ഐഎംഡിബിയുടെ 2023ലെ ജനപ്രിയ ഇന്ത്യൻ താരങ്ങളുടെ പട്ടിക പ്രഖ്യാപിച്ചു. ഷാരൂഖ് ഖാനാണ് പട്ടികയില് ഒന്നാം സ്ഥാനത്ത്. ഈ വര്ഷത്തെ ഏറ്റവും വലിയ ബ്ലോക്ബസ്റ്ററുകളായ പഠാനും, ജവാനുമാണ് ഷാരൂഖിന് ഈ സ്ഥാനം നേടി കൊടുത്തിരിക്കുന്നത്. ഐഎംഡിബി പേജ് വ്യൂ അടിസ്ഥാനമാക്കിയാണ് വര്ഷത്തിലും ഐഎംഡിബി സ്റ്റാര് റാങ്കിംഗ് നിർണ്ണയിക്കുന്നത്.
തെന്നിന്ത്യയിൽ നിന്ന് നയൻതാര, വിജയ് സേതുപതി എന്നിവരാണ് ആദ്യത്തെ പത്തിൽ ഇടം നേടിയ താരങ്ങൾ. നയൻതാര അഞ്ചാം സ്ഥാനത്തും വിജയ് സേതുപതി പത്താം സ്ഥാനത്തുമാണുള്ളത്. ജവാനിലെ പ്രകടനമാണ് നയന് താരയെ പട്ടികയില് അഞ്ചാം സ്ഥാനത്ത് എത്തിച്ചിരിക്കുന്നത്.
ആലിയ ഭട്ട്, ദീപിക പദുക്കോൺ എന്നിവരാണ് പട്ടികയില് രണ്ടും മൂന്നും സ്ഥാനത്ത്. ഓസ്കാർ അവാര്ഡ് നേടിയ ആർആർആർ സിനിമ, നെറ്റ്ഫ്ലിക്സ് ആക്ഷന് ത്രില്ലര് സിനിമ ഹാർട്ട് ഓഫ് സ്റ്റോൺ, കരൺ ജോഹറിന്റെ റോക്കി ഔർ റാണി കി പ്രേം കഹാനി എന്നീ ചിത്രങ്ങളിലെ പ്രകടനമാണ് ആലിയയ്ക്ക് രണ്ടാം സ്ഥാനം കിട്ടാന് കാരണമാക്കിയത്. പഠാനിലെ വേഷത്തില് തിളങ്ങിയ ദീപിക, ജവാനിലും ക്യാമിയോ റോളില് എത്തിയിരുന്നു. ഈ ചിത്രങ്ങളുടെ വന് വിജയം ഐഎംഡിബിയുടെ 2023ലെ ജനപ്രിയ ഇന്ത്യൻ താരങ്ങളുടെ പട്ടികയില് ദീപികയെ മൂന്നാമത് എത്തിച്ചു.
ബേസിൽ ജോസഫ് സംവിധാനം ചെയ്ത ‘ഗോദ’ എന്ന ചിത്രത്തിലൂടെ മലയാളികൾക്ക് പരിചിതയായ വാമിഖ ഗബ്ബിയാണ് നാലാം സ്ഥാനത്ത്. ഖുഫിയ, ജൂബിലി, കാലി ജോട്ട, മോഡേൺ ലവ് ചെന്നൈ എന്നിവയിലൂടെയാണ് വാമിഖ ഗബ്ബി ശ്രദ്ധേയ ആയത്. ആദ്യമായാണ് താരം ഐഎംഡിബിയുടെ ജനപ്രിയ ഇന്ത്യൻ താരങ്ങളുടെ പട്ടികയില് ഇടം പിടിക്കുന്നതും.
ബുധനാഴ്ചയാണ് പട്ടിക ഐഎംഡിബി പുറത്തുവിട്ടത്. തമന്ന ഭാട്ടിയ, കരീന കപൂർ ഖാൻ, മലയാള ചിത്രം കുറുപ്പ്, തമിഴിലെ പൊന്നിയൻ സെൽവൻ എന്നീ ചിത്രങ്ങളിലൂടെ ശ്രദ്ധേയയായ ശോഭിത ധൂളിപാല, അക്ഷയ് കുമാർ, എന്നിവരാണ് പട്ടികയിൽ ആദ്യ പത്തിൽ ഉള്ള മറ്റ് താരങ്ങൾ.
