ഇന്ത്യ ചൈനയെ അപൂർവ ഭൂമി ഖനനത്തിനായി ആശ്രയിക്കുന്നത് കുറക്കുന്നതിനുള്ള ഒരു വലിയ ചുവടുവെപ്പായി നാല് സംസ്ഥാനങ്ങളിൽ ധാതുക്കൾക്കായി പ്രത്യേക ഇടനാഴികൾ സ്ഥാപിക്കുമെന്നാണ് ധനമന്ത്രി നിർമ്മല സീതാരാമൻ ബജറ്റിൽ പ്രഖ്യാപിച്ചത്. ഖനനം, സംസ്കരണം, ഗവേഷണം, ഉൽപ്പാദനം എന്നീ കാര്യങ്ങൾ പ്രോത്സാഹിപ്പിക്കുന്നതിനായി ധാതു സമ്പന്നമായ ഒഡീഷ, കേരളം, ആന്ധ്രാപ്രദേശ്, തമിഴ്നാട് എന്നീ സംസ്ഥാനങ്ങളിൽ ‘ ഇടനാഴികൾ ‘ സ്ഥാപിക്കുന്നതിലൂടെ ആർക്കാണ് നേട്ടമുണ്ടാകുക?
കുത്തക ചൈനക്ക്
ആഗോള ഖനി ഉൽപ്പാദനത്തിൻ്റെ ഏകദേശം 60% ഉം സംസ്കരിച്ച ഉൽപ്പാദനത്തിൻ്റെയും അപൂർവ ധാതു ഉൽപ്പാദനത്തിൻ്റെയും ഏകദേശം 90% ഉം ചൈനയാണ് നിയന്ത്രിക്കുന്നത്. ലോകമെമ്പാടുമുള്ള രാജ്യങ്ങൾ ചൈനയെയാണ് അപൂർവ ധാതുക്കൾക്കായി ആശ്രയിക്കുന്നത്. ചൈന കയറ്റുമതി നിയന്ത്രണ നയങ്ങളിൽ മാറ്റങ്ങൾ വരുത്തുമ്പോൾ ഇന്ത്യയടക്കമുള്ള രാജ്യങ്ങളിൽ അത് ഉത്പാദനത്തെ നേരിട്ട് ബാധിക്കുന്നുണ്ട്. ഉദാഹരണത്തിന് ഈ വർഷം ആദ്യം മുതൽ ചൈന വെള്ളി കയറ്റുമതി നിരോധിച്ചതോടെ, ആഗോള തലത്തിൽ വെള്ളിക്ക് കുത്തനെ വില ഉയരാൻ തുടങ്ങി.
നിർമിത ബുദ്ധി, സെമി കണ്ടക്ടറുകൾ, ഇലെക്ട്രോണിൿ വെഹിക്കിൾസ് തുടങ്ങിയ കാര്യങ്ങൾക്കെല്ലാം ഒഴിച്ച് നിർത്താൻ ആകാത്ത അപൂർവ ധാതുശേഖരത്തിൻ്റെ ഉൽപ്പാദനം ഇന്ത്യ കൂട്ടിയാൽ മാത്രമേ ചൈന പോലുള്ള രാജ്യങ്ങളെ അസംസ്കൃത വസ്തുക്കൾക്കായി, സ്ഥിരമായി ആശ്രയിക്കുന്നത് നിർത്താനാകൂ. മറ്റൊരു തരത്തിൽ പറഞ്ഞാൽ, ‘ആത്മനിർഭർ ഭാരത്’ എന്ന ലക്ഷ്യത്തിലേക്കുള്ള ഒരു ചവിട്ടുപടിയായി ഇതിനെ കാണാം എന്ന് ധനമന്ത്രി പറഞ്ഞത് ഇവിടെ കൂട്ടി വായിക്കാം.
ഇതിൻ്റെ കൂടെ തന്നെ ‘ഇന്ത്യ സെമികണ്ടക്ടർ മിഷൻ 2.0’ യുടെ ഭാഗമായി സെമി കണ്ടക്ടറുകൾക്കായി 40,000 കോടി രൂപയുടെ വിഹിതവും ധനമന്ത്രി പ്രഖ്യാപിച്ചു. കൃത്രിമ ബുദ്ധിയുടെ യുഗത്തിൽ മേഖലയിലെ വ്യവസായങ്ങൾ പരിപോഷിപ്പിക്കുന്നതിനായി ഇന്ത്യ എടുത്ത ഒരു തന്ത്രപരമായ നടപടിയായി ഇതിനെ കാണാം.
കേരളത്തിന് എന്ത് ലഭിക്കും?
