ലോകത്തെ ഏറ്റവും വലിയ പ്രകൃതിദത്ത പൂന്തോട്ടമായി പ്രശസ്തി നേടിയ ദുബായ് മിറാക്കൽ ഗാർഡൻ വിനോദ സഞ്ചാരികൾക്കായി വീണ്ടും തുറന്നു. പതിമൂന്നാമത് സീസൺ ആരംഭിക്കുന്ന മിറാക്കൽ ഗാർഡൻ, ലോകത്തിൻ്റെ വിവിധ ഭാഗങ്ങളിൽ നിന്ന് എത്തുന്ന സന്ദർശകരെ നാനാവിധ പുഷ്പങ്ങളാലാണ് വരവേൽക്കുന്നത്. പുതു സീസണിൻ്റെ ഭാഗമായി യുഎഇയിലെ നിവാസികൾക്ക് ടിക്കറ്റ് നിരക്കിൽ ഇളവ് ലഭ്യമാണ്.
എമിറേറ്റ്സ് ഐഡിയുമായി എത്തിയാൽ മുതിർന്നവർക്കും കുട്ടികൾക്കും 60 ദിർഹമാണ് പ്രവേശന നിരക്ക്. മുൻ വർഷങ്ങളിൽ 65 ദിർഹമായിരുന്നതിൽ നിന്ന് ഈ വർഷം അഞ്ച് ദിർഹം കുറവാണ് ഈടാക്കുന്നത്. മൂന്ന് വയസിന് താഴെയുള്ള കുട്ടികൾക്ക് സൗജന്യ പ്രവേശനവും ലഭ്യമാണ്.
വിദേശ വിനോദ സഞ്ചാരികൾക്ക് ടിക്കറ്റ് നിരക്ക് അഞ്ച് ദിർഹം വർധിപ്പിച്ചിട്ടുണ്ട്. മുതിർന്നവരിൽ നിന്ന് 100 ദിർഹവും, കുട്ടികളിൽ നിന്ന് 85 ദിർഹവുമാണ് ഈടാക്കുക. ഓൺലൈൻ ബുക്കിംഗുകൾക്കും തുടക്കം കുറിച്ചതായി ഡിഎംജി (ദുബായ് മിറാക്കൽ ഗാർഡൻ) അറിയിച്ചു.
150 ദശലക്ഷത്തിലധികം പൂക്കളുമായി 120 ഇനങ്ങളിലുള്ള പുഷ്പങ്ങളാണ് ഓരോ വർഷവും മിറാക്കൽ ഗാർഡനിൽ പ്രദർശിപ്പിക്കുന്നത്. 500,000ലധികം പൂക്കൾ ഉപയോഗിച്ച് രൂപപ്പെടുത്തിയ എമിറേറ്റ്സ് എ380 വിമാനത്തിന്റെ മാതൃക ഇത്തവണയും പ്രധാന ആകർഷണമായിരിക്കും. കൂടാതെ, ‘കുട ടണൽ’, ‘ലേക്ക് പാർക്ക്’ എന്നിവയും പൂന്തോട്ടത്തിൻ്റെ പ്രധാന ആകർഷണങ്ങളായി നിലകൊള്ളുന്നു. സ്മർഫുകളെ അടങ്ങിയ വിഷുവൽ തീമുകളും ഇവിടെ പ്രദർശനത്തിലുണ്ട്.
2013 ഫെബ്രുവരി 14-ന് വാലൻ്റെൻസ് ദിനത്തിൽ ആദ്യമായി തുറന്ന മിറാക്കൽ ഗാർഡൻ തിങ്കൾ മുതൽ വെള്ളി വരെ രാവിലെ 9 മണി മുതൽ രാത്രി 9 വരെ പ്രവർത്തിക്കും. ശനി, ഞായർ ദിവസങ്ങളിൽ രാവിലെ 9 മണി മുതൽ രാത്രി 11 വരെയാണ് പ്രവർത്തന സമയം.
