ഗോപിക നായികയായ തമിഴ് ചിത്രം ‘ഓട്ടോഗ്രാഫ്’ മലയാളി പ്രേക്ഷകരുടെ ഇടയിൽ ചെലുത്തിയ സ്വാധീനം നിസാരമായി കാണാൻ കഴിയില്ല. ഈ സിനിമയുടെ സംവിധായകൻ ചേരൻ ഇതാ മലയാള സിനിമയിൽ വരുന്നു, അഭിനേതാവായി. മലയാളവുമായി ഏറെ ബന്ധങ്ങൾ ചേരനുണ്ട്. മലയാളി നായികമാർ പലപ്പോഴും ഇദ്ദേഹത്തിൻ്റെ ചിത്രങ്ങളിൽ അഭിനയിക്കാറുണ്ട്. ഗോപിക, പത്മപ്രിയ എന്നിവരൊക്കെ ചേരൻ ചിത്രങ്ങളിലെ നായികമാർ ആയിരുന്നു.
ചേരൻ മലയാളത്തിൽ മുമ്പ്, എത്തുന്നു എന്ന് പറഞ്ഞു കേട്ടിരുന്നുവെങ്കിലും അത് നടന്നിരുന്നില്ല. ഇപ്പോൾ അനുരാജ് മനോഹർ സംവിധാനം ചെയ്യുന്ന നരിവേട്ട എന്ന ചിത്രത്തിൽ അദ്ദേഹം വേഷമിടുന്നു. ടൊവിനോ തോമസ് നായകനായി അഭിനയിക്കുന്ന ചിത്രത്തിൽ ഡിഐജി രഘുറാം കേശവ് എന്ന പൊലീസ് ഉദ്യോഗസ്ഥൻ്റെ കഥാപാത്രത്തെയാണ് അവതരിപ്പിക്കുന്നത്.
ചേരൻ്റെ കഥാപാത്രത്തിൻ്റെ ഫസ്റ്റ് ലുക്ക് പുറത്തുവന്നു. ചേരൻ്റെ സാന്നിദ്ധ്യത്തിലൂടെ ‘നരിവേട്ട’ എന്ന ചിത്രം ദക്ഷിണേന്ത്യൻ സിനിമയിലും ശ്രദ്ധനേടുകയാണ്. തമിഴ്നാട്ടുകാരനെങ്കിലും കേരള കേഡറിൽ ജോലി ചെയ്യുന്ന ഐപിഎസ്. ഉദ്യോഗസ്ഥനാണ് രഘുറാം കേശവ്. തൊഴിൽരംഗത്ത് ഏറെ കർക്കശക്കാരനും, സത്യസന്ധനുമായ ഒരു പൊലീസ് ഉദ്യോഗസ്ഥനാണ് അദ്ദേഹം. ഇദ്ദേഹത്തിൻ്റെ നിർണ്ണായകമായ ഇടപെടലിലൂടെ ചിത്രത്തിൻ്റെ കഥാഗതിയിൽ വലിയ വഴിഞ്ഞിരിവിന് കാരണമാകുന്നുണ്ട്.
