ഊബർ ആപ്പ് വഴി ഉടൻ എയർ ടാക്സികൾ ബുക്ക് ചെയ്യാൻ ദുബായ് നിവാസികൾക്ക് സാധിക്കുമെന്ന് റിപ്പോർട്ട്. പതിവ് റോഡ് ഗതാഗത സംവിധാനങ്ങളോടൊപ്പം ഇലക്ട്രിക് എയർ ടാക്സി സേവനവും ആപ്പിൽ ഉൾപ്പെടുത്താനാണ് പദ്ധതി. യാത്രക്കാർ ആപ്പിലെ സെർച്ച് ബാറിൽ ലക്ഷ്യസ്ഥാനം നൽകുമ്പോൾ നിലവിലുള്ള റൈഡ് ഓപ്ഷനുകൾക്കൊപ്പം എയർ ടാക്സി തിരഞ്ഞെടുപ്പും ലഭ്യമാകും.
ഒരു ടാപ്പിലൂടെ പ്രീമിയം കാർ പിക്കപ്പ്, എയർ ടാക്സി ഫ്ലൈറ്റ്, അവസാന ഡ്രോപ്പ്-ഓഫ് എന്നിവ ഉൾപ്പെടുന്ന മുഴുവൻ യാത്രാ വിശദാംശങ്ങളും കാണാനാകും. ഇതുവഴി എളുപ്പത്തിൽ എയർ ടാക്സി ബുക്ക് ചെയ്യാം.
നാല് യാത്രക്കാർക്ക് വരെ സഞ്ചരിക്കാൻ കഴിയുന്ന രീതിയിലാണ് ഇലക്ട്രിക് എയർ ടാക്സി രൂപകൽപ്പന ചെയ്തിരിക്കുന്നത്. സർട്ടിഫൈഡ് കൊമേഴ്സ്യൽ പൈലറ്റാണ് വിമാനം നിയന്ത്രിക്കുക.
വിശാലമായ ജനാലകളും സുഖപ്രദമായ ഇരിപ്പിടങ്ങളും ഉൾപ്പെട്ട ക്യാബിനിൽ ഓരോ സീറ്റിൽ ഇരുന്നും നഗരദൃശ്യങ്ങൾ ആസ്വദിക്കാനാകും. ആറ് ടിൽറ്റിംഗ് പ്രൊപ്പല്ലറുകൾ ഉപയോഗിച്ച് വിമാനം നേരിട്ട് മുകളിലേക്ക് ഉയർന്ന് തുടർന്ന് മുന്നോട്ട് സഞ്ചരിക്കും. മണിക്കൂറിൽ 200 മൈൽ വരെ വേഗത കൈവരിക്കാൻ കഴിയുന്ന ഈ എയർ ടാക്സിക്ക് ഒറ്റ ചാർജിൽ ഏകദേശം 100 മൈൽ വരെ ദൂരം സഞ്ചരിക്കാനാകുമെന്നാണ് ഖലീജ് ടൈംസ് റിപ്പോർട്ട് ചെയ്യുന്നത്.
നഗരപരിസരങ്ങൾക്ക് അനുയോജ്യമായ രീതിയിൽ രൂപകൽപ്പന ചെയ്ത ഈ വിമാനത്തിൽ സുരക്ഷ ഉറപ്പാക്കാൻ ഒന്നിലധികം തലങ്ങളിലുള്ള സംവിധാനങ്ങൾ ഉൾപ്പെടുത്തിയിട്ടുണ്ട്. നഗരത്തിലെ ശബ്ദ മലിനീകരണം കുറയ്ക്കുന്ന തരത്തിൽ, എന്നാൽ ശബ്ദവിന്യാസത്തിന് തടസ്സമില്ലാത്ത രീതിയിൽ പ്രത്യേക ശബ്ദനിയന്ത്രണ സംവിധാനവും ഇതിൽ സജ്ജീകരിച്ചിരിക്കും.
