പ്രശസ്ത ചലച്ചിത്ര നടൻ വിജയ് ദേവരകൊണ്ട തന്റെ ജന്മനാട്ടുമായി ബന്ധപ്പെട്ട് ഒരു നിർണായക തീരുമാനം പ്രഖ്യാപിച്ചു. വിവാഹശേഷം സ്വന്തം ഗ്രാമത്തിലെത്തിയ താരം, അടുത്ത അധ്യയന വർഷം മുതൽ അച്ചംപേട്ട് ഡിവിഷനിലെ വിദ്യാർത്ഥികൾക്ക് സ്കോളർഷിപ്പ് നൽകുമെന്ന് അറിയിച്ചു. വിജയ് ദേവരകൊണ്ടയും നടി രശ്മിക മന്ദാനയും കഴിഞ്ഞ മാസമാണ് വിവാഹിതരായത്.
ഇന്ന് ഭാര്യയോടൊപ്പം താരം നാഗർകുർണൂൽ ജില്ലയിലെ ബാലമൂർ മണ്ഡലത്തിലെ തുമ്മൻപേട്ടിൽ എത്തി. അടുത്തിടെ ഇവിടെ ഇവർ ഒരു ഫാംഹൗസും നിർമ്മിച്ചിട്ടുണ്ട് . ദമ്പതികളെ ഗ്രാമവാസികളും ആരാധകരും ഡ്രമ്മുകളും കോലാടവും അണിനിരത്തി സ്വീകരിച്ചു. വീട്ടിൽ പ്രവേശിച്ച ശേഷം തുളസിച്ചെടിക്ക് ചുറ്റും പ്രദക്ഷിണം നടത്തിയതോടൊപ്പം സത്യനാരായണ സ്വാമി വ്രതത്തിലും പങ്കെടുത്തു.
തുടർന്ന് ഗ്രാമവാസികളെ അഭിസംബോധന ചെയ്ത വിജയ്, 32 വർഷം മുമ്പ് കുടുംബം തുമ്മൻപേട്ടിൽ നിന്ന് താമസം മാറിയെങ്കിലും ഗ്രാമവാസികളുമായുള്ള ബന്ധം ഇന്നും അറ്റുപോകാത്തതാണെന്ന് പറഞ്ഞു. തന്റെ ആദ്യ ജന്മദിനം ജന്മനാട്ടിൽ ആഘോഷിച്ചുവെന്ന് മാതാപിതാക്കൾ പറഞ്ഞതായി അദ്ദേഹം ഓർമ്മിപ്പിച്ചു. പിതാവിന്റെ ആഗ്രഹപ്രകാരമാണ് ഇവിടെ വീട് പണിതതെന്നും, എല്ലാവർക്കും വിരുന്നൊരുക്കാൻ കഴിഞ്ഞതിൽ സന്തോഷമുണ്ടെന്നും വ്യക്തമാക്കി.
ഗ്രാമ ഹൈസ്കൂളിലെ 9, 10 ക്ലാസുകളിൽ ഏറ്റവും കൂടുതൽ മാർക്ക് നേടിയ വിദ്യാർത്ഥികൾക്ക് ഈ അധ്യയന വർഷം മുതൽ സ്കോളർഷിപ്പ് നൽകുമെന്ന് താരം പ്രഖ്യാപിച്ചു. ഒന്നാം, രണ്ടാം സ്ഥാനങ്ങൾ നേടുന്ന വിദ്യാർത്ഥികൾക്ക് ആനുകൂല്യം ലഭിക്കും. അടുത്ത അധ്യയന വർഷം മുതൽ അച്ചംപേട്ട് ഡിവിഷനു കീഴിലുള്ള 44 സ്കൂളുകളിൽ പദ്ധതി നടപ്പിലാക്കുമെന്നും അദ്ദേഹം അറിയിച്ചു.
