണിയറ പ്രവർത്തകർ.പൊന്നാനി കർമ ബീച്ചിന് സമീപമുള്ള റോഡിനോട് ചേർന്നുള്ള ചുവരിലാണ് ഈ ഭീമാകാരൻ പോസ്റ്റർ പതിച്ചിരിക്കുന്നത്.
ബെൻസി പ്രൊഡക്ഷൻസിന്റെ ബാനറിൽ കെ വി അബ്ദുൽ നാസർ നിർമ്മിച്ച് എം എ നിഷാദ് രചനയും സംവിധാനവും നിർവഹിക്കുന്ന ചിത്രത്തിൽ ഷൈൻ ടോം ചാക്കോ, വാണീ വിശ്വനാഥ്, സമുദ്രക്കനി, മുകേഷ്, ശിവദ, സ്വാസിക, ദുർഗാ കൃഷ്ണ, ജോണി ആന്റണി, മഞ്ജു പിള്ള, പ്രശാന്ത് അലക്സ് തുടങ്ങി 64 ഓളം താരങ്ങൾ വേഷമിടുന്നുണ്ട്.
ഇൻവെസ്റ്റിഗേഷൻ സസ്പെൻസ് ത്രില്ലർ ജോണറിൽ ഇറങ്ങുന്ന ഒരു അന്വേഷണത്തിന്റെ തുടക്കം എന്ന ചിത്രത്തിന്റെ കഥ നിഷാദിന്റെ പിതാവും ഉന്നത പൊലീസ് ഉദ്യോഗസ്ഥനുമായ പി എം കുഞ്ഞിമൊയ്തീന്റെ കേസ് ഡയറിയിൽ നിന്നുമാണ് തിരഞ്ഞെടുത്തിരിക്കുന്നത്.
ദീർഘകാലം ക്രൈംബ്രാഞ്ച് എസ്പിയായും പിന്നീട് ഇടുക്കി എസ്പിയായും പ്രവർത്തിച്ചു പോന്ന കുഞ്ഞി മൊയ്തീൻ മധ്യമേഖല ഡിഐജിയായും ക്രൈംബ്രാഞ്ച് ഡിഐജിയായും പ്രവർത്തിച്ചതിനു ശേഷമാണ് സർവ്വീസിൽ നിന്നും വിരമിച്ചത്. വിശിഷ്ട സേവനത്തിന് രണ്ടു പ്രാവശ്യം ഇന്ത്യൻ രാഷ്ട്രപതിയിൽനിന്ന് സ്വർണ്ണ മെഡൽ കരസ്ഥമാക്കിയിട്ടുണ്ട്.
നിഷാദ് തന്നെയാണ് തിരക്കഥ തയ്യാറാക്കിയിരിക്കുന്നത്. ഈ ചിത്രത്തിലെ മുഖ്യമായ ഒരു കഥാപാത്രത്തെ നിഷാദ് അവതരിപ്പിക്കുന്നുമുണ്ട്. ചിത്രീകരണത്തിന് മുമ്പായി ചിത്രത്തിലെ പൊലീസ് കഥാപാത്രങ്ങളെ അവതരിപ്പിക്കുന്ന അഭിനേതാക്കൾക്ക് മുൻ ഡിജിപി ലോക്നാഥ് ബെഹ്റയുടേയും, റിട്ട ക്രൈംബ്രാഞ്ച് എസ്പി ഷാനവാസിന്റേയും സാന്നിദ്ധ്യത്തിൽ പരിശീലന ക്ലാസ് സംഘടിപ്പിച്ചിരുന്നു.
