തിരുവനന്തപുരം: ത്രീ ഡി ബയോ പ്രിന്റിങ്ങിലൂടെ ജീവനുള്ള കോശങ്ങളെ വികസിപ്പിക്കാനുള്ള ബയോഇങ്ക് ഉൽപ്പാദിപ്പിച്ച് ശ്രീചിത്ര തിരുനാൾ ഇൻസ്റ്റിറ്റ്യൂട്ട്. സയർ ചിത്ര ജെൽമ യുവിഎസ് ബയോ ഇങ്ക് എന്നറിയപ്പെടുന്ന ബയോ ഇങ്ക് റീജനറേറ്റീവ് മെഡിസിൻ്റെയും ബയോമെഡിക്കൽ ഗവേഷണ മേഖലയിലെയും സുപ്രധാനമായ നേട്ടമാണ്.
ശ്രീചിത്രയ്ക്ക് പേറ്റന്റ് ലഭിച്ച ഈ ഉൽപ്പന്നം കിൻഫ്ര ഹൈടെക് പാർക്കിലെ സയർ സയൻസ് പ്രൈവറ്റ് ലിമിറ്റഡാണ് വിപണിയിൽ എത്തിക്കുന്നത്. ശ്രീചിത്രയിലെ ഗവേഷകരായ ഷൈനി വേലായുധൻ്റെയും പി.ആർ അനിൽകുമാറിൻ്റെയും നേതൃത്വത്തിലാണ് ബയോ ഇങ്ക് വികസിപ്പിച്ചത്.
രാസമാറ്റം വരുത്തിയ ജലാറ്റിനാണ് ബയോ ഇങ്കിൻ്റെ പ്രധാന ഘടകം. വെള്ളത്തിൽ പെട്ടെന്ന് ലയിക്കുന്നതാണ് ഈ ബയോ ഇങ്ക്. ഏറ്റവും സങ്കീർണതയുള്ള കരളിലെ ടിഷ്യൂ പോലെയുള്ളവയിലെ പരീക്ഷണം വിജയമായതോടെയാണ് വ്യാവസായിക ഉൽപ്പാദനത്തിലേക്ക് കടന്നത്. വ്യക്തിഗത ചികിത്സയ്ക്ക് ആവശ്യമായവിധം കോശങ്ങൾ വികസിപ്പിക്കാൻ കഴിയുമെന്നതാണ് മറ്റൊരു പ്രത്യേകത.
രോഗിയുടെ കോശങ്ങളിൽ നിന്ന് കൃത്രിമ അവയവം വികസിപ്പിക്കാനും കഴിയും. ബയോ ഇങ്ക് എന്ന കണ്ടുപിടിത്തം അവയവമാറ്റം കാത്തിരിക്കുന്ന രോഗികൾക്കും ഉപകാരപ്രദമാകും. ഇത് മെഡിക്കൽ ശാസ്ത്ര രംഗത്ത് വൻ വിജയമാണ് ഉണ്ടാക്കാൻ പോകുന്നത്.
നാലാമിടം.ഇൻ വാർത്തകൾ വാട്സ്ആപ്പിൽ ലഭ്യമാണ്: https://chat.whatsapp.com/JmHsAerjLkJCTZzScJzvcc
A platform https://nalamidam.net/ for people who are looking for news and insights that are not influenced by political or corporate agendas. Its commitment to ethical and humane journalism has helped it become a trusted source of news and insights for its readers.
