| ഡോ. ഉല്ലാസ് സെബാസ്റ്റ്യൻ
motivation എന്ന വാക്കിനുള്ള ശക്തി ആര്‍ക്കും പെട്ടന്ന് മനസിലായെന്നു വരില്ല. പ്രേരണ, ലക്ഷ്യബോധം, ഉത്സാഹം, പ്രചോദനം എന്നിവയാണീ ആംഗലേയ പദത്തിനര്‍ത്ഥം. എന്നാല്‍ സുദീര്‍ഘങ്ങളായ അറിവുകളും, പഠനങ്ങളും വിരല്‍ചൂണ്ടുന്നത് ‘ ലക്ഷ്യബോധം’ എന്ന മലയാളം വാക്കാണ്‌ motivation എന്ന ഇംഗ്ലീഷ് പദത്തിന് തുല്യം നിൽക്കുന്നത്.
ജീവിതത്തിന്റെ വിലയേറിയ ഏടുകളില്‍ നിന്നും മനസിലാക്കിയെടുത്ത വളരെക്കുറച്ചു കാര്യങ്ങള്‍ മാത്രം ഉള്‍ക്കൊള്ളിച്ചിട്ടുള്ള കുത്തിക്കുറിക്കലുകളാണ് 'സ്വപ്നങ്ങളെ എങ്ങനെ സ്വന്തമാക്കാം' എന്ന ഈ ലേഖനം. motivation ന്- വേണ്ടുന്ന അഞ്ച് പടികളെയാണീ ലേഖനത്തില്‍ ഉള്‍ക്കൊള്ളിക്കാന്‍ ശ്രമിച്ചിട്ടുള്ളത്.
ഈ ലേഖനത്തിൽ നിന്നും ജീവിതത്തിലേക്ക് പറിച്ചുനടാനും, നാമറിയാതെ നമ്മുടെയുള്ളില്‍ വളര്‍ന്നു വന്ന കളകളെ പിഴുതുകളയാനും ഈ ലേഖനത്തിന്റെ സഹായത്താല്‍ നിങ്ങള്‍ക്ക് സാധിക്കട്ടെ!
സ്വപ്നങ്ങളെ എങ്ങനെ സ്വന്തമാക്കാം എന്നതിനെക്കുറിച്ച് പഠിക്കുന്നതിനും, അതിലേക്ക് എത്തിച്ചേരുന്നതിനും മുമ്പ് സ്വപ്നം എങ്ങനെ കാണണമെന്നും, വിജയത്തിലേക്ക് എങ്ങനെ എത്തിച്ചേരണമെന്നും നമുക്കാദ്യം മനസ്സിലാക്കാം. സ്വപ്നം എന്നത് ഉറക്കത്തിനിടയില്‍ വിരുന്നു വരുന്ന ഒന്നല്ല. മറിച്ച്, അനുഭവങ്ങളില്‍ നിന്നും ആഗ്രഹങ്ങളുടെ മൂര്‍ത്തീമദ് ഭാവങ്ങൾക്കിടയില്‍നിന്നും പരപ്രേരണയില്ലാതെ വന്നു ഭവിക്കുന്ന ജീവിക്കാനുള്ള ത്വരയാണ് സ്വപ്നം. സ്വപ്നം മലര്‍ന്ന് കിടന്ന്‍ നേടേണ്ട ഒന്നല്ല. കഠിനാധ്വനത്താല്‍ മാത്രം ഏതൊരുവനും നേടിയെടുക്കാവുന്ന ഒന്നു മാത്രമാണ് സ്വപനം. സ്വപ്നം എന്നതിലേക്ക് എത്തിച്ചേരണമെങ്കില്‍ ആദ്യം നമുക്ക് ഒരു ലക്ഷ്യവും, ലക്ഷ്യത്തെക്കുറിച്ചുള്ള വ്യക്തതയാര്‍ന്ന ഒരു ലക്ഷ്യബോധവുമാണ് നമുക്കോരോരുത്തര്‍ക്കും വേണ്ടത്.എവിടെനിന്നുമാണ് ലക്ഷ്യബോധത്തെക്കുറിച്ചുള്ള പ്രചോദനം കിട്ടുക?
ഈ പ്രചോദനത്തിന് വേണ്ടുന്ന പടികള്‍ ഏതൊക്കെയാണ്?
ലക്ഷ്യബോധം എല്ലായ്പ്പോഴും മറ്റൊരാള്‍ക്ക് ചൂണ്ടിക്കാണിക്കുക സാധ്യമാണോ?
നിങ്ങളൊരു ബിസിനസിനിറങ്ങുമ്പോളും, പുതിയൊരു ജോലിക്കുള്ള അവസരം തേടുമ്പോഴും , ഓണ്‍ലൈനില്‍ അവസരത്തിനായി പരതുമ്പോഴും, സമയം ധാരാളമായി നിങ്ങള്‍ക്ക് വേണ്ടിവന്നെന്നു വരാം. ഇങ്ങനെയുള്ള വെല്ലുവിളികളെ ഒരു (motivation) പ്രചോദനമായിട്ടെടുക്കാം.
ചിലപ്പോള്‍ വിശ്രമമെന്തെന്നറിയാതെ മാസങ്ങളും, വര്‍ഷങ്ങളും നാം അലഞ്ഞെന്നിരിക്കാം. ഇതിനിടയില്‍ അത്യാവശ്യത്തിനു കുറച്ചു പണം തികയുമ്പോള്‍ നമ്മില്‍ ചിലര്‍ പറയും "യെസ്, ഞാൻ നേടി". പക്ഷെ, ജീവിതത്തില്‍ പണമാണോ വലുത്, അതോ ഭാവിയുടെ കുരുന്നുകള്‍ക്ക് അഭിമാനിക്കാനും, മാതൃകയക്കാനും പറ്റുന്ന ഒരു വ്യക്തിത്വം(പേര് ) നേടിയെടുക്കുന്നതാണോ വലുത്. ഈ ജീവിതത്തില്‍ നമുക്കുകിട്ടുന്ന ഏറ്റവും വലിയ സമ്പാദ്യം ഒരു നല്ല പേര് കിട്ടുകയെന്നതാണ്'!
