കിരൺ റാവുവിൻ്റെ ‘ലാപതാ ലേഡീസ്’ എന്ന ചിത്രത്തിലെ ശക്തമായ വേഷത്തിലൂടെ പ്രശസ്‌തയായ ഛായ കദം ഇപ്പോൾ ഗുരുതരമായ നിയമനടപടി നേരിടുകയാണ്. സംരക്ഷിത വന്യമൃഗങ്ങളുടെ മാംസം രുചിച്ചു എന്നാരോപിച്ച് ജനപ്രിയ നടി കുഴപ്പത്തിലായതായി റിപ്പോർട്ടുണ്ട്. ഇത് നിയമപരമായ പ്രത്യാഘാതങ്ങൾ ഉണ്ടാക്കാവുന്ന ഒരു കുറ്റകൃത്യമാണ്.
മുംബൈ ആസ്ഥാനമായുള്ള ഒരു എൻ‌ജി‌ഒ അവരുടെ അവകാശവാദങ്ങൾക്ക് എതിരെ ആശങ്ക പ്രകടിപ്പിച്ചതിനെ തുടർന്ന് മഹാരാഷ്ട്ര വനം വകുപ്പ് അവരെ വിളിച്ചുവരുത്തി, വന്യജീവി ലംഘനങ്ങളെ കുറിച്ച് ഔദ്യോഗിക അന്വേഷണം ആരംഭിച്ചു.
ഫ്രീ പ്രസ് ജേണലിൻ്റെ (FPJ) റിപ്പോർട്ട് പ്രകാരം, പ്ലാന്റ് ആൻഡ് ആനിമൽ വെൽഫെയർ സൊസൈറ്റി (PAWS) താനെ ചീഫ് കൺസർവേറ്റർ ഓഫ് ഫോറസ്റ്റ്, ഡിവിഷണൽ ഫോറസ്റ്റ് ഓഫീസർ എന്നിവർക്ക് പരാതി നൽകി. വന്യമൃഗങ്ങളുടെ മാംസം കഴിക്കുന്നതിനെ കുറിച്ച് ഛായാ കദം നടത്തിയ പ്രസ്‌താവനകളുടെ അടിസ്ഥാനത്തിലാണ് പരാതി. എലിമാൻ, മുയൽ, കാട്ടുപന്നി, മോണിറ്റർ പല്ലി, മുള്ളൻപന്നി എന്നിവയുടെ മാംസം രുചിച്ചതായി കദം അവകാശപ്പെട്ടിരുന്നു.
1972-ലെ വന്യജീവി സംരക്ഷണ നിയമപ്രകാരം സംരക്ഷിത ഇനങ്ങളാണ് ഇവയെല്ലാം. പരാതിയെ തുടർന്ന് വനം വകുപ്പ് ഔദ്യോഗിക അന്വേഷണം ആരംഭിച്ചു. വന്യജീവികളെ വേട്ടയാടുന്നതിലും ഭക്ഷിക്കുന്നതിലും ഉൾപ്പെട്ടിട്ടുണ്ടെന്ന് ആരോപിക്കപ്പെടുന്ന നടിക്കും മറ്റുള്ളവർക്കുമെതിരെ നിയമനടപടി സ്വീകരിക്കണമെന്ന് എൻ‌ജി‌ഒ ആവശ്യപ്പെട്ടിരുന്നു.
കേസിൽ പ്രത്യേക സംഘം. അവകാശ വാദങ്ങളെകുറിച്ച് കൂടുതൽ ആഴത്തിൽ അന്വേഷിക്കാൻ ഒരു സംഘം രൂപീകരിച്ചിട്ടുണ്ട്. മാംസം ലഭ്യമാക്കാൻ സഹായിച്ച വേട്ടക്കാരെയും ഏതെങ്കിലും വിധത്തിൽ ഉൾപ്പെട്ടിരിക്കാൻ സാധ്യതയുള്ളവരെയും സംഘം അന്വേഷിക്കും.
