ഇന്നത്തെ കാലത്ത് കുട്ടികളുടെ സ്മാർട്ഫോൺ ഉപയോഗം പൂർണ്ണമായും ഒഴിവാക്കുക എന്നത് അസാധ്യമായ കാര്യമാണ്. ഇതിന് പരിഹാരമെന്നോണം 13 വയസ്സിൽ താഴെയുള്ള കുട്ടികൾക്കായി രക്ഷിതാക്കളുടെ നിയന്ത്രണത്തിൽ പ്രവർത്തിക്കുന്ന പുതിയ അക്കൗണ്ട് ഫീച്ചർ മെറ്റ അവതരിപ്പിച്ചു. വാട്സാപ്പിൽ കുട്ടികളുമായി ആർക്കൊക്കെ ബന്ധപ്പെടാമെന്നും അവർക്ക് ഏതൊക്കെ ഗ്രൂപ്പുകളിൽ ചേരാമെന്നും തീരുമാനിക്കാൻ ഈ പുതിയ സംവിധാനം രക്ഷിതാക്കളെ സഹായിക്കുന്നു. സുരക്ഷിതമായ ഉപയോഗം പ്രോത്സാഹിപ്പിക്കുന്നതിനായി ഗൂഗിളിന്റെ ഫാമിലി ലിങ്ക് പോലുള്ള സംവിധാനങ്ങൾക്ക് സമാനമായാണ് വാട്സാപ്പും ഈ മാറ്റം കൊണ്ടുവന്നിരിക്കുന്നത്.
കുട്ടികളുടെ വാട്സാപ്പ് ഉപയോഗം സന്ദേശങ്ങൾ അയക്കുന്നതിനും വിളിക്കുന്നതിനും മാത്രമായി പരിമിതപ്പെടുത്താനാണ് പുതിയ ‘പേരന്റൽ കൺട്രോൾ’ ഫീച്ചറുകൾ രൂപകല്പന ചെയ്തിരിക്കുന്നത്. അപരിചിതരിൽ നിന്നുള്ള സന്ദേശങ്ങൾ പരിശോധിക്കാനും അക്കൗണ്ടിന്റെ പ്രൈവസി സെറ്റിങ്സ് നിയന്ത്രിക്കാനും ഇതിലൂടെ രക്ഷിതാക്കൾക്ക് സാധിക്കും. കുട്ടികൾക്ക് അവരുടെ വാട്സാപ്പ് സെറ്റിങ്സ് സ്വന്തമായി മാറ്റാൻ കഴിയില്ലെന്നും ഇതിനായി പ്രത്യേക പിൻ നമ്പർ (Parent PIN) ആവശ്യമാണെന്നും കമ്പനി വ്യക്തമാക്കിയിട്ടുണ്ട്. ഐഫോണിലോ ആൻഡ്രോയിഡിലോ വാട്സാപ്പിന്റെ ഏറ്റവും പുതിയ പതിപ്പുള്ള ഉപകരണങ്ങളിൽ ഈ സേവനം ലഭ്യമാകും.
പുതിയ അക്കൗണ്ട് തുടങ്ങുന്നതിനായി കുട്ടിയുടെ ഫോണും രക്ഷിതാവിന്റെ ഫോണും അടുത്തടുത്ത് വെച്ച് അക്കൗണ്ടുകൾ തമ്മിൽ ബന്ധിപ്പിക്കേണ്ടതുണ്ട്. കുട്ടിയുടെ ഫോണിൽ വാട്സാപ്പ് ഡൗൺലോഡ് ചെയ്ത ശേഷം ‘ക്രിയേറ്റ് എ പേരന്റ് മാനേജ്ഡ് അക്കൗണ്ട്’ എന്ന ഓപ്ഷൻ തിരഞ്ഞെടുത്ത് ഫോൺ നമ്പറും പ്രായവും വെരിഫൈ ചെയ്യണം. തുടർന്ന് കുട്ടിയുടെ ഫോണിൽ തെളിയുന്ന ക്യുആർ കോഡ് രക്ഷിതാവിന്റെ ഫോൺ ഉപയോഗിച്ച് സ്കാൻ ചെയ്ത് അക്കൗണ്ടുകൾ തമ്മിൽ ലിങ്ക് ചെയ്യാവുന്നതാണ്. രക്ഷിതാവ് ഒരു മുതിർന്ന വ്യക്തിയാണെന്ന് സ്ഥിരീകരിച്ച ശേഷമാണ് ഈ നടപടികൾ പൂർത്തിയാക്കേണ്ടത്.
ഈ നടപടികൾക്ക് ശേഷം രക്ഷിതാവ് സ്വന്തം ഫോണിൽ ആറക്കങ്ങളുള്ള ഒരു പേരന്റ് പിൻ സജ്ജമാക്കണം. ഈ പിൻ നമ്പർ യാതൊരു കാരണവശാലും കുട്ടിയുമായി പങ്കുവെക്കാൻ പാടില്ലാത്തതാണ്. ഈ പിൻ നമ്പർ ഉപയോഗിച്ച് അക്കൗണ്ട് സെറ്റിങ്സ് പൂർത്തിയാക്കിയാൽ കുട്ടിക്ക് പേരും പ്രൊഫൈൽ ഫോട്ടോയും നൽകി അക്കൗണ്ട് ഉപയോഗിച്ചു തുടങ്ങാം. കുട്ടികളുടെ ഓൺലൈൻ സുരക്ഷ ഉറപ്പാക്കുന്നതിൽ ഈ പുതിയ ഫീച്ചർ വലിയൊരു ചുവടുവെപ്പാകുമെന്നാണ് കരുതപ്പെടുന്നത്.