ബീര്‍ബല്‍ കഥകളില്‍ വളരെ പ്രസക്തമായ ഒരു കഥയുണ്ട്, പെരുങ്കള്ളനായ സഹസ്രമല്ലനെക്കുറിച്ചാണാക്കഥ . രാജ്യവും രാജകൊട്ടരവും വരെ കൊള്ളയടിച്ച സഹസ്രമല്ലന്‍ അവസാനം ബീര്‍ബല്ലിന്‍റെ പടയാളികളുടെ പിടിയിലകപ്പെട്ടു. വിധിയുടെ നാള്‍ സഹസ്രമല്ലന്‍ ബീര്‍ബലിനോട് അയാളുടെ അമ്മയോട് അവസാനമായി ഒന്ന് സംസാരിക്കണമെന്ന് ആവശ്യപ്പെട്ടു. ബീര്‍ബല്‍ അമ്മയോട് സംസാരിക്കാനുള്ള സമയം അയാള്‍ക്ക് അനുവദിച്ചു നല്‍കി . ആ ള്‍ക്കൂട്ടത്തിന്റെ ഇടയില്‍ നില്‍ക്കുന്ന സഹസ്രമല്ലന്‍റെ അമ്മ മുമ്പോട്ടെക്ക് കയറിവന്നു. അമ്മയോട് സംസാരിക്കുന്നതിനിടയില്‍ സഹസ്രമല്ലന്‍ അമ്മയുടെ ചെവി കടിച്ചുമുറിച്ചെടുത്തു. ബീര്‍ബല്‍ ഉടനടി ഈ പ്രശ്നത്തില്‍ ഇടപെട്ടു. സഹസ്രമല്ലന്‍ പറഞ്ഞു, "ഗുരുകുലത്തില്‍നിന്ന് പഠിക്കുന്നതിനിടയില്‍ ഞാന്‍ മോഷ്ടിച്ചുകൊണ്ടുവന്നിരുന്ന ചെറിയ വസ്തുക്കള്‍ കണ്ടിട്ടുള്ള അമ്മ ഒരിക്കല്‍പ്പോലും എന്നെ ഇത് തെറ്റാണെന്ന് പറഞ്ഞു തന്നിട്ടില്ല. പകരം ഞാന്‍ കൊണ്ടുവന്നിരുന്ന സാധങ്ങള്‍ വാങ്ങിവെക്കാനും, വിറ്റ് പണം ഉണ്ടാക്കാനായിരുന്നു അമ്മ അന്ന് ശ്രമിച്ചിരുന്നത്."
ബീര്‍ബല്‍ സഹസ്രമല്ലനു മാപ്പുകൊടുക്കുകയും, അയാളെ സൈന്യാധിപനാക്കുകയും ചെയ്തുവെന്നാണ് കഥയില്‍ പറഞ്ഞിരിക്കുന്നത്. ഇതേപോലെ, അറിഞ്ഞോ അറിയാതെയോ ആണ് നാമും അടുത്ത തലമുറയ്ക്ക് മാതൃകയാകുന്നത്‌. എങ്ങനെ ലക്ഷ്യബോധത്തില്‍ ഉറച്ച് നിലനില്‍ക്കാനാവും?
ലക്ഷ്യബോധത്തില്‍ ഉറച്ചുനില്‍ക്കുകയും, വിജയം വരെ ആ ലക്ഷ്യത്തില്‍ ഉത്സാഹത്തോടെ നില്‍ക്കുന്നവരാണ് നമ്മുടെ മുമ്പില്‍ യഥാര്‍ത്ഥ വിജയം വരിച്ച ആളുകൾ അല്ലെങ്കിൽ നാം മാതൃകാപുരുഷൻ എന്ന ഗണത്തിൽ പെടുത്തി മാതൃകയാക്കാൻ ശ്രമിക്കുന്നവർ. കൂടുതല്‍ പേരും. അവിടെയുമിവിടെയുമായി അവസരങ്ങള്‍ തേടും, ശേഷം പുതിയ ഒരു ദിശയിലേക്കു നടക്കും. അവിടെ പണസമ്പാദനം സാധ്യമായെന്നു വരാം. പക്ഷെ, ഇതൊരു ഭയാനകമായൊരു ചക്രമായിരിക്കും. ഈ ചക്രത്തില്‍ രണ്ടും കല്‍പ്പിച്ചിറങ്ങുന്ന ഏതൊരുവനും ആഗ്രഹിക്കുന്ന പണം സമ്പാദിക്കാന്‍ സാധിച്ചെന്നു വരും പക്ഷെ, അപ്പോളേക്കും മനസ്സമാധാനം അവര്‍ക്കില്ലാതെ ആയെന്നു വരും. മിക്ക വീടുകളിലും ഇന്ന് കാണുന്ന ഒന്നാണ് പണത്തിനു പുറകെയുള്ള ഓട്ടം. അവരുടെ മക്കള്‍ ചെന്നുവീഴുന്നത് എവിടെയാണെന്നോ, അവരുടെ ഭാവിയെന്തായി തീരുമെന്നോ ഇക്കൂട്ടര്‍ക്കറിയില്ല!
ഒന്നില്‍നിന്നും മറ്റൊന്നിലേക്ക്...... ജീവിത സമരത്തില്‍ക്കൂടി നാമെല്ലാവരും ഒഴുകുന്നു. അവസാനം, ലക്ഷ്യബോധത്തിലേക്കുള്ള ഉത്സാഹത്തില്‍ കുറച്ച് നമ്മില്‍നിന്നും ചോര്‍ന്നുപോകുന്നു. വിഷാദത്തിന്‍റെ ബീജങ്ങള്‍ മനസ്സില്‍ ഉരുണ്ടുകൂടിയെന്ന് വരാം. ചിലര്‍ അതില്‍ മുങ്ങിയെന്ന് വരാം. ഒരിക്കലും കിട്ടാത്ത ഉത്തരത്തിനായി ലക്ഷ്യബോധമില്ലാത്ത കോമാളിയെന്നോണം നമുക്ക് പിന്നെയും കാത്തിരിക്കേണ്ടി വന്നെന്നും വരാം .
ഈ വൈതരണിയില്‍ അധികമാര്‍ക്കും ലക്ഷ്യബോധം എന്താണെന്നോ, അതെവിടെനിന്നും ലഭിക്കുമെന്നോ അറിയില്ല. ലക്ഷ്യബോധത്തിനുള്ള രഹസ്യ സൂത്രവാക്യം കണ്ടുപിടിക്കാന്‍ നിങ്ങള്‍ക്കാവുമോ?
എത്രത്തോളം സഹനശക്തി നിങ്ങള്‍ക്കുണ്ട്‌?
ഇത് നേടാന്‍ എത്രകാലം നിങ്ങള്‍ പരിശ്രമിക്കും?
ചിലപ്പോള്‍ ജീവിതത്തില്‍ എന്തെങ്കിലുമൊക്കെ ആയിത്തീരാന്‍ ഒരുപാടുകാലത്തെ പരിശ്രമവും, സഹനവും വേണ്ടിവന്നെന്നു വരാം. സ്കൂള്‍വിദ്യഭ്യാസകാലഘട്ടത്തില്‍ അനേകവര്‍ഷങ്ങളുടെ പഠനവും, നൂറുകണക്കിനുള്ള പീരിയഡുകളും, ചിലവഴിക്കുന്ന പണവുമെല്ലാം ചെന്നവസാനിക്കുന്നത് മണിക്കൂറുകള്‍ മാത്രം നീണ്ടുനില്‍ക്കുന്ന എസ്.എസ്.എല്‍.സി പരീക്ഷയിലാണ്.