വിഴിഞ്ഞം തുറമുഖത്തെയും, ചവറയെയും ബന്ധിപ്പിക്കുന്ന ‘റെയർ എർത് കോറിഡോർ’ കേരളത്തെ ഒരു ‘മാഗ്നെറ്റ്’ ഹബാക്കുമെന്ന പ്രഖ്യാപനം കേരള ബജറ്റിലുമുണ്ട്. 42000 കോടി രൂപയുടെ നിക്ഷേപം ഇത് ആകർഷിക്കുമെന്ന പരാമർശവും കേരള ബജറ്റിലുമുണ്ട്. ഇതിലൂടെ 50000 പേർക്ക് ജോലി ലഭിക്കുമെന്ന പ്രതീക്ഷയും കേരള ബജറ്റ് പങ്കുവെക്കുന്നു. KMML, KELTRON, NFTDC ചേർന്ന് നടപ്പിലാക്കുന്ന പദ്ധതിക്ക് 100 കോടി രൂപയും കേരള ബജറ്റിൽ നീക്കി വെച്ചിട്ടുണ്ട്.
അപൂർവ ഭൗമ മൂലകങ്ങളുടെ (തോറിയം, സ്കാൻഡിയം, മോണസൈറ്റ് പോലുള്ളവ) ഖനനം, ദുർബലമായ തീരദേശ ആവാസ വ്യവസ്ഥയെയും സമുദ്ര ജൈവ വൈവിധ്യത്തെയും ദോഷകരമായി ബാധിക്കുമെന്ന് റിപ്പോർട്ടുകളുണ്ട്. വർദ്ധിച്ചുവരുന്ന ഖനന പ്രവർത്തനങ്ങൾ റേഡിയേഷൻ സാധ്യത കൂട്ടുമോ എന്ന ആശങ്ക തീരദേശ ജനതക്കുണ്ട്. ഖനനവും വികസനവും പ്രാദേശിക മത്സ്യബന്ധന വ്യവസായത്തെയും പരമ്പരാഗത ഉപജീവന മാർഗങ്ങളെയും ബാധിക്കുമെന്ന പേടിയും ശക്തമാണ്.
രണ്ട് ബജറ്റിലും ഇടം
കേന്ദ്ര ബജറ്റിലും, കേരള ബജറ്റിലും, ഒരു പോലെ പരാമർശിച്ചിരിക്കുന്ന ‘അപൂർവ ധാതു ഇടനാഴി’ പ്രഖ്യാപനം, ബജറ്റുകളുടെ ചരിത്രമെടുത്ത് നോക്കിയാൽ ഒരു അപൂർവതയായി കാണാം. രണ്ടു ദിവസത്തിൻ്റെ ഇടവേളയിൽ രണ്ടു ബജറ്റുകളിലും സ്ഥാനം പിടിച്ച ‘ഇടനാഴി’ യുടെ പ്രാധാന്യം കൃത്രിമ ബുദ്ധിയുടെ കാലഘട്ടത്തിൽ ഇന്ത്യ നടത്തുന്ന വലിയ കാൽവെപ്പായിരിക്കും.
പ്രധാന വ്യാവസായിക, തുറമുഖ സ്ഥലങ്ങളെ- പ്രത്യേകിച്ച് വിഴിഞ്ഞം, ചവറ, കൊച്ചി എന്നിവയെ- ബന്ധിപ്പിക്കുന്നതിലൂടെ, കേരളത്തിൻ്റെ അതുല്യമായ തീരദേശ ധാതു സമ്പത്ത് പ്രയോജനപ്പെടുത്തുക എന്ന ഇടനാഴിയുടെ ലക്ഷ്യത്തിലേക്ക് അത്ര ദൂരമില്ല എന്നാണ് രണ്ടു ബജറ്റുകളിലും ഇടംപിടിച്ചതിനാൽ മനസിലാക്കേണ്ടത്.
വ്യാവസായിക വികസനത്തിനായുള്ള സംസ്ഥാനത്തിൻ്റെ ആഗ്രഹവും പരിസ്ഥിതി ലോല മേഖലകളെ സംരക്ഷിക്കേണ്ടതിൻ്റെ ആവശ്യകതയും തമ്മിൽ ഇതിൽ ഒരു സംഘർഷമുണ്ട്. ഇത് നിയമപരമായ വെല്ലുവിളികളും ഉയർത്തുന്നു. ഖനന അവകാശങ്ങളെ ചൊല്ലി കേന്ദ്ര സർക്കാരും സംസ്ഥാന സർക്കാരും തമ്മിലുള്ള ഏറ്റുമുട്ടലിലേക്ക് ഇത് നയിക്കുമോ എന്ന ആശങ്കയും ശക്തമാണ്. അതുപോലെ തന്നെ ‘കേന്ദ്ര ഇടനാഴിയിലൂടെ’ കുത്തക വ്യവസായികൾ നുഴഞ്ഞു കയറുമോ എന്ന ആശങ്കയും പല കോണുകളിൽ നിന്നും ഉയരുന്നുണ്ട്.
