ഇന്ത്യയിൽ ടൂറിസം പ്രോത്സാഹിപ്പിക്കുന്നതിനായി കേന്ദ്ര സർക്കാർ നിരവധി നടപടികൾ സ്വീകരിച്ചുവരികയാണ്. ഇതിന്റെ ഭാഗമായി 171 രാജ്യങ്ങളിലെ പൗരന്മാർക്ക് 9 ഉപവിഭാഗങ്ങളിലായി ഇ-വിസ സൗകര്യം നൽകുന്നുണ്ടെന്ന് വെളിപ്പെടുത്തി. രാജ്യത്തെ 31 അന്താരാഷ്ട്ര വിമാനത്താവളങ്ങളിലൂടെയും 6 പ്രധാന തുറമുഖങ്ങളിലൂടെയും ഈ സേവനങ്ങൾ ലഭ്യമാകുമെന്ന് കേന്ദ്ര ടൂറിസം, സാംസ്കാരിക മന്ത്രി ഗജേന്ദ്ര സിംഗ് ശെഖാവത്ത് രാജ്യസഭയെ അറിയിച്ചു.
ടൂറിസം അടിസ്ഥാന സൗകര്യങ്ങൾ സൃഷ്ടിക്കുന്നതിന് സർക്കാർ പ്രതിജ്ഞാബദ്ധമാണെന്ന് അദ്ദേഹം രേഖാമൂലമുള്ള മറുപടിയിൽ വ്യക്തമാക്കി. “സ്വദേശ് ദർശൻ 2.0” പദ്ധതി പ്രകാരം 53 പദ്ധതികൾക്കായി 2,208.27 കോടി രൂപ അനുവദിച്ചിട്ടുണ്ടെന്നും അദ്ദേഹം പറഞ്ഞു.
‘ചലഞ്ച് ബേസ്ഡ് ഡെസ്റ്റിനേഷൻ ഡെവലപ്മെന്റ്’ (CBDD) പ്രോഗ്രാമിന് കീഴിൽ 36 പദ്ധതികൾക്കായി 648.11 കോടി രൂപ അനുവദിച്ചിട്ടുണ്ടെന്നും അദ്ദേഹം വിശദീകരിച്ചു. ഈ ഫണ്ടുകൾ കേന്ദ്രം അനുവദിച്ചിട്ടുണ്ടെങ്കിലും, ബന്ധപ്പെട്ട സംസ്ഥാനങ്ങളുടെയും കേന്ദ്രഭരണ പ്രദേശങ്ങളുടെയും ഏജൻസികൾ പദ്ധതികൾ നടപ്പിലാക്കും.
ടൂറിസം പ്രോത്സാഹനത്തിനായി ‘ഇൻക്രെഡിബിൾ ഇന്ത്യ’ ഡിജിറ്റൽ പോർട്ടൽ വ്യാപകമായി ഉപയോഗിക്കുന്നുണ്ടെന്ന് മന്ത്രി പറഞ്ഞു. ഇതിന്റെ ഭാഗമായി, ലോകമെമ്പാടുമുള്ള ട്രാവൽ ഏജന്റുമാർക്കും ടൂർ ഓപ്പറേറ്റർമാർക്കും ഉയർന്ന നിലവാരമുള്ള ഫോട്ടോകൾ, വീഡിയോകൾ, ബ്രോഷറുകൾ എന്നിവ ഉൾക്കൊള്ളുന്ന ‘ഇൻക്രെഡിബിൾ ഇന്ത്യ കണ്ടന്റ് ഹബ്’ ആരംഭിച്ചു. ഇതോടൊപ്പം, സോഷ്യൽ മീഡിയയിലൂടെയും പ്രത്യേക പരിപാടികളിലൂടെയും ഇന്ത്യൻ ടൂറിസം ലോകത്തിന് പരിചയപ്പെടുത്തുന്നുണ്ടെന്ന് അദ്ദേഹം വിശദീകരിച്ചു.
