വടക്കൻ ക്രൗൺ നക്ഷത്ര സമൂഹത്തിലെ ഒരു മങ്ങിയ നക്ഷത്രമായ ടി കൊറോണെ ബോറിയാലിസ് 80 വർഷത്തിൽ ഒരിക്കൽ മാത്രം സംഭവിക്കുന്ന ഒരു നോവയിൽ പൊട്ടിത്തെറിക്കുന്നതിൻ്റെ വക്കിലാണെന്ന് ഗവേഷകർ പറഞ്ഞു. ഈ അതിശയകരമായ സ്ഫോടനം നഗ്നനേത്രങ്ങൾക്ക് ദൃശ്യമാകും, 1946ന് ശേഷം ആദ്യമായി ആകാശ നിരീക്ഷകർക്ക് കാണാൻ കഴിയും.
ടി കൊറോണ ബോറിയാലിസ് (ടി സിആർബി) ബൈനറി സ്റ്റാർ സിസ്റ്റം ജീവിതത്തിൽ ഒരിക്കൽ മാത്രം സംഭവിക്കുന്ന ഒരു പ്രതിഭാസമാണ്. ഇത് ഓരോ 80 വർഷത്തിലും ഗണ്യമായി പ്രകാശിക്കുന്നു. 1946-ലാണ് ഇത് അവസാനമായി അങ്ങനെ കണ്ടത്.
കഴിഞ്ഞ സെപ്റ്റംബർ മുതൽ “നക്ഷത്രത്തിൻ്റെ വിശദമായ നിരീക്ഷണങ്ങൾ ദീർഘകാലമായി കാത്തിരുന്ന ഈ സ്ഫോടനത്തിൻ്റെ ആസന്നമായ വരവിനെ സൂചിപ്പിക്കുന്ന വ്യതിയാനങ്ങൾ വെളിപ്പെടുത്തിയിട്ടുണ്ട്” -എന്ന് SETI ഇൻസ്റ്റിറ്റ്യൂട്ടിലെ ജ്യോതിശാസ്ത്രജ്ഞനും യൂണിസ്റ്റെല്ലാർ സഹസ്ഥാപകനുമായ ഫ്രാങ്ക് മാർച്ചിസ് ഒരു ഇമെയിലിൽ പറഞ്ഞു.
പഠനം ഇപ്പോഴും സൈദ്ധാന്തികമായതിനാൽ അതിൻ്റെ നിഗമനങ്ങൾ അനിശ്ചിതത്വത്തിലാണ്,” -അദ്ദേഹം കൂട്ടിച്ചേർത്തു, -ഫോർബ്‌സ്.
ടി കൊറോണ ബൊറാലിസ് എന്നത് “നോർത്തേൺ ക്രൗൺ” നക്ഷത്ര സമൂഹത്തിൽ സ്ഥിതി ചെയ്യുന്ന ഒരു ദ്വന്ദ്വ നക്ഷത്ര വ്യവസ്ഥയാണ്. ഏകദേശം 3,000 പ്രകാശവർഷം അകലെയാണ് ഇത്. ഇതിൽ രണ്ട് നക്ഷത്രങ്ങളുണ്ട്: ഒരു ചുവന്ന ഭീമനും ഒരു വെളുത്ത കുള്ളനും.
ചുവന്ന ഭീമൻ നക്ഷത്രം പ്രായമാകുന്തോറും തണുക്കുകയും വികസിക്കുകയും ചെയ്യുന്നു. പ്രായമാകുമ്പോൾ വസ്‌തുക്കൾ പുറന്തള്ളുന്നു. വെള്ളക്കുള്ളൻ നക്ഷത്രത്തിൻ്റെ ഇന്ധനം തീർന്നു തണുക്കുന്നു. വെള്ളക്കുള്ളൻ ക്രമേണ ചുവന്ന ഭീമനിൽ നിന്ന് വസ്‌തുക്കൾ ശേഖരിക്കുന്നു.