ഒരു ടണലിന്‍റെ അപ്പുറത്തുള്ള വെളിച്ചത്തെക്കുറിച്ച് ഇപ്പുറത്തുനില്‍ക്കുന്ന ആള്‍ക്ക് വ്യക്തമായധാരണ ഉണ്ടാകണമെന്നില്ല. അതേപോലെ, ഈ ലോകത്ത് നടക്കുന്ന എല്ലാ നല്ല കാര്യങ്ങളും വ്യക്തമായി നമുക്ക് കാണാന്‍ സാധിച്ചെന്നു വരില്ല. എന്നാല്‍ ഏതവസ്ഥയിലും നല്ലത് കാണാനും, നല്ലത് കേള്‍ക്കാനും, നല്ലത് പ്രവർത്തിക്കാനും, നല്ലത് പറയാനുമുള്ള അവസരം സൃഷ്ടിക്കുന്ന വ്യക്തിക്ക് നല്ലൊരു സമൂഹത്തെ സൃഷ്ടിക്കാനും സാധിക്കും! കാരണം ഒരാളുടെ ആദ്യ ഗുരുനാഥന്‍ എന്നത് അയാളുടെ മാതാപിതാക്കളാണ്. അയാള്‍ പഠിക്കുകയും, പ്രവൃത്തിക്കുകയും ചെയ്യുക അയാള്‍ വീട്ടില്‍ കണ്ടതും, കേട്ടതുമായ കാര്യങ്ങള്‍ ആയിരിക്കും. അതിനാല്‍, നാമോരോരുത്തരും എടുക്കേണ്ട തീരുമാനം "ഇന്നുമുതല്‍ എന്‍റെ മക്കള്‍ക്ക്‌ അല്ലെങ്കില്‍ എന്‍റെ സമൂഹത്തിന് നല്ലത് കാണാനും, നല്ലത് കേള്‍ക്കാനും, നല്ലത് പ്രവർത്തിക്കാനും, നല്ലത് പറയാനുമുള്ള അവസരം ഞാന്‍ സൃഷ്ടിക്കും" ഈ തീരുമാനതിലൂന്നി ജീവിക്കുന്ന വ്യക്തി അയാളുടെ മക്കളിലൂടെ ഭാവിയില്‍ അഭിമാനം കൊള്ളും!ലക്ഷ്യബോധത്തില്‍ ഉറച്ചുനില്‍ക്കാനുള്ള പ്രേരണ എവിടെനിന്ന് ലഭിക്കും?
നമ്മില്‍ ചിലര്‍ക്ക് വ്യക്തമായൊരു താങ്ങോ, തണലോ ജീവിതത്തില്‍ ഉണ്ടായെന്നുവരില്ല. നമ്മെ പ്രോത്സാഹിപ്പിക്കാന്‍ ഒരാളുണ്ടെങ്കില്‍....ഭാര്യയോ...മറ്റു ബന്ധുജനങ്ങളോ? അതോ ഒരു സുഹൃത്തോ നിങ്ങളുടെ പിന്നിലുണ്ടെങ്കില്‍? നിങ്ങളുടെ നിലവിലെ ജോലിക്കൊപ്പം ഒരു അധികവരുമാനം ഉണ്ടാക്കിത്തരാന്‍. അതുമല്ലെങ്കില്‍ വിഷമങ്ങളും വേദനകളും ഇറക്കിവെക്കാനൊരു സുഹൃത്ത്‌ വീട്ടിലോ, പുറത്തോ?
നിങ്ങളുടെ വേണ്ടപ്പെട്ടവർ കാണുന്നുണ്ട് മണിക്കൂറുകളോളം കംപ്യൂട്ടറിന്‍റെ മുമ്പിലോ, ഫയലുകളുടെ മുമ്പിലോ നിങ്ങള്‍ അഭ്യാസപ്രകടനം നടത്തുന്നത്. പക്ഷെ, പണം അതുമാത്രം ഇല്ല!
മിക്കവര്‍ക്കും ജീവിതത്തിലെ സമ്പാദ്യം പണം ആയിരിക്കും, പക്ഷെ ഒരു വ്യക്തിക്ക് അഭിമാനിക്കാനും, അഭിമാനം തോന്നെണ്ടതുമായ കാര്യം സമ്പാദിച്ചപണം ഏതു തരത്തിലുള്ളതാണ് എന്നതിനെ ഓര്‍ത്തായിരിക്കണം.*കുടുംബത്തില്‍ നിങ്ങളൊരു സാമ്പത്തിക ബുദ്ധിമുട്ടായി മാറുന്നുണ്ടോ?
*മറ്റുള്ളവരെ ബോധ്യപ്പെടുത്താനെന്നോണം ഇതിനെല്ലാം പരിഹാരം ഞാന്‍ ഉണ്ടാക്കുമെന്ന് അടിക്കടി പറയുന്ന ആളാണോ നിങ്ങള്‍?
ഈ പ്രശ്നങ്ങള്‍ക്കിടയില്‍ എങ്ങനെ ലക്ഷ്യബോധത്തോടെ നില്‍ക്കാന്‍ നിങ്ങള്‍ക്കാവും?
നിങ്ങള്‍ക്ക് വേണമെങ്കില്‍ കരയാം, കണ്ണീര്‍ത്തുടക്കാം നിങ്ങളുടെ വിധിയെപ്പഴിക്കാം! ഈ സമയം ശ്രദ്ധയുണ്ടായെന്ന് വരില്ല. നിങ്ങളെക്കൊണ്ട് ഒന്നും തന്നെ പ്രവര്‍ത്തിക്കുക എന്നത് സാദ്ധ്യമായെന്നും വരില്ല. എന്നാല്‍ താഴെ പറയുന്ന കുറച്ച് ഉത്തരങ്ങള്‍ നിങ്ങളെ സഹായിച്ചുവെന്ന് വരാം.
ലോകം മുഴുവനും നിങ്ങളുടെ ലക്ഷ്യബോധത്തിനെതിരെ നിന്നാലും നിങ്ങളില്‍ ഉയരുന്ന ഒരു തീപ്പൊരി മതി നിങ്ങളിലെ ലക്ഷ്യബോധത്തിന് തീ പിടിപ്പിക്കാന്‍. ആളിപ്പടരും ഒരു അഗ്നി കുണ്ഠമെന്നോണം!
