ഗൂഗിള്‍ ഇന്ത്യയുടെ പുതിയ മാനേജറും വൈസ് പ്രസിഡന്റുമായി പ്രീതി ലോബാനയെ നിയമിച്ചു. ഏഷ്യാ-പസഫിക് മേഖലയിലെ പ്രസിഡന്റായി പ്രമോഷന്‍ ലഭിച്ച സഞ്ജയ് ഗുപ്തയുടെ പിന്‍ഗാമിയായാണ് പ്രീതി നിയമിതയാകുന്നത്. ഇടക്കാല മേധാവിയായിരുന്ന റോമ ദത്ത ചോബെയെ മാറ്റിയാണ് ഗൂഗിളില്‍ 8 വര്‍ഷത്തെ പരിചയമുള്ള പ്രീതിയെ പുതിയ ചുമതലയിലേക്ക് ഉയര്‍ത്തിയത്.
ഗൂഗിള്‍ ഇന്ത്യയുടെ വില്‍പ്പനയും പ്രവര്‍ത്തനവും ഇനി പ്രീതി ലോബാന മേല്‍നോട്ടത്തിലായിരിക്കുമെന്ന് കമ്പനി അറിയിച്ചു. ഇന്ത്യയുടെ ഡിജിറ്റല്‍ ഇക്കോസിസ്റ്റമുമായി ഗൂഗിളിന്റെ ഇടപെടലുകള്‍ ശക്തിപ്പെടുത്തുകയാണ് പ്രീതിയുടെ പ്രധാന ചുമതല. കൂടാതെ, ഗൂഗിള്‍ ഇന്ത്യയുടെ ഡിജിറ്റല്‍ നേറ്റീവ് ഇന്‍ഡസ്ട്രീസ് മാനേജിംഗ് ഡയറക്ടര്‍ റോമ ദത്ത ചോബെയുമായി സഹകരിച്ചും പ്രവര്‍ത്തിക്കും.
ഗൂഗിളില്‍ ചേരുന്നതിന് മുമ്പ് ജിടെക്-പ്രോസസ്, പാര്‍ട്ണര്‍, പ്രസാധക പ്രവര്‍ത്തനങ്ങള്‍, പരസ്യ ഉള്ളടക്കം, ഗുണനിലവാര പ്രവര്‍ത്തനങ്ങള്‍ എന്നിവയുടെ വൈസ് പ്രസിഡന്റായും സേവനം അനുഷ്ഠിച്ച പ്രീതി, വിവിധ പ്രമുഖ കമ്പനികളിലും തന്റെ കഴിവ് തെളിയിച്ചിട്ടുണ്ട്.
നാറ്റ്‌വെസ്റ്റ് ഗ്രൂപ്പിലെ ഗ്ലോബല്‍ ഫിനാന്‍സ് സര്‍വീസസ് ഇന്ത്യയുടെ മാനേജിംഗ് ഡയറക്ടറായും അമേരിക്കന്‍ എക്‌സ്‌പ്രസില്‍ ഗ്ലോബല്‍ ബിസിനസ് സേവനങ്ങളുടെ വൈസ് പ്രസിഡന്റായും സ്റ്റാന്‍ഡേര്‍ഡ് ചാര്‍ട്ടേഡ് ബാങ്കില്‍ ബാങ്കിംഗ് സേവനങ്ങളുടെ മേധാവിയായും എഇസിഡിഎന്‍ ഗ്രിന്‍ഡ്ലേയ്‌സ് ബാങ്കില്‍ വ്യക്തിഗത വായ്പാ വിഭാഗ മേധാവിയായും പ്രവര്‍ത്തിച്ചിരുന്നു.
30 വര്‍ഷത്തിലധികം നീണ്ട പ്രീതി ലോബാനയുടെ കരിയറില്‍ ഫിനാന്‍സ്, ടെക്‌നോളജി, ബാങ്കിംഗ് തുടങ്ങിയ മേഖലകളില്‍ നിരവധി നേട്ടങ്ങള്‍ കരസ്ഥമാക്കിയിട്ടുണ്ട്. ഇന്ത്യയിലെ പ്രമുഖ വിദ്യാഭ്യാസ സ്ഥാപനമായ ഇന്ത്യൻ ഇൻസ്റ്റിറ്റ്യൂട്ട് ഓഫ് മാനേജ്‌മെൻ്റ് അഹമ്മദാബാദിന്റെ പൂർവ വിദ്യാർത്ഥിയാണ് പ്രീതി. ഇ-കൊമേഴ്‌സ്, ഫിന്‍ടെക്, ഗെയിമിംഗ്, മീഡിയ തുടങ്ങിയ മേഖലകളില്‍ ഗൂഗിളിന്റെ നവീകരണ നടപടികള്‍ ത്വരിതപ്പെടുത്താന്‍ പ്രീതി ലോബാനയുടെ നേതൃത്വത്തില്‍ ശ്രദ്ധ കേന്ദ്രീകരിക്കുമെന്ന് ഗൂഗിള്‍ വ്യക്തമാക്കിയിട്ടുണ്ട്.
