| ശരണ്യ എം ചാരു
അജയന്റെ രണ്ടാം മോഷണമെന്ന സിനിമ നിറഞ്ഞ തിയറ്ററിൽ പ്രദർശനം തുടരുകയാണ്. ടോവിനോയുടെ കരിയറിലെ മികച്ച സിനിമകളിൽ അജയൻ ഇടം പിടിക്കുമെന്ന കാര്യത്തിൽ തർക്കമില്ല. സുരഭിയുടെയും. ഈ പോസ്റ്റ് പക്ഷെ പടത്തെ കുറിച്ചല്ല, പെണ്ണായത് കൊണ്ട് മാത്രം പടത്തിലോ അതിൻ്റെ അണിയറയിലോ ഇടം പിടിക്കാതെ പോയ മറ്റൊരാളെ കുറിച്ചാണ്. ത്രീഡിയിൽ അടക്കം പ്രേക്ഷകരെ കയ്യിലെടുത്ത പടത്തിന്റെ ആർട്ട് ഡയറക്ടർ രാഖിയെ കുറിച്ച്.
അജയനിലെ ആർട്ട് വർക്കുകൾ പടം കണ്ടവർ ശ്രദ്ധിച്ചു കാണും. അസാധ്യമായിരുന്നു ഓരോന്നും. അതിന് പിന്നിൽ പ്രവർത്തിച്ച സ്ത്രീയെ പക്ഷെ നിങ്ങൾക്ക് പരിചയം കാണില്ല, പരിചയപ്പെടുത്താതിരിക്കാൻ സിനിമയിലെ ആൺകൂട്ടം പ്രത്യേകം ശ്രദ്ദിച്ചപ്പോൾ അവളുടെ ഇടം എല്ലാവർക്കും താഴെ ആയി പോയത് അബദ്ധവശാൽ ഒന്നുമല്ല, മനപ്പൂർവ്വം തന്നെ ചിലർ അവരെ അവഗണിച്ചതാണ്.
സിനിമ മേഖലയിലെ ലൈംഗീക അതിക്രമങ്ങൾ മാത്രമല്ല ഈ മേഖലയിൽ സ്ത്രീകൾ നേരിടുന്ന പ്രശ്നങ്ങൾ, ആണിന് മുകളിൽ, അവനേക്കാൾ മികവിൽ പണിയെടുത്താൽ പോലും പെണ്ണാണെന്ന ഒരൊറ്റ കാരണം കൊണ്ട് ഒരു സ്ത്രീ നേരിടുന്ന അവഗണന കൂടി വലിയ പ്രശ്നമാണ്.
സിനിമയുടെ അണിയറയിൽ പ്രവർത്തിക്കുന്നത് സ്ത്രീകൾ ആണെങ്കിൽ അവർക്കൊപ്പം ജോലി ചെയ്യാൻ മടിക്കുന്ന, മറ്റെല്ലാ മേഖലയിലുമുള്ള പുരുഷന്മാരുടെ പേരുകൾ സിനിമയുടെ ടൈറ്റിൽ ക്രെഡിറ്റിസിൽ കൊടുത്തിട്ട് സ്ത്രീകളുടെ പേര് എൻഡ് ക്രെഡിറ്റ്സിൽ മാത്രം എഴുതിക്കാണിക്കുന്ന വൃത്തികേടുകൾ കൂടി അടങ്ങിയതാണ് മലയാള സിനിമ മേഖലയിൽ സ്ത്രീകൾ നേരിടുന്ന പ്രശ്നങ്ങൾ.
ഒന്നും രണ്ടും മൂന്നും സിനിമകളിൽ നിന്നല്ല ആർട്ട് ഡയറക്ടർ ആയ ഒരു സ്ത്രീ ഈ വിവേചനം നേരിട്ടിട്ടുള്ളത്. ഓസ്ലർ എന്ന മമ്മൂട്ടി ചിത്രത്തിന്റെ പോസ്റ്ററിൽ അടക്കം ആർട്ട് ഡയറക്ടർ ‘രാഖി ആർ കെ’ എന്ന് എഴുതി വന്നിട്ടും പടം വന്നപ്പോ അവരുടെ പേര് അവർക്ക് താഴെ ജോലി ചെയ്ത ആളുകൾക്ക് ശേഷം മാത്രം പരിഗണിക്കപ്പെട്ട സംഭവം ഉണ്ടായിട്ടുണ്ട്.
മലയ്ക്കോട്ടൈ വാലിബന്റെ സെറ്റിൽ നിന്ന് ഇതേ അവഗണനയുടെ പേരിൽ പാതി വഴിയിൽ പ്രോജക്ട് ഉപേക്ഷിച്ചിറങ്ങേണ്ടി വന്നിട്ടുണ്ട്. ഇപ്പൊ അജയന്റെ രണ്ടാം മോഷണത്തിലിതാ അസോസിയേറ്റിന്റെയടക്കം പേര് ടൈറ്റിൽ ക്രെഡിറ്റിസിൽ കൊടുത്തിട്ടും ആർട്ട് ഡയറക്ടറുടെ പേര് എൻഡ് ക്രെഡിറ്റ്സിൽ മാത്രം എഴുതിക്കാണിച്ച് വീണ്ടും അവരെ അവഗണിക്കുകയാണ് ചിലർ.
ഇതിനെതിരെ ഫെഫ്കയിലോ, ആർട്ട് ഡയറക്ടർ അസോസിയേഷനിലോ ഒന്നും പരാതി കൊടുത്തിട്ട് ഒരു കാര്യവും ഇല്ലെന്ന് അറിയാവുന്നത് കൊണ്ട് അതിനൊന്നും നിൽക്കാതെ മലയാള സിനിമയിൽ നിന്ന് മാറി തമിഴിലും തെലുങ്കിലും വർക്ക് ചെയ്യുകയാണ് രാഖിയിപ്പോൾ. നേരത്തെ ഓസ്ലർ റിലീസ് ആയ സമയത്തും ഇപ്പോൾ അജയന് ശേഷവും രാഖി ഇട്ട ഫേസ്ബുക്ക് പോസ്റ്റുകളുടെ ലിങ്ക് താഴെ ചേർക്കുന്നു. സെറ്റിലെ ഫോട്ടോകളും. പറയുമ്പോൾ എല്ലാം പറയണം, ചർച്ച ചെയ്യപ്പെടുമ്പോൾ എല്ലാം ചർച്ച ചെയ്യപ്പെടണം, ചോദ്യം ചെയ്യപ്പെടണം.