മണിചെയിന്‍, ചീട്ടുകളി, ലോട്ടറി, വൈരമോതിരം, വെള്ളിമൂങ്ങ, ഇരുതലമൂരി...etc ഇതൊന്നും കേള്‍ക്കേണ്ട ആവശ്യം നിങ്ങള്‍ക്കില്ല. കാരണം, ഈ വിധത്തിലുള്ള കഥകള്‍ ഒരുപാടുപേര്‍ കണ്ടും, കേട്ടും, അനുഭവിച്ചും കഴിഞ്ഞിരിക്കുന്നു. അതിന്‍റെ ശമ്പളം അവര്‍ നേടിക്കഴിഞ്ഞിരിക്കുന്നു, പണമായിട്ടും-ശിക്ഷയായിട്ടും!
നിങ്ങള്‍ പോരാടൂ...മധുരതരമായൊരുസ്വപനം നിങ്ങള്‍ക്ക് ലഭിക്കും. ലോകത്തിന്റെ എല്ലാ മുക്കിലും, മൂലയ്ക്കും ചതികള്‍ പതുങ്ങിയിരിപ്പുണ്ട്. അവര്‍ നിങ്ങളുടെ പണവും, നിങ്ങളുടെ വിലപ്പെട്ട ജീവനെതന്നെയും അപഹരിച്ചെന്നിരിക്കാം. നിങ്ങളുടെ വികാരങ്ങളുടെ ചരടും അതിന്‍റെ നിയന്ത്രണവും നിങ്ങളുടെ കൈയ്യില്‍ ആയിരിക്കണം.
നിങ്ങളുടെ മുറിവുകളും, വേദനകളും നിങ്ങള്‍ നിയന്ത്രിക്കണം. മനുഷ്യനാണ് ഈ ലോകത്തിന്റെ അധിപന്‍, ദൈവം സര്‍വ്വാധികാരിയും! ഇന്നല്ലെങ്കില്‍ നാളെ നിങ്ങളൊരു ബിസിനസ് നടത്തിയെന്നുവരാം. അല്ലെങ്കില്‍ ആദ്യത്തെ വില്പന നടത്തിയെന്നുവരാം. അതിനാല്‍, വികാരങ്ങളെ പക്വതയോടെയും, ക്ഷമയോടെയും കൂടി കൈകാര്യം ചെയ്യാനുള്ള കഴിവാണ് ഓരോ വ്യക്തിക്കും അത്യാവശ്യമായി വേണ്ടത്. വിജയത്തിലേക്ക് നടന്നടുക്കണമെങ്കില്‍ നാമോരൊരുത്തരും കുറവുകളെ , കുറ്റമറ്റ താക്കിത്തീര്‍ക്കാന്‍ പരിശ്രമിക്കണം.
പരാജയങ്ങളെ എങ്ങനെ മറികടക്കാന്‍ കഴിയും!
വീഴ്ചയില്‍നിന്നും കരകയരുന്നവര്‍ വളരെ വിരളമാണ്.
ചിലര്‍ക്ക് സഹനം സാധ്യമല്ല.
വീഴ്ചയെ മറികടക്കാന്‍ മിക്കവര്‍ക്കും അറിയില്ല എന്നതാണ് സത്യം. ഇതിലെ വലിയ പ്രശ്നം, ചിലര്‍ക്ക് പരാജയം സംഭവിച്ചു എന്നത് മനസിലായെന്നു തന്നെ വരില്ല. പരാജയം എന്നത് ഒരു നാശകരമായ ഒരു പ്രവൃത്തിയല്ല. പകരം, നിങ്ങള്‍ ചെയ്ത എന്തിന്‍റെയോ ആകത്തുകയാണ് നിങ്ങള്‍ക്കുണ്ടായ പരാജയം.
പരാജയം എന്ന റിസല്‍ട്ടിനെ എങ്ങനെ നിങ്ങള്‍ കൈകാര്യം ചെയ്തു എന്നതിലാണ് നിങ്ങളുടെ കഴിവ്. അല്ലെങ്കില്‍ നിങ്ങള്‍ക്കുണ്ടായ ഈ വീഴ്ചയില്‍ ഇരുന്നു കരയുമോ?
അതോ ഇതില്‍നിന്നും എന്തെങ്കിലും പഠിക്കുമോ?
ഓരോ പരാജയങ്ങളും വിജയത്തിനോടടുക്കുന്ന ചവിട്ടുപടികളാണ്.
ജീവിതം ഒരു സംരംഭകനാണ്. നിങ്ങള്‍ എന്താണോ ചോദിക്കുന്നത് അതു ജീവിതം നമുക്ക് തന്നിരിക്കും. നിങ്ങളുടെ തീരുമാനങ്ങളാണ് നിങ്ങളെ വിജയിയും/പരാജിതനുമാക്കുന്നത്.
നിങ്ങളില്‍ നിന്നും നിങ്ങള്‍ എന്ത് പഠിച്ചു?
സമ്മര്‍ദങ്ങള്‍ ഒരിക്കലുമൊരു ചീത്തയായ കാര്യമല്ല. പകരം, സമ്മര്‍ദങ്ങള്‍ തരുന്ന റിസല്‍ട്ടാണ് നേട്ടങ്ങള്‍. വെല്ലുവിളികള്‍ നമ്മെ കാഠിന്യമുള്ളതാക്കിതീര്‍ക്കുന്നു. നമ്മുടെ മുമ്പിലുയരുന്ന തടസങ്ങള്‍ ഉയര്‍ന്നുപൊങ്ങുന്ന ബഹുനിലക്കെട്ടിടങ്ങള്‍ക്കുള്ള ചുടുകട്ടകളാണ്, ഇവയാണ് നമ്മുടെ വിജയത്തിന്‍റെ നട്ടെല്ല്!
കുറെ നാളുകള്‍/വര്‍ഷങ്ങള്‍ക്കുശേഷം നാം തിരിഞ്ഞുനോക്കും, തന്‍റെ ജീവിത വിജയത്തെയും, താൻ പിന്നിട്ട വഴികളെയും പ്രതി സംതൃപ്തനാണോ? ഉത്തരം എന്തുമാവാം. ആത്മാര്‍ഥമായ വിജയമാണോ എനിക്കുണ്ടായത്? കുറച്ചുകൂടി ഭേദപ്പെട്ട ഒരു വിജയം എനിക്ക് കിട്ടേണ്ടാതായിരുന്നു. ഇത്തരത്തിലുള്ള ഒരു തോന്നലാണ് നിങ്ങളില്‍നിന്നും ഉയരുകയെങ്കില്‍ “വേദന താല്‍ക്കാലികം മാത്രം-വിജയം കാലാകാലത്തേക്കുള്ളതാണ് ” എന്ന മന്ത്രം മനസിലുരുവിടുക .
