ന്യൂഡൽഹി: കഴിഞ്ഞ പത്ത് വർഷത്തിനിടയിൽ ഇ- സ്പോർട്സ് വ്യവസായത്തെ രൂപപ്പെടുത്തിയ ഏറ്റവും സ്വാധീനമുള്ള വ്യക്തികളെയും സ്ഥാപനങ്ങളെയും നിമിഷങ്ങളെയും ആദരിക്കുന്ന ആഗോളതലത്തിൽ പ്രശസ്തമായ അവാർഡ് ഷോയുടെ പ്രത്യേക പതിപ്പായ ഡെക്കേഡ് അവാർഡുകൾ എന്ന നാഴികക്കല്ല് സംരംഭം പ്രഖ്യാപിതമായി.
മികച്ച ബഹുമതികളിൽ സ്ട്രീമർ ഓഫ് ദി ഡെക്കേഡ് വിഭാഗവും ഉൾപ്പെടുന്നു. ആഗോളതലത്തിൽ ഇന്ത്യൻ പതാക ഉയർത്തി പിടിക്കുന്നത് രാജ്യത്തെ ഏറ്റവും പ്രശസ്തമായ ഗെയിമിംഗ് ഐക്കണായ നമൻ ‘മോർട്ടൽ’ മാത്തൂറും ആണ്. നിൻജ, എക്സ്ക്യുസി, പോകിമാനെ, ഷ്രൗഡ്, ഇബായ് ലാനോസ്, ടിംദി ടാറ്റ്മാൻ തുടങ്ങിയ സ്ട്രീമിംഗ് ഇതിഹാസങ്ങൾ ഉൾപ്പെടുന്ന പവർഹൗസ് നിരയിലെ ഏക ഇന്ത്യൻ നോമിനിയാണ് മോർട്ടൽ.
എസ്പോർട്സ് അവാർഡുകൾ: ദശാബ്ദ പതിപ്പ്
ഇ- സ്പോർട്സ്, ഗെയിമിംഗ് ലോകം എന്നിവയിലുടനീളമുള്ള പത്ത് വർഷത്തെ നേട്ടങ്ങളുടെ ഒരു ഭൂതകാല അവലോകനം അടയാളപ്പെടുത്തുന്ന ഒരു ചരിത്രപരമായ ആഘോഷമാണ് എസ്പോർട്സ് അവാർഡ് ഡെക്കേഡ് എഡിഷൻ. ടീം ഓഫ് ദി ഡെക്കേഡ്, ഗെയിം ഓഫ് ദി ഡെക്കേഡ്, സ്ട്രീമർ ഓഫ് ദി ഡെക്കേഡ് തുടങ്ങിയ വിഭാഗങ്ങളോടെ ഈ വർഷത്തെ പതിപ്പ് അതിവേഗം വികസിച്ചു കൊണ്ടിരിക്കുന്ന വ്യവസായത്തിലെ സുസ്ഥിരമായ മികവിനെയും സംസ്കാരിക സ്വാധീനത്തെയും ആദരിക്കാൻ ശ്രമിക്കുന്നു.
എല്ലാ വിഭാഗങ്ങൾക്കുമുള്ള വോട്ടെടുപ്പ് 2025 ജൂൺ 13ന് തത്സമയമായി ആരംഭിച്ചു. 2025 ഓഗസ്റ്റ് 11 വരെ തുറന്നിരിക്കും. എസ്പോർട്സ് വേൾഡ് കപ്പിൻ്റെ ഭാഗമായി 2025 ഓഗസ്റ്റ് 10ന് സൗദി അറേബ്യയിലെ റിയാദിൽ നടക്കുന്ന തത്സമയ ചടങ്ങിൽ വിജയികളെ കിരീടധാരണം ചെയ്യും. ട്വിച്ച് , യൂട്യൂബ് വഴിയാണ് പരിപാടി ആഗോളതലത്തിൽ പ്രക്ഷേപണം ചെയ്യുന്നത്.
മോർട്ടൽ: ആഗോള ഐക്കണിലേക്ക്
സ്ട്രീമർ ഓഫ് ദി ഡെക്കേഡ് ഷോർട്ട്ലിസ്റ്റിൽ മോർട്ടലിനെ ഉൾപ്പെടുത്തിയത് ഇന്ത്യൻ ഗെയിമിംഗിന് ഒരു നിർണായക നിമിഷമാണ്. കഴിഞ്ഞ ദശകത്തിൽ, PUBG മൊബൈൽ / BGMI -യിലെ ആദ്യകാല ആധിപത്യം മുതൽ ഏഷ്യയിലെ ഏറ്റവും വിജയകരമായ ഉള്ളടക്ക സ്ഥാപനങ്ങളിലൊന്നായ S8UL എസ്പോർട്സിൻ്റെ നിർമ്മാണം വരെ ഇന്ത്യയിലെ ഇ- സ്പോർട്സ് വിപ്ലവത്തിൻ്റെ മുൻനിരയിലാണ് മോർട്ടൽ.
