ആരോപണങ്ങൾ വസ്തുതാപരമായി തെറ്റാണെന്നും ശാസ്ത്രീയ വിശകലനത്തിൻ്റെയോ വിദഗ്ദ്ധ അഭിപ്രായത്തിൻ്റെയോ പിന്തുണയില്ലെന്നും വിശദമായ പ്രസ്താവനയിൽ മന്ത്രാലയം പറഞ്ഞു. പെട്രോളിനെ അപേക്ഷിച്ച് എത്തനോളിന് ഊർജ്ജ സാന്ദ്രത കുറവാണെങ്കിലും ഇന്ധനക്ഷമതയിൽ അതിൻ്റെ ആഘാതം നാമമാത്രമാണെന്ന് മന്ത്രാലയം വ്യക്തമാക്കി.
“E20 ഇന്ധനക്ഷമതയിൽ ഗണ്യമായ കുറവുണ്ടാക്കുന്നു എന്ന ആരോപണം വസ്തുതാപരമായി തെറ്റാണ്” -എന്ന് മന്ത്രാലയം സോഷ്യൽ മീഡിയ പോസ്റ്റിൽ പറഞ്ഞു.
E10-ന് വേണ്ടി രൂപകൽപ്പന ചെയ്ത് E20-ന് വേണ്ടി കാലിബ്രേറ്റ് ചെയ്ത വാഹനങ്ങൾക്ക് മൈലേജ് 1-2 ശതമാനം മാത്രമേ കുറയാൻ സാധ്യതയുള്ളൂവെന്നും മറ്റ് വാഹനങ്ങളിൽ ഇത് ഏകദേശം 3-6 ശതമാനം വരെയാകാമെന്നും മന്ത്രാലയം വ്യക്തമാക്കി.
മികച്ച എഞ്ചിൻ ട്യൂണിംഗും മുൻനിര ഓട്ടോമൊബൈൽ നിർമ്മാതാക്കൾ ഇതിനകം സ്വീകരിച്ചിട്ടുള്ള E20-അനുയോജ്യമായ ഭാഗങ്ങളുടെ ഉപയോഗവും വഴി ഈ ഇടിവ് കൂടുതൽ കുറക്കാൻ കഴിയും. 2023 ഏപ്രിൽ മുതൽ നവീകരിച്ച ഘടകങ്ങളുള്ള E20 -കംപ്ലയന്റ് വാഹനങ്ങൾ ലഭ്യമാണെന്ന് സൊസൈറ്റി ഓഫ് ഇന്ത്യൻ ഓട്ടോമൊബൈൽ മാനുഫാക്ചറേഴ്സ് (SIAM) സ്ഥിരീകരിച്ചു.
മെറ്റീരിയൽ നാശത്തിൻ്റെ വിഷയത്തിൽ, BIS സ്പെസിഫിക്കേഷനുകളിലൂടെയും ഓട്ടോമോട്ടീവ് ഇൻഡസ്ട്രി സ്റ്റാൻഡേർഡുകളിലൂടെയും E20-നുള്ള സുരക്ഷാ മാനദണ്ഡങ്ങൾ നന്നായി സ്ഥാപിതമാണെന്ന് മന്ത്രാലയം പ്രസ്താവിച്ചു.
ചില പഴയ വാഹനങ്ങളിൽ 20,000 മുതൽ 30,000 കിലോമീറ്റർ വരെ ഓടിയതിന് ശേഷം റബ്ബർ ഭാഗങ്ങൾ അല്ലെങ്കിൽ ഗാസ്കറ്റുകൾ പോലുള്ള ചെറിയ മാറ്റിസ്ഥാപിക്കലുകൾ ആവശ്യമായി വന്നേക്കാം. എന്നാൽ ഇവ വിലകുറഞ്ഞതും സാധാരണയായി പതിവ് സർവീസിംഗ് സമയത്ത് ചെയ്യപ്പെടുന്നതുമാണ്.
