കൊച്ചി: അവയവ മാഫിയ കേരളത്തിൽ പിടിമുറുക്കുന്നു. ഇവരുടെ കെണിയിൽ പെടുന്നവർ നേരിടുന്നത് കനത്ത സാമ്പത്തിക ചൂഷണമാണ്. നിയമത്തിൻ്റെ പഴുതുകൾ അടച്ചുകൊണ്ടാണ് അവയവ വിൽപ്പനകൾ നടക്കുന്നത്.
സാമ്പത്തിക പരാധീനതകളെ തുടർന്ന് സ്വന്തം കിഡ്നി വിൽക്കുവാൻ കൊച്ചി സ്വദേശിനി നിർബന്ധിതയായി. എറണാകുളം കടവന്ത്രയിൽ സ്ഥിരതാമസമാക്കിയ ലത എന്ന ഏജന്റ് മുൻകൈയെടുത്താണ് ഇവരുടെ സർജറി നടത്തിയത്.
ശസ്ത്രക്രിയ നടത്താൻ ഉദ്ദേശിക്കുന്ന ആശുപത്രിയോട് ചേർന്ന കാന്റീനുകളിലും ഹോട്ടലുകളിലുമാണ് കൂടിക്കാഴ്ച്ചകൾ നടന്നത്. എന്തെങ്കിലും കാരണത്താൽ ഒരാശുപത്രി ശസ്ത്രക്രിയ നിരസിച്ചാൽ മറ്റൊരിടത്തേക്ക് വേഗത്തിൽ അവയവ ദാതാവിനെ എത്തിക്കും.
ദാരിദ്രവും ഇല്ലായ്മയും ചൂഷണം ചെയ്ത് സാമ്പത്തികമായി പിന്നാക്കം നിൽക്കുന്നവരെയും ആണ് കിഡ്നി കച്ചവടത്തിനായി തിരഞ്ഞെടുക്കുന്നത്. സാഹചര്യങ്ങളുടെ സമ്മർദം മൂലം അവയവങ്ങൾ വിൽക്കാൻ തയ്യാറാക്കുന്നവർക്ക് പറഞ്ഞുറപ്പിച്ച പണം പോലും പിന്നീട് ലഭിക്കുന്നില്ല.
അവയവ ദാനത്തിന് സർക്കാരിൻ്റെ മൃതസഞ്ജീവനി പദ്ധതി ഉണ്ട്. ഇതിനെ പരസ്യമായി വെല്ലുവിളിച്ചും അട്ടിമറിച്ചുമാണ് അവയവക്കച്ചവടം കൊച്ചി നഗര ഹൃദയത്തിൽ നടക്കുന്നത്. സംഭവത്തിൽ രഹസ്യാന്വേഷണ വിഭാഗം നിരീക്ഷണം ആരംഭിച്ചിട്ടുണ്ട്.