എന്ത് തരത്തിലുളള തീരുമാനമാണ് നിങ്ങളെ വിജയത്തിലെത്തിക്കുക
തീരുമാനങ്ങളില്ലാത്ത പ്രവൃത്തികള്‍ക്ക്‌ വ്യക്തമായ ദിശയുണ്ടായെന്നു വരില്ല. വ്യക്തമായ തീരുമാനങ്ങളിലൂന്നിയുള്ള പ്രവര്‍ത്തനങ്ങളാണ് തകരാറുകള്‍ തെല്ലുമില്ലാത്ത വിജയത്തെ നമുക്ക് നേടിത്തരിക. അതിനാല്‍ വ്യക്തമായ തീരുമാനങ്ങളാണ് പ്രാധാന്യമേറിയ വിജയത്തിന്‍റെ ആധാരം.
തീരുമാനങ്ങള്‍ ഒരു പുഴയെന്നോണം ഒഴുകുന്നു. ചിലപുഴകള്‍ മനോഹരങ്ങളായ സമതലങ്ങളില്‍ക്കൂടിയൊഴുകുന്നു. ചിലത് ഉണങ്ങിവരണ്ട പ്രദേശങ്ങളുടെ തീരത്തുകൂടിയൊഴുകുന്നു. മറ്റുചിലത് ഭീകരമായ അന്തരീക്ഷങ്ങള്‍ക്ക് സമീപത്തായിട്ടൊഴുകുന്നു. എങ്കിലും ഇവയൊന്നും ഒരിടത്തും അവസാനിക്കുന്നില്ല. അവയുടെയെല്ലാം ലക്‌ഷ്യം സമുദ്രത്തിലെത്തിച്ചെരുക എന്നത് മാത്രമാണ്. ഇടയില്‍ സംഭവിക്കുന്നകര്യങ്ങള്‍ക്കൊന്നിനും പുഴയുടെ ലക്ഷ്യബോധത്തെ തകര്‍ക്കാനാകുന്നില്ല.നിങ്ങളുടെ ചിന്തകളെ ക്രോഡീകരിക്കുക
നിങ്ങള്‍ക്ക് ഞാൻ പറഞ്ഞു വരുന്ന കാര്യത്തെപ്പറ്റി ഏകദേശം ഒരു ഊഹം കിട്ടിക്കനുമെന്നു വിശ്വസിക്കുന്നു. നാമെല്ലാവരും കടന്നുവരുന്നത്‌ വിവിധങ്ങളായ ചുറ്റുപാടുകളില്‍ നിന്നുമാണ്. ചിലര്‍ ജീവിതത്തില്‍ ഒരുപാട് സഹനങ്ങളില്‍ക്കൂടി കടന്നുപോയവരായിരിക്കാം. മറ്റുചിലര്‍ സ്നേഹത്തിന്‍റെയും, കരുതലിന്‍റെയും, സഹകരണത്തിന്‍റെയും കുടുംബാന്തരീക്ഷത്തില്‍ നിന്നും കടന്നുവരുന്നവരായിരിക്കാം. ബാക്കിയുള്ളവര്‍ തുടര്‍ച്ചയായ പ്രതികൂലസാ ഹചര്യങ്ങളില്‍പ്പെട്ട് നട്ടം തിരിഞ്ഞവരായിരിക്കാം. ചുറ്റുപാടുകള്‍ എന്താണെങ്കിലും വളര്‍ന്നുവരുവാനുള്ള അനുകൂലഘടകങ്ങളെ നാം ഉണ്ടാക്കിയെടുക്കേണ്ട ആവശ്യം വിചിന്തന വിധേയമാണ്.
ഈ സാഹചര്യത്തില്‍ അമേരിക്കയുടെ പതിനാറാമത്തെ പ്രസിഡന്‍റയി മാറിയ എബ്രഹാം ലിങ്കണിന്‍റെ മാതൃക ഏവര്‍ക്കും അനുകരണീയമാണ്, അതിലേറെ പ്രശംസനീയവുമാണ്. ജീവിതത്തില്‍ ഉയരങ്ങള്‍ താണ്ടണമെന്ന ആഗ്രഹമുള്ള ഒരു വ്യക്തിക്ക് കഠിനപ്രയത്നങ്ങളുടെ പര്‍വതത്തെ ജീവിതത്തില്‍ ദര്‍ശിക്കേണ്ടതായി വരും.
നിങ്ങളുടെ കഴിഞ്ഞകാലം എന്താണെങ്കിലും അതൊരു പ്രശ്നമേയല്ല. ഇന്നത്തെ നിങ്ങളുടെ ജീവിത സാഹചര്യമെ ന്താണെങ്കിലും അതൊരു പ്രശ്നമേയല്ല. ദൈവം നിങ്ങള്‍ക്കായി ചൊരിഞ്ഞ കഴിവുകളിലൂടെ നിങ്ങളുടെ ചിന്തകളെ ഭാവിപ്രവര്‍ത്തനങ്ങള്‍ക്ക് വേണ്ടി ക്രോഡീകരിച്ചെടുക്കാം.
നാം ജനിച്ചുവീണത് മനുഷ്യനായിട്ടാണ്. മനുഷ്യനുള്ള കഴിവുകളില്‍ പ്രാധാന്യമേറിയ ഒന്നാണ് ദിശാബോധം. അതിനാല്‍ വളരെയെളുപ്പത്തില്‍ പ്രതികൂലചിന്താഗതിയില്‍ നിന്നും അനുകൂല ചിന്താഗതിയിലേക്ക് നമ്മുടെ മനസിനെ നയിക്കാന്‍ സാധിക്കും. പക്ഷെ, ഇപ്പോഴുള്ള നമ്മുടെ ചിന്താഗതിയില്‍ സമൂലമായൊരു മാറ്റം അനിവാര്യമാണ്.
