വെള്ള ടീഷര്‍ട്ട് ധരിച്ചുകൊണ്ടുള്ള പ്രചാരണത്തിന് ആഹ്വാനം നല്‍കി കോണ്‍ഗ്രസ് എം പി രാഹുല്‍ ഗാന്ധി. നമ്മുടെ രാജ്യത്തെ യുവാക്കളും തൊഴിലാളികളും വെള്ള ടീഷര്‍ട്ട് ധരിച്ച് അസമത്വത്തിന് എതിരായ മുന്നേറ്റത്തില്‍ പങ്കു ചേരണം. സര്‍ക്കാര്‍ ചില വ്യവസായികളെ മാത്രം സഹായിക്കുന്നതിന് എതിരെ വെള്ള ടീഷര്‍ട്ട് ധരിച്ച് പ്രതിഷേധിക്കണം. പ്രചാരത്തില്‍ പങ്കു ചേരാനായി വെബ്‌സൈറ്റും തയാറാക്കിയിട്ടുണ്ട്. പരമാവധി ആളുകള്‍ വെള്ള ടീഷര്‍ട്ട് ധരിച്ച് സഹകരിക്കണമെന്നും രാഹുല്‍ ഗാന്ധി അഭ്യര്‍ത്ഥിച്ചു.
അതെസമയം, രാഹുല്‍ ഗാന്ധിയുടെ ഭരണകൂടത്തിനെതിരായി പോരാടുക എന്ന പരാമര്‍ശത്തിനെതിരെ എഫ് ഐ ആര്‍ രജിസ്റ്റര്‍ ചെയ്തു. രാഹുൽ നടത്തിയ പരാമര്‍ശം രാജ്യസുരക്ഷയ്ക്ക് ഭീഷണിയാണെന്ന് പരാതിയില്‍ ആരോപിക്കുന്നു . കോൺഗ്രസ് തെരഞ്ഞെടുപ്പുകളില്‍ തുടര്‍ച്ചയായി പരാജയപ്പെടുന്നതിലുള്ള നിരാശയാണ് രാഹുല്‍ പങ്കുവയെക്കുന്നതെന്നും എന്നാല്‍ ഭരണകൂടത്തിനെതിരെയുള്ള യുദ്ധപ്രഖ്യാപനമാണിതെന്നും പരാതിയിലുണ്ട്.
അസമിലായിരുന്നു വിവാദ പരാമര്‍ശത്തിനെതിരെ എഫ് ഐ ആര്‍ ഫയല്‍ ചെയ്തത് . മോന്‍ജിത് ചോട്യ എന്ന വ്യക്തി നൽകിയ പരാതിയിലാണ് കേസ്. ഗുവാഹത്തിയിലുള്ള പാന്‍ ബസാര്‍ പൊലീസാണ് ഭാരതീയ ന്യായ സംഹിതയിലെ 152, 197(1) വകുപ്പുകൾ പ്രകാരം കേസ് എടുത്തത്.
