ഈ വർഷം ആദ്യം മുതൽക്കേ തിയേറ്ററുകളിൽ വിജയക്കൊടി പാറിച്ചു മുന്നേറുകയാണ് മലയാള സിനിമകൾ. തിയേറ്ററുകൾ നിറച്ച് കോടികൾ വാരിയ സിനിമകൾ ഓടിടി റിലീസിനായി ഒരുങ്ങുന്നു. മലയാള സിനിമക്ക് ഇൻഡസ്ട്രിയൽ ഹിറ്റുകൾ സമ്മാനിച്ച സിനിമകൾ മെയ് മാസത്തിൽ വിവിധ ഓടിടികളിൽ ആണ് പ്രേക്ഷകരുടെ സ്വീകരണ മുറിയിലേക്ക് എത്തും.
റെക്കോർഡ് കളക്ഷൻ നേടിയ ചിതംബരം സിനിമ ‘മഞ്ഞുമ്മൽ ബോയ്സ്’ ഡിസ്നി പ്ലസ് ഹോട്സ്റ്ററിലൂടെ മെയ് 5 ന് റിലീസ് ചെയ്യുകയാണ്. ഇതിനോടകം പ്രോമോ വീഡിയോ പങ്കു വെച്ചുകൊണ്ട് ഹോട്ട്സ്റ്റാർ വിവരം പ്രേക്ഷകരിലേക്ക് എത്തിച്ചുകഴിഞ്ഞു.
തൊട്ട് പിന്നാലെ ലോക സിനിമയിൽ തന്നെ മലയാള സിനിമയ്ക്ക് ഇരിപ്പിടം ഒരുക്കിയ പ്രിത്വിരാജ് – ബ്ലെസ്സി സിനിമ ‘ആടുജീവിതം’ പ്രദർശനത്തിനായി എത്തും എന്നാണ് റിപ്പോർട്ടുകൾ. ഹോട്സ്റ്റാർ തന്നെ ആണ് ആടുജീവിതവും സ്വന്തമാക്കിയിരിക്കുന്നത്. മെയ് 10 സിനിമ റിലീസ് ചെയ്യും എന്നും, സമയപ്രശ്നം കാരണവും സെൻസർ പ്രശ്നങ്ങൾ കാരണവും തിയേറ്ററുകളിൽ നിന്ന് ഒഴിവാക്കേണ്ടി വന്ന സീനുകൾ ഉൾപ്പെടെഓടിടി വേർഷനിൽ ഉണ്ടാകും എന്നാണ് പ്രതീക്ഷ.
ഏറ്റവും അടുത്തായി തിയേറ്റർ ആവേശമായി മാറിയ ഫഹദ് ചിത്രം ‘ആവേശം’ മെയ് 17 ന് ഓടിടിയിൽ എത്തുമെന്നും , ആമസോൺ പ്രൈം ആണ് സിനിമ സ്വന്തമാക്കിയിരിക്കുന്നത് എന്നുമാണ് ‘ജാഗരൺ’ റിപ്പോർട്ടുകൾ പറയുന്നത്. നിലവിൽ തിയേറ്റർ പ്രദർശനം തുടരുന്ന സിനിമ ആയത് കൊണ്ട് തന്നെ ഇതുവരെയും ഔദ്യോഗിക പ്രഖ്യാപനം വന്നിട്ടില്ല.
കഴിഞ്ഞ 4 മാസങ്ങളിലായി തിയേറ്ററുകൾ കീഴടക്കിയ സിനിമകൾ ഒക്കെയും ഒരേ മാസം ഓടിടി റിലീസിനായി ഒരുങ്ങുമ്പോൾ തിയേറ്ററുകൾ പോലെ തന്നെ ഓടിടിയും ഇനി മലയാള സിനിമ ഭരിക്കും എന്നാണ് പ്രേക്ഷക പ്രതികരണങ്ങൾ. തിയേറ്റർ എക്സ്പീരിയൻസ് നഷ്ട്ടപ്പെട്ട ഒരുപാട് ആളുകൾ ആണ് ഓടിടി റിലീസിനായി കാത്തിരിക്കുന്നത്.