ജീവിതത്തില്‍ നിങ്ങള്‍ പരാജിതനാണോ? ഒരു ഫീനിക്സ് പക്ഷിയെന്നോണം ഉയര്‍ത്തെണീറ്റ് വരുന്നതിനെപ്പറ്റി മാത്രം ചിന്തിക്കുക, സ്വപ്നം കാണുക. ലക്ഷ്യബോധത്തിനു വേണ്ടുന്ന 5 രഹസ്യപടികൾ
കുറച്ച് രഹസ്യങ്ങളും, അവയിലൂടെ ലക്ഷ്യബോധത്തിലെത്തി ച്ചേരുന്നവയെക്കുറിച്ചും നാം കണ്ടുകഴിഞ്ഞിരിക്കുന്നു. ഇനി നമുക്ക് അവയിലോരോന്നിനെക്കുറിച്ചും വിശദമായി പഠിക്കാം. - തീരുമാനങ്ങള്‍
തീരുമാനമാണ് ലക്ഷ്യബോധതിലേക്ക് എത്തിച്ചേരാനുള്ള ആദ്യപടി. നിങ്ങളുടെ ചുറ്റുപാടുമുള്ള ബുക്സിലോ, ഇന്റര്‍നെറ്റിലോ, സെമിനാര്‍ ക്ലാസിലോ കിട്ടുന്ന ഒന്നല്ല നിങ്ങളുടെ തീരുമാനങ്ങള്‍. തീരുമാനങ്ങള്‍ നിങ്ങളുടെ മനസിലുണ്ടാവേണ്ടാതാണ്. *സ്വപ്രയത്നം കൊണ്ടുമാത്രമേ ഒരു വ്യക്തിക്ക് അയാളുടെ ലക്ഷ്യത്തില്‍ എത്തിച്ചേരാന്‍ സാധിക്കൂ. *ചെയ്യേണ്ട കാര്യങ്ങളെക്കുറിച്ചുള്ള പ്ലാനിങ്ങും, പ്ലാനിങ്ങിലൂന്നിയുള്ള പ്രയത്നങ്ങളുമാണ് ഒരു വ്യക്തിക്ക് അയാളുടെ ജീവിത ലക്ഷ്യത്തെ നേടിക്കൊടുക്കുക.
ഈ സമയമെന്നത് നിങ്ങളുടെ സംശയങ്ങളും, ഭയപ്പാടുകളും ഇറക്കിവെക്കാന്‍ ഉള്ളതാണ്. ലക്ഷ്യബോധമെന്നത് തീരുമാനത്തെ ആശ്രയിച്ചുള്ളതാണ്.
നിങ്ങളാണ് ലക്ഷ്യബോധത്തിലേക്ക് ചെന്നെത്താനുള്ള പ്രേരണ ചെലുത്തേണ്ടയാള്‍. ഇതാണ് ഒന്നാമത്തെ രഹസ്യപടി. ലക്ഷ്യബോധത്തിലേക്കുള്ള പ്രേരണയുടെ തുടക്കമെന്നത് തീരുമാനത്തിലൂന്നിയുള്ളതാണ്. തീരുമാനം എന്താണോ, അതാണ്‌ നമ്മെ ലക്ഷ്യബോധത്തിലെത്തി ചേരാനുള്ള യഥാര്‍ത്ഥ പ്രേരണ.
- ലക്ഷ്യത്തിലെത്തിചേര്‍ന്നവിധം കരുതുക/പ്രവര്‍ത്തിക്കുക.
മാനസികമായ വളര്‍ച്ചയും, പക്വതയുമാണ് ഇത്തരത്തില്‍ ചിന്തിക്കാന്‍ ഒരു വ്യക്തിയെ സഹായിക്കുക. എന്നാല്‍, നമ്മുടെ സാഹചര്യത്തിലോ, പ്രവര്‍ത്തനമേഖലയിലോ ഒരു പക്ഷെ, ഈ രീതികൊണ്ട് ഒന്നും ചെയ്യാന്‍ സാധിച്ചെന്നു വരില്ല. ഇത്തരത്തില്‍ കരുതുകയും, പ്രവര്‍ത്തിക്കുകയുംചെയ്യുകയെന്നാല്‍ നിസ്സാരകാര്യമല്ല. പകരം ആത്മവിശ്വാസവും, ദിശയെക്കുറിച്ചുള്ള ജ്ഞാനവുമാണ്‌ ലക്ഷ്യത്തില്‍ എത്തിച്ചേർന്ന വിധം കരുതാനും, പ്രവര്‍ത്തിക്കാനും ഒരു വ്യക്തിയെ സഹായിക്കുന്ന ഘടകങ്ങള്‍. ലക്ഷ്യത്തില്‍ എതിച്ചേർന്ന വിധം കരുതുക. ഇവിടെ നിങ്ങള്‍ പരാജയപ്പെട്ടാല്‍ വീണ്ടും നിങ്ങള്‍ താഴെക്കുതന്നെ പോയെന്നുവരാം. നിങ്ങള്‍ ശ്രധാലുവാകുക...... ഒപ്പം നിങ്ങൾ ആകാൻ ആഗ്രഹിക്കുന്ന വ്യക്തിയെ നിങ്ങളില്‍ തന്നെ സൃഷ്ടിച്ചെടുക്കുക.
*ഏത് വ്യക്തിത്വമാണോ നിങ്ങള്‍ ആഗ്രഹിക്കുന്നത് അതുപോലെ പ്രവര്‍ത്തിക്കുക.
*നിങ്ങളുടെ പ്രശ്നങ്ങളെക്കുറിച്ച് മറ്റുള്ളവരോട് പറയാതിരിക്കുക.
*പ്രശ്നങ്ങളെ പരിഹരിക്കാന്‍ ആത്മാര്‍ഥമായി ശ്രമിക്കുക.
*പ്രശ്നങ്ങള്‍ താല്‍ക്കാലികം മാത്രമാനെന്നറിഞ്ഞ് കൊള്ളുക.
*ധൈര്യമായി നിങ്ങളെ കാത്തിരിക്കുന്ന റിസൾട്ടിനായി കാത്തിരിക്കുക.
*നിങ്ങള്‍ ആഗ്രഹിച്ചിരുന്ന റിസൾട്ടായിരിക്കും നാളെ നിങ്ങളെ തേടിയെത്തുക.
മുടി ചീകുക, തല ഉയര്‍ത്തിപ്പിടിക്കുക, നമ്മുടെ സഹായം ആവശ്യമുള്ളവര്‍ക്ക് തന്നാലാവുന്ന വിധം സഹായിക്കുക, നിങ്ങളുടെ പ്രശ്നങ്ങളെ മറക്കുക, മറ്റുള്ളവരെ കൈപിടിച്ചുയർത്തുന്നതില്‍ ശ്രദ്ധിക്കുക. ഇത്രയും കാര്യങ്ങളില്‍ ശ്രദ്ധിച്ചാല്‍, ഉറപ്പായും നിങ്ങളുടെ കഴിഞ്ഞകാലത്തില്‍ വന്നുഭവിച്ച തെറ്റുകളെ മറക്കാന്‍ കഴിയും. പിന്നീട്, ധൈര്യമായി മുന്‍പ് ചെയ്തതിലും ഭംഗിയായി നിങ്ങളുടെ ബിസിനസ് അല്ലെങ്കില്‍ പഠനം തുടരാന്‍ നിങ്ങൾക്ക് കഴിയും.