പരിസ്ഥിതി സംബന്ധമായ ആശങ്കകൾ ഉന്നയിച്ചുകൊണ്ട്, CO2 ഉദ്വമനം കുറക്കാൻ സഹായിക്കുന്ന ഒരു പുനരുപയോഗ ഇന്ധനമാണ് എത്തനോൾ എന്ന് മന്ത്രാലയം എടുത്തുപറഞ്ഞു. ഇന്ത്യയുടെ എത്തനോൾ ഇപ്പോൾ കരിമ്പിൽ നിന്ന് മാത്രമല്ല, മിച്ചമുള്ള അരി, ചോളം, കേടായ ഭക്ഷ്യധാന്യങ്ങൾ, കാർഷിക മാലിന്യങ്ങൾ എന്നിവയിൽ നിന്നും ഉത്പാദിപ്പിക്കപ്പെടുന്നു. പ്രത്യേകിച്ച് രണ്ടാം തലമുറ (2G) ജൈവ ഇന്ധനങ്ങൾക്കായുള്ള പ്രേരണയുടെ ഭാഗമായി.
പെട്രോളിനെ അപേക്ഷിച്ച് കരിമ്പിൽ നിന്നും ചോളത്തിൽ നിന്നും നിർമ്മിക്കുന്ന എത്തനോൾ യഥാക്രമം 65 ശതമാനവും 50 ശതമാനവും കുറവ് ഹരിതഗൃഹ വാതകങ്ങൾ പുറന്തള്ളുന്നുവെന്ന് നിതി ആയോഗ് നടത്തിയ പഠനത്തിൽ കണ്ടെത്തി.
വാഹന പ്രകടനം മെച്ചപ്പെടുത്തുന്നതിൽ എത്തനോളിൻ്റെ ഗുണങ്ങളും മന്ത്രാലയം ഊന്നിപ്പറഞ്ഞു. പെട്രോളിനേക്കാൾ (~84.4) ഉയർന്ന ഒക്ടേൻ സംഖ്യയാണ് എത്തനോൾ (~108.5), ഇത് ആധുനിക വാഹനങ്ങളിൽ എഞ്ചിൻ പ്രകടനവും യാത്രാ നിലവാരവും മെച്ചപ്പെടുത്താൻ സഹായിക്കുന്നു.
“E20-ന് വേണ്ടി ട്യൂൺ ചെയ്ത വാഹനങ്ങൾ (വർദ്ധിപ്പിച്ച RON ഉള്ളതിനാൽ) ഇതിലും ഉയർന്ന പ്രകടനം നൽകുന്നു” എന്ന് മന്ത്രാലയം പ്രസ്താവിച്ചു. കൂടാതെ, ഇതിൻ്റെ ഉയർന്ന ബാഷ്പീകരണ താപം ഇൻടേക്ക് മാനിഫോൾഡ് താപനില കുറക്കുകയും വായു- ഇന്ധന മിശ്രിത സാന്ദ്രതയും എഞ്ചിൻ കാര്യക്ഷമതയും വർദ്ധിപ്പിക്കുകയും ചെയ്യുന്നു.
അസംസ്കൃത എണ്ണ ഇറക്കുമതി കുറക്കുന്നതിലൂടെ എഥനോൾ മിശ്രിതം ഊർജ്ജ സുരക്ഷ വർദ്ധിപ്പിക്കുമെന്ന് സർക്കാർ ചൂണ്ടിക്കാട്ടി. 2014-15 മുതൽ, എഥനോൾ പകരം വെയ്ക്കൽ വഴി ഇന്ത്യ 1.40 ലക്ഷം കോടിയിലധികം രൂപ വിദേശ നാണ്യത്തിൽ ലാഭിച്ചു. ഇത് കർഷകർക്ക് 1.20 ലക്ഷം കോടിയിലധികം രൂപയുടെ പേയ്മെന്റിനും കാരണമായി. ഇത് ഗ്രാമീണ വരുമാനത്തെയും തൊഴിലിനെയും പിന്തുണക്കുന്നു. കാർബൺ ഡൈ ഓക്സൈഡ് ഉദ്വമനം 700 ലക്ഷം ടൺ കുറക്കാൻ എത്തനോൾ മിശ്രിതം സഹായിച്ചു.
E20 വാഹനങ്ങൾക്ക് ദോഷം വരുത്തുമെന്നോ ഉപഭോക്തൃ ബുദ്ധിമുട്ടുകൾ ഉണ്ടാക്കുമെന്നോ ഉള്ള ആശങ്കകൾ വസ്തുതകളെ അടിസ്ഥാനമാക്കി ഉള്ളതല്ലെന്ന് മന്ത്രാലയം നിഗമനം ചെയ്തു.
