പൂമ ഇപ്പോൾ റീബ്രാൻഡ് ചെയ്തോ? പലരുടെയും സംശയം ഇതായിരുന്നു. പുതിയതായി വന്ന പരസ്യ ബോർഡുകളിലും മറ്റും PUMA എന്ന പരിചിതമായ പേരിന് പകരം PVMA എന്നായിരുന്നു ഏതാനും ദിവസം കണ്ടത്. ഇതുമായി ബന്ധപ്പെട്ട ചോദ്യങ്ങൾ സോഷ്യൽ മീഡിയയിൽ വ്യാപകമായി, ഉദ്ദേശിച്ച ലക്ഷ്യം നേടിയെന്ന് മനസിലാക്കിയ കമ്പനി ഒടുവിൽ ആ സത്യം വെളിപ്പെടുത്തി. പേരോ ലോഗോയോ ഒന്നും മാറ്റിയിട്ടില്ല. തൽക്കാലത്തേക്ക് ഒരു പരസ്യ തന്ത്രം മാത്രം സ്വീകരിച്ചതാണ്.
ഇന്ത്യയ്ക്ക് വേണ്ടി രണ്ട് ഒളിമ്പിക് മെഡൽ സ്വന്തമാക്കിയ ബാഡ്മിൻ്റൺ താരം പി വി സിന്ധുവിനെ ബ്രാൻഡ് അബാസഡറാക്കാൻ കമ്പനി കരാർ വച്ചിരിക്കുന്നു. താരത്തോടുള്ള ആദരസൂചകമായി ആണ് പേരിലെ PU മാറ്റി PV ആക്കിയത്. താരത്തെ ഉൾപ്പെടുത്തി പരസ്യം ചെയ്താലോ, അവരെ കൂടി കമ്പനി അധികൃതർ ഒരു വാർത്താസമ്മേളനം നടത്തി വിവരം അനൗൺസ് ചെയ്താലോ കിട്ടാത്ത പബ്ലിസിറ്റി ഈ വഴിക്ക് കിട്ടി എന്നതാണ് ലാഭം.
കാര്യം എന്തായാലും പുതിയ സോഷ്യൽ മീഡിയ യുഗത്തിൽ ഇതുപോലെയുള്ള പരസ്യങ്ങൾക്ക് തന്നെയാണ് മാർക്കറ്റ് എന്ന കാര്യം ഒരിക്കൽ കൂടി ഓർക്കാൻ മാധ്യമങ്ങൾക്കും പരസ്യ ഏജൻസികൾക്കും ഒരവസരം കൂടിയായി ഇത്.