പ്രവര്‍ത്തിക്കുക ബാക്കിയുള്ളവ നിങ്ങള്‍ വഴിയെ കണ്ടെത്തും. ലക്ഷ്യത്തെ നേടിയെടുത്തവിധം പ്രവര്‍ത്തിക്കുക, ശേഷം എന്താണ് സംഭവിക്കുകയെന്ന് ശ്രദ്ധിക്കുക. അവസരങ്ങള്‍ നിങ്ങളെ തേടിയെത്തും പങ്കാളിത്തസംരംഭകര്‍ നിങ്ങളോട് കൈകോര്‍ക്കും. വിജയം നിങ്ങളുടെ പക്ഷത്തെത്തിച്ചേരും.
- പ്ലാന്‍
നിങ്ങള്‍ക്കൊരു പ്ലാന്‍ ഉണ്ടെങ്കില്‍, ഉറപ്പായും നിങ്ങളൊരു തീരുമാനതിലെത്തിച്ചേരും. ഇതൊരു സങ്കീര്‍ണ്ണമായ ഒരു പ്രശ്നമല്ല. നിങ്ങളുടെ പക്കല്‍ വന്നിരിക്കുന്ന ആ നല്ല ആശയവും, ഇതിനെ പ്രവൃത്തിയിലേക്ക് കൊണ്ടുവരുന്നതിന് വേണ്ടുന്ന പഠനങ്ങളുമാണ് നിങ്ങളുടെ പ്ലാനിനെ വിജയതിലേക്ക് എത്തിക്കുന്ന ഘടകങ്ങള്‍. പഠനങ്ങള്‍ ഒരിക്കലും അവസാനിക്കുന്ന ഒരു കാര്യമല്ല. നമ്മുടെ റിസൾട്ടിനെ വർദ്ധിപ്പിക്കാനുള്ള ഒരു അവശ്യവസ്തുവാണ്, പഠനം. മാര്‍ക്കറ്റിനെക്കുറിച്ചും, ഉപഭോക്താക്കളെക്കുറിച്ചും, ട്രെന്റിനെക്കുറിച്ചും മനസിലാക്കിയെടുക്കുക എന്നതാണിവിടെ പഠനം എന്ന വാക്കുകൊണ്ടർത്ഥമാക്കുന്നത്. പ്ലാനും, തീരുമാനവുമുള്ള ഒരു വ്യക്തിക്ക് വളരെയെളുപ്പത്തിലും, വേഗത്തിലും അയാളുടെ ലക്ഷ്യത്തിലെത്തിച്ചേരാന്‍ സാധിക്കും. നിങ്ങളുടെ കൈയ്യില്‍ ഒരു പ്ലാനുമില്ല എന്നിരിക്കട്ടെ, എന്ത് തീരുമാനങ്ങളാണ് നിങ്ങളെ വിജയ ലെത്തിക്കുക എന്ന് നിങ്ങള്‍ക്ക് അറിയുക വളരെ കഷ്ടമായിരിക്കും. പ്ലാന്‍ തയ്യാറാക്കുമ്പോള്‍ അറിവും, അനുഭവങ്ങളും കൈമുതലായുള്ള ആളുകളോട് ചേർന്നാലോചിക്കുക. ലക്ഷ്യബോധവും, അതിലെത്തിച്ചേരാനുള്ള വഴികളും, ഉത്സാഹവും അവരില്‍നിന്നും നിങ്ങള്‍ക്ക് പകർന്നുകിട്ടും.</code></pre></li>ചിത്രീകരണം
- നേട്ടങ്ങള്‍ കൈവരിക്കുന്നതിനെക്കുറിച്ച് സ്വപ്‌നങ്ങള്‍ മെനയുക.
- തന്‍റെ സഞ്ചാരം നേട്ടത്തിന്‍റെ പാതയില്‍ക്കൂടിയാണ് എന്നു കരുതുക. *എന്താവനാണോ നിങ്ങള്‍ ആഗ്രഹിച്ചത്‌ അതിലെത്തിച്ചേർന്നതായി മനസ്സുകൊണ്ട് വിശ്വസിക്കുക.
ഇപ്പറഞ്ഞ മൂന്നുകാര്യങ്ങളും നിങ്ങളുടെ മനസ്സിനെ നിങ്ങളറിയാതെ വിജയത്തിൽ അരക്കിട്ടുറപ്പിക്കും. മുന്‍പിലുള്ള റോഡ്‌ കാണാതെയോ, റോഡിനെക്കുറിച്ചു ഒരു ധാരണയില്ലതെയോ രാത്രിപഥികന് യാത്ര അസഹനീയം തന്നെ!
ചിത്രീകരിക്കുക….. ഒരു പട്ടികയുണ്ടാക്കുക…..സഞ്ചാരപാതയെക്കുരിച്ചൊരു ധാരണയുണ്ടാക്കുക…
ഇടയ്ക്കിടെ മനസ്സില്‍ വിജയത്തെക്കുറിച്ച് മാത്രം സ്വപ്നം കാണുക. നിങ്ങള്‍ക്കെത്തിച്ചേരേണ്ട ലക്ഷ്യത്തിലേക്കുള്ള പാതയെക്കുറിച്ചും, കടക്കേണ്ട കടമ്പകളക്കുറിച്ചും ചിന്തിക്കുക. ദിവസവും ഇങ്ങനെ ചിന്തിക്കുകയും, അതിനു വേണ്ടി പ്രവര്‍ത്തിക്കുകയും ചെയ്‌താല്‍ ഭാവിയില്‍ ലക്ഷ്യസ്ഥാനത്തെത്തിച്ചേരാന്‍ നിങ്ങള്‍ക്കെളുപ്പം സാധിക്കും. പ്രശ്നങ്ങള്‍ക്കുള്ള പരിഹാരമാര്‍ഗങ്ങള്‍ നിങ്ങളുടെ മനസ്സിലുരുത്തിരിയുകയും, മനസ്സ് ലക്ഷ്യത്തിച്ചേരുകയും ചെയ്യും. ലക്ഷ്യത്തിലെത്തിച്ചേര്‍ന്ന മനസ്സിനൊപ്പം, നമ്മുടെ ശരീരവും സഞ്ചരിച്ചാല്‍ നാം എത്തിച്ചേരുന്നത് നമ്മുടെ ലക്ഷ്യബോധത്തിലായിരിക്കും.
ഒരു ശീലമെന്നോണം വിജയത്തിലേക്കുള്ള ചിത്രീകരണം മനസ്സില്‍ വന്നുചേര്‍ന്നാല്‍, താനേ വിജയവും നമ്മില്‍ വന്നെത്തും. നിങ്ങളുടെ അടിയുറച്ച ആഗ്രഹത്തിൽ പൊതിഞ്ഞ വിജയത്തിന്‍റെ ചിത്രീകരണം ഉന്നം വെക്കുന്നത് നിങ്ങളുടെ വിജയത്തിന്‍റെ പാതയിലേക്ക് ആയിരിക്കും.ലക്ഷ്യബോധതിനുള്ള യഥാര്‍ത്ഥപ്രചോദനം വ്യക്തമായ വിജയത്തിന്‍റെ ചിത്രീകരണമാണ്.
