കേരളത്തിനും പിണറായി വിജയനും നന്ദി പറഞ്ഞ് തമിഴ്‌നാട് മുഖ്യമന്ത്രി എംകെ സ്റ്റാലിൻ. പിണറായി വിജയൻ ഇന്ത്യയിലെ ഭരണപാടവമുള്ള മുഖ്യമന്ത്രിയാണെന്നും അദ്ദേഹം പറഞ്ഞു. പെരിയാർ രാമസ്വാമി സ്‌മാരകം ഉദ്ഘാടനം ചെയ്‌തതിന് ശേഷം വൈക്കം ബീച്ച് മൈതാനത്ത് സമ്മേളനത്തിനിടെ ആണ് പരാമർശം.
വൈക്കം സത്യാഗ്രഹം കേരളത്തിൻ്റെ മാത്രം പോരാട്ടം അല്ല ഇന്ത്യയിലെ സാമൂഹിക അനീതിക്കെതിരെയുള്ള പോരാട്ടത്തിൻ്റെ തുടക്കമായിരുന്നുവെന്നും എംകെ സ്റ്റാലിൻ പറഞ്ഞു. ഇത് പെരിയാറിൻ്റെ വിജയമാണെന്നും മുഖ്യമന്ത്രി എന്ന നിലയിൽ അഭിമാന നിമിഷമാണെന്നും അദ്ദേഹം കൂട്ടിച്ചേർത്തു.
പിണറായി വിജയനും തമിഴ്‌നാട് മുഖ്യമന്ത്രി എംകെ സ്റ്റാലിനും ചേർന്നാണ് പെരിയാർ രാമസ്വാമി സ്‌മാരകം ഉദ്ഘാടനം ചെയ്‌തത്. കേരള മന്ത്രിമാരായ വിഎൻ വാസവൻ, സജി ചെറിയാൻ എന്നിവരും തമിഴ്‌നാട് മന്ത്രിമാരായ എവി വേലു , ദുരൈമുരുകൻ, എംപി സ്വാമിനാഥൻ , ദ്രാവിഡ കഴകം അധ്യക്ഷൻ കെ വീരമണിയും ചടങ്ങിൽ പങ്കെടുത്തു. വൈക്കത്തുള്ള സ്‌മാരകം എട്ടരക്കോടി രൂപ മുടക്കിയാണ് തമിഴ്‌നാട് സർക്കാർ നവീകരിച്ചത്. വൈക്കം സത്യാഗ്രഹത്തിൻ്റെ നൂറാം വാർഷികത്തോട് അനുബന്ധിച്ചായിരുന്നു നവീകരണം.
തമിഴ്‌നാട്ടിൽ നിന്നെത്തി വൈക്കം സത്യഗ്രഹത്തിൻ്റെ മുന്നണിപ്പോരാളിയായ സാമൂഹിക പരിഷ്‌കർത്താവും ദ്രാവിഡ രാഷ്ട്രീയ ആചാര്യനുമായ തന്തൈ പെരിയാറിൻ്റെ സ്‌മാരകം നവീകരിക്കുമെന്ന് 2023-ലെ ഉദ്ഘാടന വേദിയിലാണ് സ്റ്റാലിൻ പ്രഖ്യാപിച്ചത്. വൈക്കം വലിയ കവലയിൽ 84 സെന്റിലാണ് സ്‌മാരകം സ്ഥിതി ചെയ്യുന്നത്. പെരിയാറിൻ്റെ പ്രതിമ, മ്യൂസിയം, ലൈബ്രറി എന്നിവയാണ് ഇവിടെയുള്ളത്.