ചുവന്ന ഭീമൻ നക്ഷത്രത്തിൽ നിന്ന് കാലക്രമേണ ചോർന്ന വസ്‌തുക്കൾ ശേഖരിച്ച ശേഷം വെളുത്ത കുള്ളൻ ഒടുവിൽ ഒരു തെർമോ ന്യൂക്ലിയർ സ്ഫോടനത്തിന് കാരണമാകുന്നു. ഈ സ്ഫോടനത്തിൻ്റെ ഫലമായി സാധാരണയായി അദൃശ്യമായ നക്ഷത്രം ഭൂമിയിൽ നിന്ന് നഗ്നനേത്രങ്ങൾക്ക് ദൃശ്യമാകുന്നു. ഇത് തെളിച്ചത്തിൽ വേഗത്തിലും നാടകീയമായും വികാസത്തിന് കാരണമാകുന്നു.
അനുഭവപരമായ എക്‌സ്ട്രാപോളേഷനുകൾ സൂചിപ്പിക്കുന്നത് ദീർഘകാലമായി കാത്തിരുന്ന “നോവ” (പുതിയ നക്ഷത്രം) മാർച്ച് 27 വ്യാഴാഴ്‌ച പൊട്ടിത്തെറിക്കുകയും പിന്നീട് കുറച്ച് രാത്രികൾ മനുഷ്യ നേത്രങ്ങൾക്ക് ദൃശ്യമാകുകയും ചെയ്യും എന്നാണ്. രാത്രി ആകാശത്തിലെ 48-ാമത്തെ ഏറ്റവും തിളക്കമുള്ള നക്ഷത്രമായ നോർത്ത് സ്റ്റാറിന് സമാനമായ തെളിച്ചത്തിൽ ഇത് എത്തുമെന്ന് പ്രതീക്ഷിക്കുന്നു.
അമേരിക്കൻ അസോസിയേഷൻ ഓഫ് വേരിയബിൾ സ്റ്റാർ ഒബ്‌സർവേഴ്‌സിൻ്റെ അഭിപ്രായത്തിൽ, 2023 മാർച്ച് ഏപ്രിൽ മാസങ്ങളിൽ നക്ഷത്രത്തിൻ്റെ തെളിച്ചം കുറഞ്ഞു. 2024 ഏപ്രിലിൽ അത് നോവയായി മാറുമെന്ന് അവർ പ്രവചിച്ചു. പക്ഷേ അത് സംഭവിച്ചില്ല.
1787, 1866, 1946 വർഷങ്ങളിൽ T CrB പൊട്ടിത്തെറിച്ചതായി രേഖകൾ കാണിക്കുന്നു. ഇത് നിരവധി കാലഘട്ടങ്ങളിലായി ജ്യോതിശാസ്ത്രജ്ഞർ നിരീക്ഷിച്ച ഒരു പ്രവചിക്കപ്പെട്ട സംഭവമാണെന്ന് സൂചിപ്പിക്കുന്നു. 76 വർഷത്തിലൊരിക്കൽ ഭൂമിക്കരികിലൂടെ കടന്നുപോകുന്ന ഹാലിയുടെ വാൽനക്ഷത്രത്തിനും ഇത് ബാധകമാണ്.
നാസയുടെ ഗോഡാർഡ് സ്‌പേസ് ഫ്ലൈറ്റ് സെൻ്റെറിലെ നോവ ഇവന്റുകളിൽ വൈദഗ്ദ്യം നേടിയ അസിസ്റ്റന്റ് റിസർച്ച് സയന്റിസ്റ്റായ ഡോ. ഹൗൺസെൽ, “ജീവിതത്തിൽ ഒരിക്കൽ മാത്രം സംഭവിക്കുന്ന” ഈ അവസരം നിരവധി ജ്യോതിശാസ്ത്രജ്ഞർക്ക് പ്രചോദനമാകുമെന്ന് നേരത്തെ പറഞ്ഞിരുന്നു. ഒരു “പ്രപഞ്ച സംഭവത്തിന് നേരിട്ട് സാക്ഷ്യം വഹിക്കാനും, സ്വന്തം ചോദ്യങ്ങൾ ചോദിക്കാനും, ഡാറ്റ ശേഖരിക്കാനുമുള്ള” അവസരമാണിത്.