- വിശ്വാസവും പ്രവൃത്തിയും
ഇപ്പോള്‍ മാനസികപരമായി നിങ്ങള്‍ക്കെന്താ ണാവശ്യമെന്നു നിങ്ങള്‍ മനസ്സിലക്കിയെടുത്തുവെന്നു വിശ്വസിക്കട്ടെ! വിശ്വാസത്തിലൂന്നിയുള്ള പ്രവൃത്തിയാണ്‌ അഞ്ചാമത്തെ രഹസ്യപടി. നിങ്ങള്‍ക്ക് പ്രചോധനകരമാകുന്ന എല്ലാ രഹസ്യ പടികളും നിങ്ങളെ കൊണ്ടുചെന്നെത്തിക്കുന്നത് നിങ്ങളുടെ ലക്ഷ്യബോധത്തിലേക്കും, നിങ്ങള്‍ ആഗ്രഹിച്ച/സ്വപ്നം കണ്ട വിജയത്തിലേക്കും ആയിരിക്കും. വിശ്വാസം കൂടാതെയുള്ള പ്രവൃത്തിക്ക് നമ്മള്‍ കണ്ട സ്വപ്നതിന്റെയത്രയും സുഖം കിട്ടില്ല. നിങ്ങളില്‍ പ്രേരണചെലുത്തുന്ന ഘടകങ്ങളാണ് പരമപ്രധാനമായ നിങ്ങളുടെ ആഗ്രഹപൂര്‍‍ത്തീകരണത്തിന് കാരണമാവുക. ലക്ഷ്യബോധത്തിലെത്തിച്ചേരുകയെന്നത് ഒരു സുപ്രഭാതത്തില്‍ നടക്കുന്ന കാര്യമല്ല; മറിച്ച് ക്ഷമാപൂര്‍ണ്ണമായ കഠിന പ്രയത്നങ്ങളാണ് ഒരു വ്യക്തിയെ വിജയത്തിലെത്തിക്കുക.
*എല്ലാ ഘടകങ്ങളും ഒരുമിച്ച് വന്നാല്‍ മാത്രമേ, ലക്ഷ്യബോധതിലേക്ക് എത്തിച്ചേരാനുള്ള പരിശ്രമം തുടങ്ങുകയുള്ളൂ എന്ന മിഥ്യാവിശ്വാസമാണ് നാം പാടേ ഉപേക്ഷിക്കേണ്ടത്. വളരെ പരിമിതമായ സമയമാണ് ലഭിക്കുന്നതെങ്കിലും നിങ്ങള്‍ക്ക് സാധ്യമാകുന്ന കാര്യങ്ങള്‍ അപ്പോള്‍ത്തന്നെ ചെയ്യാനായി പരിശ്രമിക്കുക.
*എന്താണോ നിങ്ങള്‍ ആഗ്രഹിക്കുന്ന ലക്‌ഷ്യം, ആ ലക്ഷ്യത്തിലെത്തിച്ചേര്‍ന്ന വിധത്തില്‍ സങ്കല്‍പ്പിക്കുകയും, പ്രവർത്തിക്കുകയും ചെയ്യുക. ആത്മവിശ്വാസമാണ് ഈ ഘട്ടത്തില്‍ നമ്മില്‍ വളരുക.
തീരുമാനങ്ങളിലൂന്നിയ പ്രവര്‍ത്തികള്‍ മാത്രമേ ലക്ഷ്യത്തില്‍ എത്തിച്ചേരൂ. ഒരു വര്‍ഷത്തിനുള്ളില്‍ ബിസിനസില്‍ 50% ഉയര്‍ച്ച നേടണം എന്നതാണ് ആഗ്രഹമെങ്കില്‍ 100% വളര്‍ച്ച നേടുന്നതിനുള്ള പ്രവര്‍ത്തനങ്ങള്‍ കാലേക്കൂട്ടി പ്ലാന്‍ ചെയ്യണം. ഇതിനെയാണ് പ്രൊ-ആക്ടീവ് എന്ന് വിളിക്കുന്നത്‌. ആക്ടീവായ വ്യക്തിയിലും ഒരുപടി കൂടിക്കടന്ന് ചിന്തിക്കുകയും, പ്രവര്‍ത്തിക്കുകയും ചെയ്യുന്നയാളാണ്‌ പ്രൊ-ആക്ടീവ്.
*നാലാമത്തെ പടിയാണ് പ്ലാന്‍. ഏതൊരു ജോലിയും വിജയതിലെതുന്നത് പ്ലാനിങ്ങിലുള്ള വ്യത്യസ്തതയും, തീരുമാനത്തിലുള്ള ഉറപ്പുകൊണ്ടുമാണ്. ചഞ്ചലപ്പെടാത്ത സുമനസ്സുകള്‍ക്ക്‌ പ്ലനിങ്ങില്‍ക്കൂടി വിജയത്തിലേക്ക് നടന്നടുക്കാന്‍ സാധിക്കും.
*ചെയ്യുന്ന പ്രവർത്തിയിലുള്ള വിശ്വാസവും, സൃഷ്ടികര്‍ത്താവിനോടുള്ള പ്രാര്‍ത്ഥനയുമാണ്‌ വിജയത്തിനു വേണ്ടുന്ന പ്രധാന രഹസ്യപടി. “താന്‍ പാതി ദൈവം പാതി”യെന്ന ആപ്തവാക്യം മനസ്സിലുറപ്പിച്ചു പ്രവര്‍ത്തിക്കുന്ന ഏതൊരുവനും ഭാവിയില്‍ വിജയം സുനിശ്ചിതം.
അതിനാല്‍, തനിക്കുള്ള അവസരം ദൈവം തരുമെന്ന് കരുതി കാത്തിരിക്കുന്നവന് വിജയമെന്നത് സംശയത്തിന്റെ കരിനിഴലിലുള്ള വസ്തുതയാണ്. എന്നാല്‍, അവസരത്തിനു വേണ്ടി കേഴാതെ ഓരോ നിമിഷവും എനിക്കുള്ളതാണ്, എന്‍റെ വിജയത്തിനുള്ളതാണ് എന്ന് വിശ്വസിക്കുന്ന ഓരോ വ്യക്തിയും വിജയത്തിന്‍റെ പടവുകൾ ഓരോന്നായി നടന്നു കയറും ഉറപ്പ്!
